ការរួមបញ្ចូលបច្ចេកវិទ្យាឌីជីថល ដើម្បីធានាដល់ការធ្វើស្រែ
ជាមួយនឹងការកើនឡើងនៃការប្រើប្រាស់ស្មាតហ្វូននៅក្នុងប្រទេស លោក Wiebusch ឲ្យដឹងថា
ប្រទេសថៃ ៖ ជាមួយនឹងការកើនឡើងនៃការប្រើប្រាស់ស្មាតហ្វូននៅក្នុងប្រទេសថៃ ប្រធានក្រុមហ៊ុន Bayer លោក Simon-Thorsten Wiebusch បាននិយាយថា ជំហានបន្ទាប់ដើម្បីពង្រឹងដំណាំស្រូវក្នុងស្រុក គឺការរួមបញ្ចូលនូវបច្ចេកវិទ្យាឌីជីថល ។
« ប្រព័ន្ធឌីជីថលបានផ្តល់នូវវិធីសាស្ដ្រយ៉ាងច្រើនក្នុងការដាំដុះស្រូវ » ។ នេះបើតាមលោក Wiebusch ។ អ្នកឧបត្ថម្ភផ្សេងទៀតដូចជា អង្គការ GIZ ដែលទទួលបានមូលនិធិពីអាល្លឺម៉ង់ បង្ហាញថា យន្តហោះដ្រូនទំនើបអាចតាមដាន វាស់ស្ទង់ និងការពារស្រូវជាច្រើនហិកតា ។
ទិន្នន័យពីលើអាកាសដែលប្រមូលបានដោយដ្រូន យើងអាចទទួលបានក្នុងរយៈពេលតែប៉ុន្មាននាទីប៉ុណ្ណោះ ខណៈការប្រមូលដោយមនុស្ស ត្រូវចំណាយពេលជាច្រើនថ្ងៃ ។ អង្ករថៃ ដែលជាទំនិញនាំចេញសំខាន់មួយ ក្នុងទឹកប្រាក់ប្រមាណ៧៥៣លានដុល្លារ និងជាឧស្សាហកម្មម្ហូបអាហារមានតម្លៃ៤,៧ប៊ីលានដុល្លារ បានជួបនឹងបញ្ហាក្នុងរយៈពេលប៉ុន្មានឆ្នាំថ្មីៗនេះ ដោយសារតែតម្លៃទាប និងការប្រកួតប្រជែងកើនឡើង ។
លោក Wiebusch ឲ្យដឹងថា ៖« កម្មវិធីឌីជីថលអាចជួយដល់ការធ្វើកសិកម្មកាន់តែងាយស្រួល ដោយអនុញ្ញាតឱ្យជនជាតិថៃវ័យក្មេងធ្វើការក្នុងកសិដ្ឋាន ហើយមិនចាំបាច់ផ្លាស់ទៅធ្វើការក្នុងទីក្រុង » ។
លោកទទួលស្គាល់ថា កសិករថៃភាគច្រើនមានដីជាកម្មសិទ្ធិគ្រួសារ ប៉ុន្តែពួកគេត្រូវការជំនួយដើម្បីទទួលបានចំណេញច្រើន ។ លោកបន្តថា ៖« ការរួមបញ្ចូលបច្ចេកវិទ្យាឌីជីថល និងគ្រឿងម៉ាស៊ីន គឺអាចយកឈ្នះបញ្ហាសង្គមចាស់ជរារបស់ថៃ ខណៈអត្រាកំណើតកាន់តែតិចសម្រាប់ទ្រទ្រង់ដល់កសិកម្ម » ។
ថ្មីៗនេះ ក្រុមហ៊ុន Bayer បានបង្ហាញគម្រោងរួមគ្នាមួយរវាងប្រទេសអាល្លឺម៉ង់ និងថៃ ស្តីពីវិស័យស្រែចម្ការឯកជនក្នុងតំបន់ Ubon Ratchathani ដែលមានការដាំដុះស្រូវផ្កាម្លិះប្រហែល៦៧ម៉ឺនហិកតា។
កសិករនៅភូមិ Baan Bua Thein និយាយថា ពួកគេបានកាត់បន្ថយតម្លៃដាំដុះ២០% ខណៈទិន្នផលកើនឡើង២០%ផងដែរ ។
លោក Apichart Pongsrihadulchai ស្ថាបត្យករនៃអង្គការ BRIA (គំនិតផ្តួចផ្តើមធ្វើឲ្យស្រូវកាន់តែល្អប្រសើរសម្រាប់អាស៊ី) និយាយថា ៖« វាមានន័យថា ប្រាក់ចំណូលបានកើនឡើងយ៉ាងច្រើន » ។
អង្គការ BRIA បានលើកទឹកចិត្តការប្រើប្រាស់បច្ចេកវិទ្យាថ្មី រួមទាំងការប្រើជី ថ្នាំសម្លាប់សត្វល្អិត និងដ្រូន ។ ទិន្នន័យប្រមូលបានយ៉ាងរហ័សពីដ្រូន អាចប្រាប់ដល់កសិករនៅពេលដល់ពេលប្រមូលផលដំណាំ និងការពារដំណាំពីការស្អុយរលួយ ។
លោក Apichart និយាយថា ៖« ប្រសិនបើពួកគេបាត់បង់ការងារនៅទីក្រុង ពួកគេនឹងជួបការអត់ឃ្លាន ដោយសារអស់ប្រាក់ ។ ប៉ុន្តែនៅឯស្រែចម្ការវិញ ពួកគេអាចរស់នៅបានដោយមិនចាំបាច់មានប្រាក់» ។
ព្រះមហាក្សត្រ Bhumibol Adulyadej បានចាត់ទុកវិស័យកសិកម្មជាឆ្អឹងខ្នងនៃសង្គមថៃ ដោយបង្កើតគោលការណ៍ «សេដ្ឋកិច្ចគ្រប់គ្រាន់» ដើម្បីធានាថា ពួកគេអាចទ្រាំទ្រនឹងវិបត្ដិទីផ្សារដែលផ្លាស់ប្តូរយ៉ាងឆាប់រហ័ស ។
វិទ្យាស្ថានស្រាវជ្រាវអង្ករអន្តរជាតិ (IRRI) មានមូលដ្ឋាននៅប្រទេសហ្វ៊ីលីពីន បានពិសោធន៍លើពូជស្រូវទំនើបអស់រយៈពេលជាច្រើនទសវត្សរ៍ ដើម្បីអាចផ្គត់ផ្គង់ទូទាំងពិភពលោក។ ប្រសិនបើការពិសោធន៍នេះទទួលជោគជ័យ កសិករថៃនឹងរងផលប៉ះពាល់ដោយការផ្គត់ផ្គង់អង្ករលើសលប់ និងតម្លៃធ្លាក់ចុះ ៕
ចែករំលែកព័តមាននេះ