រាជធានីភ្នំពេញ ៖ លោកយាយម្នាក់បានរបូតដៃធ្លាក់ពីជាន់ទី១ ទៅដីយ៉ាងអាណោចអាធ័ម ខណៈគាត់ហាត់ប្រាណ កាលពី វេលាម៉ោង៥និង៤០នាទីព្រឹក ថ្ងៃទី១៣ មីនា នៅចំណុចផ្ទះលេខ២៣៣E1 ផ្លូវលេខ២១៧ ក្រុមទី៥១ ភូមិទី១៧ សង្កាត់បឹងសាឡាង ខណ្ឌទួលគោក ។
លោកយាយដែលជួបគ្រោះថ្នាក់អាកុសលនេះត្រូវសមត្ថកិច្ចឱ្យដឹងថា ឈ្មោះរៀប លាប អាយុ៧២ឆ្នាំ មានលំនៅផ្ទះកើតហេតុខាងលើ ។ តាមព័ត៌មានឱ្យដឹងថា នៅព្រឹកថ្ងៃនោះលោកយាយរូបនេះបានក្រោកហាត់ប្រាណនៅយ៉មុខផ្ទះជាន់ទី១ តាមទំលាប់របស់គាត់ដែលក្រោកហាត់ប្រាណរាល់ព្រឹក ។ នៅពេលកំពុងហាត់ប្រាណ ស្រាប់តែងងឹតមុខដួលហើយកាន់បង្កាន់ដៃមិនជាប់ ក៏របូតធ្លាក់ពីលើផ្ទះជាន់ទី១ ទៅដល់ដី បណ្តាលឱ្យបោកក្បាលស្លាប់នៅនឹងកន្លែង ។
តាមព័ត៌មានឱ្យដឹងទៀតថា លោកយាយរូបនេះមានជំងឺលើសឈាម ហើយគាត់តែងតែក្រោកហាត់ប្រាណ ដើម្បីសុខភាព និងមិននឹកស្មានថា ពេលកំពុងហាត់ប្រាណក៏ងងឹតមុខធ្លាក់ស្លាប់បែបនេះ ។ សពត្រូវបានក្រុមគ្រួសារតំកល់ធ្វើបុណ្យតាមប្រពៃណីនៅនឹងលំនៅឋានតែម្តង៕
ចែករំលែកព័តមាននេះ