សាំង សុម៉ាលី និយាយពីការតស៊ូជាមួយអាជីពអាជ្ញាកណ្ដាលស្រី
រាជធានីភ្នំពេញ ៖ បើសិនជាគេនិយាយពីឈ្មោះសាំង សុម៉ាលី ប្រហែលជាមានអ្នកស្គាល់តិចណាស់ តែបើគេនិយាយពី
រាជធានីភ្នំពេញ ៖ បើសិនជាគេនិយាយពីឈ្មោះសាំង សុម៉ាលី ប្រហែលជាមានអ្នកស្គាល់តិចណាស់ តែបើគេនិយាយពី
រាជធានីភ្នំពេញ ៖ បើសិនជាគេនិយាយពីឈ្មោះសាំង សុម៉ាលី ប្រហែលជាមានអ្នកស្គាល់តិចណាស់ តែបើគេនិយាយពីអាជ្ញាកណ្ដាលស្រីប្រពន្ធកីឡាករល្បីឈ្មោះអេ ភូថងវិញនោះច្បាស់ជាមានអ្នកស្គាល់ច្រើនមិនខាន ។ ស្គាល់ច្រើនដោយសារនៅកម្ពុជាបច្ចុប្បន្ន អាជ្ញាកណ្ដាលស្រីល្បីកាត់ក្ដីមិនលម្អៀងនៅលើសង្វៀនប្រដាល់គឺមានតែ២នាក់គត់ហើយគ្មានអ្នកណាផ្សេងក្រៅពីអ្នកស្រីសាំង សុម៉ាលី និងកញ្ញាអិុន វិចិត្រ នោះឡើយ។
បច្ចុប្បន្ន អ្នកស្រី សាំង សុម៉ាលី អាយុ៣៩ឆ្នាំ ជាមន្ត្រីអាជ្ញាកណ្ដាលនិងចៅក្រមប្រចាំសង្វៀនទូរទស្សន៍ប៉ុស្តិ៍បាយ័នដោយបានចូលធ្វើការងារនេះតាំងពីឆ្នាំ២០០៩មកម្ល៉េះ ។ អ្នកស្រីបានរៀបការជាមួយអធិរាជកែងឆេះជង្គង់ទិព្វលោក អេ ភូថង នៅក្នុងឆ្នាំ១៩៩៧ និងមានកូន៤នាក់(ប្រុស៣ ស្រី១) ដែលមកដល់ពេលនេះពួកគេក្លាយជាអ្នកប្រដាល់ទាំងអស់ក្នុងនោះកូនច្បងគេឈ្មោះអេ យ៉ានុត ជាអ្នកប្រដាល់ស្រីល្បីឈ្មោះជាងគេក្នុងចំណោមអ្នកប្រដាល់ស្រីទាំងអស់ដែលមកដល់ពេលនេះនៅសល់តែ៤នាក់ប៉ុណ្ណោះកំពុងតែនៅត្រាំត្រែងនឹងអាជីពមួយនេះ។
ពាក់ព័ន្ធនឹងការចាប់យកអាជីពជាអាជ្ញាកណ្ដាលនិងចៅក្រមប្រដាល់នេះ អ្នកស្រីសាំង សុម៉ាលី ដែលមានស្រុកកំណើតនៅទីរួមខេត្តកោះកុងរូបនេះបានប្រាប់ឱ្យដឹងថា ដំបូងឡើយ អ្នកស្រីមិនមានចិត្តចង់ធ្វើជាអាជ្ញាកណ្ដាល ឬចៅក្រមប្រដាល់អីនោះទេដោយសារខ្លួនភ័យខ្លាំងពេកពេលឃើញមនុស្សអ៊ូអរច្រើន ។ ប៉ុន្តែដោយសារតែស្វាមីជំរុញពេកទើបអ្នកស្រីយល់ព្រមដោយចូលរៀនវគ្គអាជ្ញាកណ្ដាល
ដែលរៀបចំឡើងដោយសហព័ន្ធកីឡាប្រដាល់កម្ពុជា ។ រហូតដល់ឆ្នាំ២០០៩ អ្នកស្រីត្រូវបានសហព័ន្ធកីឡាប្រដាល់សម្រេចជ្រើសរើសឱ្យចូលបម្រើការងារជាអាជ្ញាកណ្ដាលស្រីដំបូងគេរហូតមកដល់សព្វថ្ងៃ ។ ភរិយាលោក អេ ភូថង រូបនេះបញ្ជាក់ថា៖ «ខ្ញុំបានឡើងធ្វើអាជ្ញាកណ្ដាលកាត់សេចក្ដីដំបូងនៅលើសង្វៀនទូរទស្សន៍បាយ័ន ដែលពោរពេញដោយអារម្មណ៍ភ័យញ័ររន្ធត់រហូតបែកញើសជោកខ្លួន ប៉ុន្តែខ្ញុំព្យាយាមទប់អារម្មណ៍រហូតអាចគ្រប់គ្រងការប្រកួតបានដោយរលួន ។ បន្ទាប់ពីនោះមក ខ្ញុំទទួលបានឱកាសធ្វើជាអាជ្ញាកណ្ដាលកាត់សេចក្ដីឱ្យកីឡាការិនីឡើងប្រកួតជាញឹកញាប់ទាំងការប្រកួតថ្នាក់ជាតិ និងអន្តរជាតិ និងបានក្លាយជាចៅក្រមផ្ដល់ពិន្ទុដល់កីឡាករ-កីឡាការិនីថែមទៀត»។
