កន្លែងអ្នកតាកោះក្រញ៉ាន ជាកន្លែងពលរដ្ឋខ្មែរគោរពបូជា តែបែរជា…
ខេត្តកំពង់ឆ្នាំង ៖ ប្រជាពលរដ្ឋខ្មែរជាច្រើនគ្រួសារ ពិសេសប្រជានេសាទ ក្នុងឃុំឆ្នុកទ្រូ ស្រុកបរិបូរណ៍
ខេត្តកំពង់ឆ្នាំង ៖ ប្រជាពលរដ្ឋខ្មែរជាច្រើនគ្រួសារ ពិសេសប្រជានេសាទ ក្នុងឃុំឆ្នុកទ្រូ ស្រុកបរិបូរណ៍
ខេត្តកំពង់ឆ្នាំង ៖ ប្រជាពលរដ្ឋខ្មែរជាច្រើនគ្រួសារ ពិសេសប្រជានេសាទ ក្នុងឃុំឆ្នុកទ្រូ ស្រុកបរិបូរណ៍ មានការខកចិត្តជាខ្លាំង និងបានប្រតិកម្មទៅនឹងការយករូបសំណាក ព្រះនាងគង់ស៊ីអ៊ីម ទៅដាក់នៅកន្លែងខ្ទមលោកតាកោះក្រញ៉ាន ដែលប្រជាពលរដ្ឋខ្មែរគោរពបូជាមានតាំងពីយូយាណាស់មកហើយ។ បញ្ហានេះបើតាមអាជ្ញាធរមូលដ្ឋានបានបញ្ជាក់ថា រូបរូបសំណាកព្រះនាងគង់ស៊ីអ៊ីម ត្រូវបានគេលួចយកទៅដាក់តាំងពីខែប្រាំងឆ្នាំ២០១៦មកម្លេះ។ ប៉ុន្តែទើបនឹងមានការភ្ញាក់ផ្អើលថ្មីនេះ ដោយសារមានអាជីវករខ្មែរម្នាក់ បានយកជ្រូកខ្វៃទៅសែនអ្នកតាខ្មែរនោះ បែជាឃើញរូបសំណាក ព្រះនាមគង់ស៊ីអ៊ីមសម្រាប់ប្រជាពលចិន វៀតណាម គោរពបូជាទៅវិញ ទើបបែកធ្លាយរឿងនេះ ហើយបានធ្វើឲ្យប្រជាពលរដ្ឋអស់ជំនឿ និងសំណូមពរដល់អាជ្ញាធរខេត្តសូមមេត្តាជួយចាត់វិធានការជាបន្ទាន់។
លោក ហួយ សុផាត ជាអាជីវករនៅផ្សារមាត់កំពង់ឆ្នុកទ្រូ មានរៀបរាប់ថា តាំងពីដើមមក លើកោះក្រញ៉ាននេះ មានខ្ទមអ្នកតាមួយដែលធ្វើអំពីឈើមានទំហំធំ និងបានជួសជុលកែលម្អស្ទើររាល់ឆ្នាំ។ ប្រជាពលរដ្ឋអ្នកនេសាទ និងអ្នកធ្វើដំណើរឆ្លងកាត់ទីនោះតែងតែគោរពបូជា និងបែបន់សុំសេចក្តីសុខគ្រប់ៗគ្នា។ ព្រោះកន្លងមានប្រជាពលរដ្ឋ ដែលធ្លាប់បែរបន់សក្តិសិទ្ធណាស់ ដូចជាពេលខ្លះវង្វេងផ្លូវ ពេលខ្លះជួបខ្យល់រលកធំៗ ពួកគាត់ធ្វើដំណើរតាមទូកកាណូត ពេលជួបបញ្ហានេះកើតឡើងតែងបន់ស្រន់ លោកតាកោះក្រញ៉ាន ឃើញថា បានសក្ដិសិទ្ធ បាត់ខ្យល់ បាត់រលក និងអាចរកផ្លូវឃើញវិញ។ ចំណែកកោះនេះផងដែរ ក៏ជាទីសំចតទូកកាណូតអ្នកនេសាទរាប់សិបគ្រឿងក្នុងខែប្រាំង ព្រោះមានដីគោកលើកោះធំទូលាយ តែសម្រាប់ខែវស្សាវិញគឺលិចអស់ហើយ។
