វាលស្មៅមុខកសិន្ធុប្រាសាទ អ្នកណាក៏សរសើរដែរ ដឹងថានៅណាអត់
ខេត្តសៀមរាប ៖ មហាជនអបអរសាទរ ចំពោះអាជ្ញាធរជាតិអប្សរាដែលរៀបចំវាលស្មៅឱ្យមានភាពស្រស់ត្រកាល ដោយបញ្ឈប់ការ
ខេត្តសៀមរាប ៖ មហាជនអបអរសាទរ ចំពោះអាជ្ញាធរជាតិអប្សរាដែលរៀបចំវាលស្មៅនៅមុខកសិន្ធុប្រាសាទអង្គរ ឱ្យមានភាពស្រស់ត្រកាល ដោយបញ្ឈប់ការជួលកន្ទេល អង្រឹង និងលក់គ្រឿងបរិភោគដល់អ្នកដើរកម្សាន្ត ។
ជាលទ្ធផលវាលស្មៅផ្នែកខាងលិចនៃកសិន្ធុប្រាសាទអង្គរវត្ត ហាក់កំពុងបង្អួតសម្រស់បៃតងស្រស់ស្រងាត់ដល់ភ្ញៀវទេសចរគួរឱ្យចង់គយគន់ និងស្រូបយកខ្យល់អាកាសបរិសុទ្ធ ។
ការរៀបចំនោះបានទទួលការគាំទ្រជាខ្លាំងពីសាធារណជន ជាក់ស្តែងលោករិទ្ធ ជាងថតរូបនៅប្រាសាទអង្គររយៈពេល២ឆ្នាំមកហើយនិយាយថា ការរៀបចំវាលស្មៅមិនឱ្យមានការលក់ដូរម្ហូបអាហារ ជួលកន្ទេល អង្រឹងនៅមុខកសិន្ធុប្រាសាទអង្គរវត្ត គឺល្អណាស់ ព្រោះវាមិនមានសំរាមរាយប៉ាយ មិនមានក្លិនឆ្អេះឆ្អាប មិនមានសំឡេងធុងបាស់ និងផឹកស៊ីឡូឡា ពិសេសគឺរក្សាបាននូវទេសភាពស្អាតពេលថតរូប ។
លោកសារ៉ាវី មគ្គុទ្ទេសក៍ភាសាអង់គ្លេស បញ្ចេញមតិថា ការបញ្ឈប់មិនឱ្យមានការលក់ដូរម្ហូបអាហារ ជួលកន្ទេល អង្រឹងនៅលើវាលស្មៅជាការល្អ ព្រោះប្រជាជនខ្មែរភាគច្រើនមិនសូវយល់ដឹងពីបរិស្ថាន ពិសេសពេលរដូវបុណ្យទាន ឬទៅលេងកម្សាន្តអង្គរ ពួកគាត់តែងចោលសំរាមពេញនៅលើវាលស្មៅពេលបរិភោគរួច ឯអ្នកលក់ក៏សម្អាតមិនអស់បន្សល់កាកសំណល់ដែលនាំឱ្យប៉ះពាល់ជាខ្លាំងដល់សោភ័ណភាព និងបរិស្ថាន ។ លើសពីនោះគ្រឿងបំពងសំឡេង ការទទួលទានគ្រឿងស្រវឹងនៅតំបន់ប្រាសាទបុរាណបានប៉ះពាល់ដល់កេរ្តិ៍ឈ្មោះនៃតំបន់បេតិកភណ្ឌដ៏ល្បីល្បាញលើពិភពលោក និងមិនសមជាកន្លែងសក្ការៈបូជាពីបុរាណ ហើយភ្ញៀវទេសចរក៏ធ្លាប់រិះគន់ទាំងបញ្ហាបរិស្ថាន និងអំពើមិនសមរម្យបែបនេះដែរ ។ លោកបានសំណូមពរទាំងអាជ្ញាធរពាក់ព័ន្ធគួររកកន្លែងថ្មីសម្រាប់ម្ចាស់អាជីវកម្ម និងសូមឱ្យអាជីវករ គួរគិតផលប្រយោជន៍ជាតិជាធំ កុំគិតតែប្រយោជន៍ផ្ទាល់ខ្លួន ហើយរួមគ្នាថែរក្សាអង្គរទាំងអស់គ្នា ។
ចំណែកអ្នកស្រីសុខុម នៅភូមិបន្ទាយចាស់ សង្កាត់ស្លក្រាម ក្រុងសៀមរាប មិនជំទាស់ទេ ចំពោះការបញ្ឈប់ការលក់ដូរម្ហូបអាហារ ការជួលអង្រឹង កន្ទេលនៅលើសួនស្មៅ ព្រោះបើអត់មានអ្នកមកហូបចុក វាលស្មៅនេះក៏ស្អាតម្យ៉ាងដែរ ហើយបើអត់ពីកន្លែងនេះគាត់ក៏អាចលក់ចល័តទៅកន្លែងផ្សេងដែរ ។
អ្នកស្រីចា ប្រឹហ្វ ទេសចរជនជាតិអាមេរិកនិយាយថា នេះជាដំណើរកម្សាន្តលើកទី១នៅប្រទេសកម្ពុជា ហើយចាប់អារម្មណ៍ខ្លាំងណាស់ចំពោះភាពល្បីល្បាញនៃប្រាសាទអង្គរវត្ត ពិសេសភាពមហិមានៃសំណង់ប្រាសាទអង្គរវត្តពិតជាអស្ចារ្យ ។ លើសពីនេះអ្នកស្រីពិតជាស្រស់ស្រាយចំពោះភាពស្រស់ស្អាតនៃសោភ័ណភាពនៅប្រាសាទអង្គរ និងភាពរួសរាយរបស់ប្រជាជនខ្មែរ ៕
ចែករំលែកព័តមាននេះ