រាជធានីភ្នំពេញ ៖ បុរសម្នាក់ជាតារាសម្តែង បើករថយន្តស៊េរីទំនើបមួយគ្រឿងបត់ឆ្លងផ្លូវបម្រុងចូលចាក់សាំង អត់ស៊ីញ៉ូ ត្រូវម៉ូតូជិះលឿនបុកពេញទំហឹង បណ្តាលឲ្យដួលបាក់ជើងស្តាំម្ខាង ហេតុការណ៍នេះបានកើតឡើងកាលពីវេលាម៉ោង០៩និង៣០នាទីយប់ ថ្ងៃទី១៥ ខែតុលា ឆ្នាំ២០១៧ ស្ថិតនៅតាមបណ្តោយផ្លូវម៉ៅសេទុងកែងផ្លូវ២០២ មុខស្ថានីយប្រេងឥន្ធនៈកាល់តិច ស្ថិតក្នុងសង្កាត់ទឹកល្អក់៣ ខណ្ឌទួលគោក ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេបានឃើញបុរសម្នាក់ដែលគេស្គាល់ថាជាតារាសម្តែង បានបើករថយន្តស៊េរីទំនើបមួយគ្រឿងម៉ាកឡិចស៊ីស RX450h ពណ៌ស ពាក់ស្លាកលេខ ភ្នំពេញ ២AQ-១៦១៩ ដឹកនារីស្រស់សោភាម្នាក់ដែលគេដឹងថាជាតារាសម្តែងជាមួយគ្នា ធ្វើដំណើរតាមបណ្តោយផ្លូវម៉ៅសេទុងក្នុងទិសដៅពីត្បូងទៅជើង លុះមកដល់ផ្លូវ២០២ មុខស្ថានីយប្រេងឥន្ធនៈកាល់តិច បានបត់ឆ្វេងដៃបម្រុងចូលមកចាក់សាំង ប៉ុន្តែបត់រថយន្តអត់ស៊ីញ៉ូ ខណៈពេលបត់បានពាក់កណ្តាលផ្លូវ ត្រូវបានម៉ូតូមួយគ្រឿងម៉ាកសង់ប៉ិច ពណ៌ខ្មៅ ជិះដោយបុរសម្នាក់ទិសដៅពីជើងទៅត្បូងក្នុងល្បឿនយ៉ាងលឿនចាប់ហ្វ្រាំងមិនទាន់ ជ្រុលចង្កូតទៅបុករថយន្តខាងស្តាំទ្វារចំពាក់កណ្ដាលពេញទំហឹង បណ្តាលឲ្យដួលម៉ូតូបាក់ជើងម្ខាងស្តាំ ភ្លាមៗនោះត្រូវបានរថយន្តសង្គ្រោះរបស់គ្លីនិកឯកជនដឹកជនរងគ្រោះយកទៅព្យាបាលភ្លាមៗដែរ ។ ចំណែកឯតៃកុង និងរថយន្ត ត្រូវបានប្រជាពលរដ្ឋឃាត់ខ្លួនប្រគល់ជូនសមត្ថកិច្ច ។ ដោយឡែកនារីដែលរួមដំណើរជាមួយបានឡើងជិះរថយន្តមួយគ្រឿងទៀតចេញទៅបាត់ ។
ក្រោយកើតហេតុ សមត្ថកិច្ចនាំខ្លួនអ្នកបើករថយន្តទៅប៉ុស្តិ៍នគរបាលរដ្ឋបាលទឹកល្អក់៣ ចំណែករថយន្ត និងម៉ូតូត្រូវបានសមត្ថកិច្ចជំនាញចុះមកវាស់វែងយកមករក្សារទុកនៅអធិការដ្ឋាននគរបាលខណ្ឌទួលគោក រងចាំដោះស្រាយគ្នាទៅតាមផ្លូវច្បាប់ ៕
ចែករំលែកព័តមាននេះ