ទំនប់ទឹកពុំគួរឱ្យចាប់អារម្មណ៍ តែពេលនេះផ្អើលភ្លូកទឹកភ្លូកដីមក
ខេត្តកំពង់ចាម ៖ ទំនប់៥កុម្ភៈ នៅក្រោយវត្តទួលឡូវ ពីមុនមានកំប្លោកច្រើនមិនមានអ្នកណាចាប់អារម្មណ៍ទេ តែក្រោយស្រាប់តែ
ខេត្តកំពង់ចាម ៖ ទំនប់៥កុម្ភៈ នៅក្រោយវត្តទួលឡូវ ក្នុងភូមិថ្នល់បែក ឃុំស្វាយទាប ស្រុកចំការលើ ខេត្តកំពង់ចាម ពីមុនមានកំប្លោកច្រើនមិនមានអ្នកណាចាប់អារម្មណ៍ទេ តែក្រោយពីអាជ្ញាធរស្រុក ចៅអធិការវត្ត និងមន្ទីរទេសចរណ៍ខេត្ត កែច្នៃទៅជាកន្លែងទេសចរណ៍មក ទាក់ទាញអ្នកទេសចរទៅលេងកម្សាន្ត ។
តំណាងអ្នកជួលទូកសម្រាប់ជិះកម្សាន្តកញ្ញារុន ពិសី អាយុ១៩ឆ្នាំ ឲ្យដឹងកាលពីពេលថ្មីៗកន្លងមកថា កាលពីមុននៅក្រោយវត្តទួលឡូវ មានទំនប់ និងកំប្លោកច្រើន ដូច្នេះអ្នកធ្វើដំណើរកាត់តាមមុខវត្ត គឺទៅហួសមកហួស ។ ដោយសារតែពិនិត្យឃើញលក្ខណៈភូមិសាស្ត្រអំណោយផលល្អ ទើបលោកខ្លូត ចិន្តា អភិបាលស្រុកចំការលើ និងស្ថាប័នពាក់ព័ន្ធបានប្រែក្លាយទៅជាកន្លែងទេសចរណ៍មួយ ដោយសារមានទឹកទំនប់លាតសន្ធឹងធំ ។
ចាប់ពីខែមីនា ឆ្នាំ២០១៧ រហូតមកដល់សព្វថ្ងៃនេះរៀបចំឲ្យមានអាហារដ្ឋានជាច្រើន ព្រមទាំងទូកសម្រាប់ជិះកម្សាន្ត ។ នៅអំឡុងបុណ្យអកអំបុក សំពះព្រះខែខាងមុខ អាជ្ញាធរនឹងរៀបចំប្រណាំងទូកង ដើម្បីឲ្យមហាជនទស្សនាកម្សាន្ត ។ កាលពីអំឡុងបុណ្យភ្ជុំបិណ្ឌកន្លងទៅមហាជនច្រើនកុះករទៅកម្សាន្តនៅរមណីយដ្ឋាន៥កុម្ភៈ ។
ស្ត្រីឈ្មោះឈុន ហ៊ាង អាយុ៦៣ឆ្នាំ នៅភូមិថ្នល់បែក ឃុំស្វាយទាប ឱ្យដឹងថា គាត់លក់ដូរនៅកន្លែងទេសចរណ៍កែច្នៃ៥កុម្ភៈតាំងពីថ្ងៃទី៧ កក្កដា ២០១៧ មក ដោយរៀបចំធ្វើកន្លែងលក់ប្រក់ស័ង្កសី និងសម្រាកនៅទីនេះរាល់យប់ ។ អំឡុងបុណ្យភ្ជុំបិណ្ឌកន្លងទៅមានមនុស្សទៅលេងច្រើនកុះករ ដូច្នេះហើយគាត់លក់ដូរនំចំណីដាច់ ទទួលបានប្រាក់ចំណូលសម្រាប់ដោះស្រាយជីវភាពគ្រួសារ ។
ស្ត្រីខ្មែរអ៊ិស្លាមម្នាក់រស់នៅឃុំស្ពឺ ស្រុកចំការលើនិយាយថា កន្លងមកពេលធ្វើដំណើរឆ្លងកាត់តំបន់៥កុម្ភៈមិនមានអ្វីដែលគួរឲ្យចាប់អារម្មណ៍ទេ លុះពេលអាជ្ញាធររៀបចំមក ពិតជាស្អាតគួរឱ្យចង់ចូលលេងកម្សាន្ត ៕
ចែករំលែកព័តមាននេះ