គ្រោះទឹកជំនន់អ្នកស្លា.ប់ឡើងដល់54នាក់ ខណៈភ្លើងឆេះព្រៃស្លា.ប់31នាក់
ទីភ្នាក់ងារគ្រប់គ្រងគ្រោះមហន្តរាយធម្មជាតិរាយការណ៍នាថ្ងៃទី១៣ តុលា ថា
សហរដ្ឋអាមេរិក-ប្រទេសវៀតណាម ៖ ទីភ្នាក់ងារគ្រប់គ្រងគ្រោះមហន្តរាយធម្មជាតិវៀតណាមរាយការណ៍នាថ្ងៃទី១៣ តុលា ថា ទឹកជំនន់ដែលរាតត្បាតប្រទេសវៀតណាមតាមតុល្យការថ្មី អ្នកស្លាប់ឡើងដល់៥៤នាក់ ហើយមនុស្ស៣៩នាក់បាត់ខ្លួននៅភាគខាងជើង និងភាគកណ្តាលប្រទេស ។
អាជ្ញាធរនិយាយថា ផ្ទះ៣១៧ខ្នងរងការបំផ្លាញដោយទឹកជំនន់ និងការបាក់ដី ហើយផ្ទះដល់៣៤.០០០ខ្នង ត្រូវទឹកលិច ឬរងការខូចខាត ។ សរុបផ្ទៃដីដាំដុះ២២.០០០ហិកតា ត្រូវទឹកលិច ហើយសត្វពាហនៈ១៨០.០០០ក្បាលត្រូវងាប់ ឬត្រូវទឹកនាំយកទៅបាត់ ។
ចំណែកនៅរដ្ឋកាលីហ្វ័រនីញ៉ាសហរដ្ឋអាេមរិកវិញ ភ្លើងឆេះព្រៃនៅតែខ្លាំងនៅតំបន់ដាំទំពាំងបាយជូរនាភាគខាងជើងរដ្ឋនេះ ដោយបណ្តាលឱ្យមនុស្សស្លាប់ឡើងដល់៣១នាក់ ហើយមនុស្សជិត៥០០នាក់បាត់ខ្លួន ។ ខ្យល់បោកបក់ខ្លាំងជាថ្មីគួបនឹងគ្រោះរាំងស្ងួតធ្វើឱ្យសភាពការណ៍កាន់តែធ្ងន់ធ្ងរ ។ ផ្ទៃដីមានព្រៃឈើប្រមាណ៧៧.០០០ហិកតា រងការបំផ្លាញដោយអណ្តាតភ្លើងចាប់តាំងពីថ្ងៃទី៨ តុលា មក ។ ផ្ទះ និងសំណង់ផ្សេងៗប្រមាណជា៣.៥០០ក្លាយទៅជាផេះដោយអណ្តាតភ្លើង ។
លោក ROB GIORDANO ប្រមុខប៉ូលិសតំបន់ SONOMA ចម្ងាយ១០០គីឡូម៉ែត្រខាងជើងក្រុងសាន់ហ្វ្រាន់ស៊ីស្កូគូសបញ្ជាក់ថា មនុស្សជាង៤០០នាក់បាត់ខ្លួន ។ គេពុំដឹងថា មកដល់ពេលនេះ ពួកគេត្រូវរងគ្រោះដោយអណ្តាតភ្លើង ឬក៏ពុំបានទាក់ទងជាមួយអាជ្ញាក្រោយរត់ចេញពីផ្ទះឡើយ ៕
ចែករំលែកព័តមាននេះ