ប្រញាប់ទៅណាហ្នឹង ទើបវ៉ាគុបជ្រុងផុតផ្លោងមកបុកគុបជ្រុងវិញ
រាជធានីភ្នំពេញ ៖ បុរស២នាក់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៣
រាជធានីភ្នំពេញ ៖ បុរស២នាក់ជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៣ បើកលឿនហើយជែងម៉ូតូមួយគ្រឿងទៀតម៉ាកគុបក៏ជ្រុលចង្កូតទៅបុកគូទរថយន្តម៉ាកតូយ៉ូតាព្រូស ពណ៌ទឹកប្រាក់ ខ្ទាតទៅបុកម៉ូតូគុបដែលខ្លួនឯងជែងបណ្តាលឱ្យដួលរងរបួសធ្ងន់ម្នាក់ និងរងរបួសស្រាល២នាក់ ហេតុការណ៍នេះបានកើតឡើងកាលពីវេលាម៉ោង៦យប់ថ្ងៃទី១៥ ខែតុលា ឆ្នាំ២០១៧ តាមបណ្តោយផ្លូវជាតិលេខ៥ នៅចំណុចខាងត្បូងប្រមាណជា២០០ម៉ែត្រពីឃ្លាំងសាំងស៊ូគីមិច ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ ។
សាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញបុរស២នាក់ជិះម៉ូតូបង្កមួយគ្រឿងម៉ាកហុងដាឌ្រី ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ កំពង់ធំ ១F-៣៦៦៥ ធ្វើដំណើរតាមបណ្តោយផ្លូវជាតិលេខ៥ក្នុងទិសដៅពីជើងទៅត្បូងក្នុងស្ថានភាពស្រវឹងស្រាបើកល្បឿនលឿនហើយជែងម៉ូតូមួយគ្រឿងម៉ាកគុប ពណ៍ស្ករ អត់មានស្លាកលេខបើកបរស្របទិសដៅគ្នាមិនបានប្រយ័ត្នក៏ជ្រុលចង្កូតទៅបុកគូទរថយន្តម៉ាកតូយ៉ូតាព្រូស ពណ៌ទឹកប្រាក់ ពាក់ស្លាកលេខ ភ្នំពេញ ២AL-៤៩៩៣ ចតទុកចោលនៅចិញ្ចើមផ្លូវមុខផ្ទះចំពេញទំហឹងបណ្តាលឱ្យបែកស្តុបក្រោយ និងហើបគូទក្រោយជំហៀងខាងឆ្វេង រីឯម៉ូតូបង្កវិញខ្ទាតទៅបុកម៉ូតូគុបដែលខ្លួនឯងជែងបណ្តាលឱ្យដួលទាំងសងខាងរងរបួសធ្ងន់ម្នាក់អ្នកអង្គុយពីក្រោយម៉ូតូហុងដាឌ្រីម ចំណែកអ្នកឌុប និងម្ចាស់ម៉ូតូគុបវិញរងរបួសស្រាល ។
ក្រោយពេលកើតហេតុជនរងគ្រោះដែលសន្លប់បានដឹងខ្លួនហើយសមត្ថកិច្ចឱ្យភាគីទាំងសងខាងនៅជជែកដោះស្រាយគ្នាដោយមិនចង់ឱ្យវាស់វែងយកទៅរក្សាទុកទេ ៕
ចែករំលែកព័តមាននេះ