លោកបានបញ្ជាក់ថា ថ្មីៗនៅពេលលោកទៅបែបន់ស្រាប់តែជួបរូបសំណាកព្រះនាមគង់ស៊ីអ៊ីមទៅវិញ។ ក្នុងនាមលោកជាប្រជាពលរដ្ឋខ្មែរមួយរូប បាត់អស់ជំនឿនៅទីនោះ និងព្រួយបានរម្ភថា តទៅអនាគត បើគ្មានវិធានការទុបស្កាត់ឲ្យទាន់ពេលទេនោះ ប្រពៃណី និងវប្បធម៌នៅទីនោះនឹងត្រូវបាត់បង់ជាពុំខាន។ ដោយហេតុនេះ លោកសូមសំណូមពរដល់ឯកឧត្តមអភិបាលខេត្តកំពង់ឆ្នាំង មេត្តាជួយចាត់វិធានការជាបន្ទាន់ សម្រាប់កូនខ្មែរ ពិសេសអ្នកនេសាទនៅតំបន់នោះគោរពបូជាតាមជំនឿ។ ជុំវិញករណីនេះដែរ បើតាមប្រជាពលរដ្ឋនៅតំបន់នោះ បានឲ្យដឹងកាលពីអំឡុងខែប្រាំងឆ្នាំ២០១៦ ក្រោយពេលបុណ្យចូលឆ្នាំខ្មែរហើយ មានប្រជាពលរដ្ឋ១ក្រុម បានសុំអាជ្ញាធរស្រុក ជួសជុលអាស្រមលោកតាកោះក្រញ៉ាន ប៉ុន្តែក្រោយពេលសុំជួសជុលគឺបានធ្វើអាស្រមថ្មី លើទីតាំងចាស់ដដែល ហើយក៏បានយកព្រះនាងគង់ស៊ីអ៊ីម ខាងសាសនាចិន វៀតណាម គោរពបូជាមកដាក់ទៅវិញ មិនមែនជារូបសំណាក អ្នកតាខ្មែរនោះទេ ហើយរឿងនោះមិនសូវមានអ្នកណាបានដឹង ទើបមកបែកធ្លាយថ្មីៗនេះទេ។ ផ្ទុយការលើកឡើងខាងលើនេះ លោក ឃួន សៅរុំ អភិបាលស្រុកបរិបូរណ៍ បានបដិសេធថា លោកមិនបានដឹងរឿងហ្នឹងទេ គ្មានអ្នកណាមកសុំច្បាប់គាត់ជួសជុល ក៏មកសុំច្បាប់សាងសង់អាស្រមថ្មីក៏គ្មានដែរតែលោកនឹងឲ្យគេស្រាវជ្រាវក្នុងរឿងនេះ ឲ្យបានច្បាស់លាស់សិន ព្រោះអាជ្ញាធរខេត្តក៏ដឹងរឿងនេះដែរ។
ដោយឡែក លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំងវិញ បានបញ្ជាក់ថា លោកបានដឹងរឿងនេះកាលពី២ សប្តាហ៍មុន នៅពេលដែលប្រធានការិយាល័យវប្បធម៌ស្រុកយករឿងនេះមករាយការណ៍ លោកក៏បានឲ្យខាងស្រុក ស្រាវជ្រាវកសាងឯកសារមក ដើម្បីមានវិធានការតាមការងាររដ្ឋបាល។ លោកបានបញ្ជាក់ថា អ្នកធ្វើនេះគឺខុសទាំងស្រុងព្រោះ ទីនោះគឺជាអ្នកតា ដែលខ្មែរគោរពបូជាមិនមែនជាកន្លែងព្រះនោះទេ ចំណែករូបដែលយកទៅដាក់នោះក៏មិនមែនរូបសំណាកព្រះនាងគង់ស៊ីអ៊ីមដែរ តែជារូបយាយម្នាក់ដែលចិនវៀតណាមគោរពបូជា លោកក៏ស្គាល់មិនច្បាស់ដែរ តែពិតណាស់ថា គឺមិនមែនរូបព្រះនាមគង់ស៊ីអ៊ីមឡើយ។ សូមបញ្ជាក់ថា អ្នកតាកោះក្រញ៉ាន មិនមែនតែអ្នកក្នុងឃុំឆ្នុកទ្រូស្រុកបរិបូរណ៍ទេ ដែលទៅគោរពបូជា គឺមានអ្នកឃុំប្រឡាយមាស ស្រុកកំពង់លែង និងអ្នកផាត់សណ្តាយ ខេត្តកំពង់ធំ៕
ចែករំលែកព័តមាននេះ