ចាប់តាំងពីបានចូលបម្រើការងារមក អ្នកស្រីហាក់បីដូចជាមានចិត្តស្រឡាញ់កីឡាប្រដាល់កាន់តែខ្លាំងជាពិសេសការងារសព្វថ្ងៃនេះ បើទោះជាមានធុរៈផ្ទាល់ខ្លួនយ៉ាងណាក្ដីក៏មិនហ៊ានឈប់សម្រាកដែរ ខណៈតាំងពីតូចក្រូចឆ្មារមកអ្នកស្រីមិនមានចំណូលចិត្តទាល់តែសោះនឹងកីឡាវាយតប់មួយនេះទោះបីឪពុកបង្កើតអ្នកស្រីជាអតីតអ្នកប្រដាល់ក៏ដោយ ។
អ្នកស្រីសាំង សុម៉ាលី បានប្រាប់ឱ្យដឹងថា ការចាប់យកមុខរបរអាជ្ញាកណ្ដាល និងចៅក្រមប្រដាល់រហូតមកដល់ពេលនេះ មិនបានជួយឱ្យគ្រួសារអ្នកស្រីរស់ក្នុងជីវភាពធូរធារប៉ុន្មានទេ ប៉ុន្តែធ្វើម៉េចដោយសារតែមានចិត្តស្រឡាញ់ទៅហើយ បើទោះជាជួបការលំបាកយ៉ាងណាក៏ត្រូវតែតស៊ូនឹងអាជីពមួយនេះដែរ ។ ជាក់ស្ដែង កន្លងមកដោយសារឃើញគ្រួសារអ្នកស្រីជួបការលំបាកពេក លោកជំទាវហ៊ុន ម៉ាណា អគ្គនាយិកាវិទ្យុនិងទូរទស្សន៍បាយ័នបានផ្ដល់អំណោយដ៏ថ្លៃថ្លានូវផ្ទះថ្ម១ល្វែងនៅខាងក្រោយពន្ធនាគារព្រៃសគ្រាន់បានស្នាក់នៅ ។ ប៉ុន្តែដោយសារផ្ទះនោះនៅឆ្ងាយពីសាលាដែលកូនចង់រៀន និងឆ្ងាយពីប៉ុស្តិ៍ទូរទស្សន៍ពេកទើបគ្រួសារអ្នកស្រីបានមកជួលផ្ទះគេនៅម្ដុំផ្លូវសុខហុកខាងលិចផ្សារធំថ្មីស្នាក់នៅវិញ ។ អ្នកស្រីថា ជារៀងរាល់ខែប្រាក់ចំណូលបានមកពីការងារធ្វើជាអាជ្ញាកណ្ដាលនិងចៅក្រមប្រដាល់របស់អ្នកស្រី និងស្វាមី ត្រូវចំណាយទៅលើកូនរៀនផង ថ្លៃផ្ទះផង ថ្លៃភ្លើងផង ថ្លៃម្ហូបអាហារចិញ្ចឹមកីឡាករប្រដាល់ជាង១០នាក់ផងសឹងតែទប់ទល់មិនបាន ។ អ្នកស្រីក៏មិនចង់ឱ្យកូនចាប់យកអាជីពជាអ្នកប្រដាល់នេះដែរទើបអ្នកស្រីនិងស្វាមីសុខចិត្តទ្រាំលំបាក កាត់បន្ថយការចំណាយខ្លះដើម្បីទុកប្រាក់ឱ្យកូនរៀនក្រែងលោថ្ងៃមុខ ពួកគេមានចំណេះអាចប្រកបមុខរបរអ្វីដែលល្អជាងនេះ ។ ជាចុងក្រោយ អ្នកស្រីបានសំណូមពរដល់ថ្នាក់ដឹកនាំសហព័ន្ធកីឡាប្រដាល់ ស្ថានីយទូរទស្សន៍ ក៏ដូចជាក្រុមហ៊ុនទាំងអស់ដែលជាម្ចាស់ឧបត្ថម្ភកម្មវិធីធ្វើយ៉ាងណា សូមឱ្យអ្នកប្រដាល់ស្រីមានឱកាសបានឡើងសង្វៀនប្រដាល់យ៉ាងហោច១ខែម្ដងផងដើម្បីលើកទឹកចិត្តពួកគេកុំឱ្យបោះបង់ចោលអាជីពដែលពួកគេខំតស៊ូហ្វឹកហាត់ជាច្រើនឆ្នាំសំដៅជួយថែរក្សាធនធានកីឡាការិនីដ៏កម្រមួយនេះឱ្យនៅគង់វង្សយូរអង្វែតទៅថ្ងៃមុខទៀត៕
ចែករំលែកព័តមាននេះ