រាជធានីភ្នំពេញ ៖ បុរសម្នាក់ស្រវឹងស្រាបើករថយន្តបុករថយន្តដឹកសំរាម ដែលកំពុងឈប់ប្រមូលសំរាមតាមផ្លូវ បណ្តាលឲ្យរថយន្តខ្ទេចមួយកំណាត់មុខ បង្កឲ្យមានការភ្ញាក់ផ្អើលកាលពីវេលាម៉ោង០៩និង៥០នាទីយប់ ថ្ងៃទី១៣ ខែតុលា ឆ្នាំ២០១៧ នៅមុខវត្តទួលវិហារឃួន តាមបណ្តោយផ្លូវសហព័ន្ធរុស្ស៊ី ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។ រថយន្តបង្កម៉ាកហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ ២AD-៧៥២១ បើកបរដោយបុរសម្នាក់ក្នុងស្ថានភាពស្រវឹង ទិសដៅពីជើងទៅត្បូង ។ ចំណែករថយន្តដឹកសំរាមក្រុមហ៊ុន ស៊ីនទ្រី ពណ៌លឿង ក្បាលលេខ១៥៥ កំពុងឈប់ប្រមូលសំរាម ទិសដៅស្របគ្នា ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញរថយន្តដឹកសំរាមខាងលើកំពុងតែបើកប្រមូលសំរាម លុះបើកមកដល់ចំណុចកើតហេតុខាងលើ បានឈប់ឲ្យកម្មករនាំគ្នាប្រមូលសំរាមដាក់រថយន្ត ហើយដោយមានបើកភ្លើងស្តុបពណ៌ក្រហមនៅផ្នែកខាងក្រោយ និងផ្នែកខាងមុខ បន្ទាប់មកស្រាប់តែឃើញរថយន្តម៉ាកហាយឡែនឌ័រ ពណ៌ខ្មៅ បើកបរក្នុងទិសដៅពីជើងទៅត្បូងយ៉ាងលឿន ហើយបានជ្រុលទៅបុករថយន្តដឹកសំរាមពីក្រោយពេញទំហឹង បណ្តាលឲ្យរថយន្តបង្កខាងលើខូចផ្នែកខាងមុខ បែកធុងទឹកហូរប្រេងពេញផ្លូវ តែសំណាងល្អមិនប៉ះពាល់ដល់កម្មករកំពុងលើកសំរាមឡើយ ចំណែករថយន្តដឹកសំរាមវិញ មិនមានរងកាខូចខាតឡើយ ។
បើតាមសម្ដីអ្នកបើករថយន្តហាយឡែនឌ័រ បាននិយាយថា រថយន្តដឹកសំរាមខាងលើនេះ បានឈប់ប្រមូលសំរាមនៅកណ្តាលផ្លូវ ដោយមានបើកភ្លើង៣ជាប់ រហូតមិនដឹងថារថយន្តបើកទៅមុខ ឬក៏ឈប់ទេ ទើបរថយន្តគាត់បើកបុកពីក្រោយបែបនេះ ។ ចំណែកអ្នកតំណាងក្រុមហ៊ុនដឹកសំរាមវិញឲ្យដឹងថា រថយន្តគាត់ឈប់ប្រមូលមានបើកភ្លើងត្រឹមត្រូវ បែរជារថយន្តហាយឡែនឌ័របើកបុកពីក្រោយរថយន្តរបស់គាត់ សំណាងល្អហើយដែលមិនបានបុកបុគ្គលិករបស់គាត់រងរបួស ។
ក្រោយពេលកើតហេតុ រថយន្តដឹកសំរាមបានបើកចេញទៅប្រមូលសំរាមបន្តទៀត បន្ទាប់មកមានតំណាងចេញមកដោះស្រាយ និយាយថា ឲ្យម្ចាស់រថយន្តហាយឡែនឌ័រយករថយន្តទៅជួសជុលខ្លួនឯង ព្រោះរថយន្តនេះបើកបុករថយន្តដឹកសំរាមដោយខ្លួនឯង ។ ចំណែកម្ចាស់រថយន្តហាយឡែនឌ័រ បាននិយាយថា គាត់មិនចង់ទាមទារសំណងទេ ព្រោះកន្លងមកសូម្បីតែរថយន្តដឹកសំរាមបើកកៀររថយន្តរបស់គាត់ផង សងសំណងតែ២០ដុល្លារ អញ្ចឹងគាត់គ្រាន់តែសំណូមពរឲ្យ រថយន្តដឹកសំរាមមានដាក់ភ្លើងត្រឹមត្រូវតែប៉ុណ្ណោះ ៕
ចែករំលែកព័តមាននេះ