នាំគ្នាមកឈរចោមមើលទីកន្លែងមរណៈដែលគួរឱ្យខ្លាច
រាជធានីភ្នំពេញ ៖ មេគោផើម១ក្បាលក្នុងចំណោម៣ក្បាលបានប្រកាច់ងាប់ភ្លាមៗ
រាជធានីភ្នំពេញ ៖ មេគោផើម១ក្បាលក្នុងចំណោម៣ក្បាលបានប្រកាច់ងាប់ភ្លាមៗ
រាជធានីភ្នំពេញ ៖ មេគោផើម១ក្បាលក្នុងចំណោម៣ក្បាលបានប្រកាច់ងាប់ភ្លាមៗ ខណៈដែលគោទាំងនោះដើរកាត់ទឹកដែលដក់នៅជាប់នឹងបង្គោលភ្លើង១ដើម ក្រោយពេលមានភ្លៀងធ្លាក់មួយមេ កាលពីវេលាម៉ោង៨និង៣០នាទីព្រឹកថ្ងៃទី១២ តុលា នៅចំណុចបង្គោលលេខ P1-493 តាមផ្លូវលំជាប់របងវត្តភ្នៀតសម្ពលី ស្ថិតនៅក្នុងភូមិអង្គរជ័យ សង្កាត់ស្នោ ខណ្ឌពោធិ៍សែនជ័យ ។
អ្នកភូមិដែលបានឃើញហេតុការណ៍នាំគ្នាភ្ញាក់ផ្អើល និងបាននិយាយថា មេគោ១ក្បាលខាងលើនោះផើម ជិតដល់ពេលកើតកូនទៅហើយ វាមានទម្ងន់ប្រមាណជា១០០គីឡូក្រាម ដែលមានម្ចាស់ឈ្មោះរ៉ន អាយុជាង៤០ឆ្នាំ មានទីលំនៅក្នុងភូមិស្កុលក្រស្នា សង្កាត់ស្នោ ខណ្ឌពោធិ៍សែនជ័យ។ នៅមុនពេលកើតហេតុ ម្ចាស់គោបានលែងមេគោរបស់ខ្លួនឱ្យទៅដើរស៊ីស្មៅជាមួយនឹងគោ១ហ្វូងផ្សេងទៀត ដែលជារបស់អ្នកភូមិជាមួយគ្នា ហើយពួកវាបានដើរស៊ីស្មៅនៅក្រៅភូមិរហូតទៅដល់ចំណុចកើតហេតុនោះ ដែលមានចម្ងាយផ្លូវប្រហែលជាង២គីឡូម៉ែត្រ ។ ចំណែកម្ចាស់មិនបានតាមឃ្វាលគោនោះទេ ដែលជារៀងរាល់ថ្ងៃគឺបានលែងចោលនៅវេលាព្រឹក ។ លុះដល់ពេលល្ងាចគោខ្លះបានដើរទៅរកផ្ទះដោយខ្លួនវា និងគោខ្លះទៀតអត់ទៅទេក្រាញនៅវាលស្រែ រហូតទាល់តែម្ចាស់តាមទៅដេញទើបគោទាំងនោះតម្រង់មកផ្ទះ ។
ប្រភពដដែលបានបន្តទៀតថា លុះពេលទៅដល់ត្រង់ចំណុចកើតហេតុនោះ មេគោផើម១ក្បាលខាងលើបានដើរឆ្លងកាត់ទឹកថ្លុកដែលដក់តាមផ្លូវនៅជាប់នឹងបង្គោលភ្លើងមួយដើម ក្រោយពេលមានភ្លៀងធ្លាក់កាលពីវេលាល្ងាចថ្ងៃទី១១ តុលា ក៏ស្រាប់តែដួលប្រកាច់ងាប់ភ្លាមមួយរំពេច ។ ខណៈនោះមិនមាននរណាបានដឹងពីមូលហេតុថា នៅទីនោះមានឆ្លងចរន្តអគ្គិសនីឡើយ ដោយម្នាក់ៗនឹកស្មានថា មេគោផើម១ក្បាលនោះមានជំងឺដួលងាប់ដោយខ្លួនវាប៉ុណ្ណោះ សូម្បីតែម្ចាស់គោក៏ស្មានដូចគ្នាដែរថាគោឈឺ។ បន្ទាប់មកម្ចាស់គោបានលក់ទៅឲ្យឈ្មួញក្នុងតម្លៃត្រឹមតែ៦០ម៉ឺនរៀលប៉ុណ្ណោះ ដែលគោនោះបើលក់ឲ្យស្រួលបួលអាចបានតម្លៃជាង២លានរៀលឯណោះ ប៉ុន្តែដោយស្មានថាគោឈឺងាប់ទើបលក់បានថោកបែបនេះ ។
ប្រភពខាងលើបានបន្តទៀតថា លុះក្រោយពេលត្រូវរ៉ូវតម្លៃគ្នាហើយ ឈ្មួញបានចាប់ទាញខ្សែកន្លុះគោអូសចេញផុតពីកន្លែងកើត ហេតុរួច លើកដាក់រ៉ឺម៉កម៉ូតូដឹកចេញ ទើបមិនបណ្ដាលឲ្យឆក់ ។ ប្រភពបន្តថា បន្តិចក្រោយមកមានគោ២ក្បាលទៀតបានដើរកាត់ទីនោះ ស្រាប់តែត្រូវបានចរន្តអគ្គិសនីឆក់ប្រកាច់ទៀត ប៉ុន្តែគោទាំងនោះបានស្ទុះលោតចេញរួច ទើបធ្វើឲ្យមានការសង្ស័យថានេះជាបង្គោលមរណៈ ។ ពេលនោះពួកអ្នកចោមមើលបាននាំគ្នាចាប់កូនកង្កែប១ក្បាលបោះចូលទៅក្នុងទឹកថ្លុកនោះ ស្រាប់តែឆក់ងាប់ត្រង់ជើងភ្លឹងមួយរំពេច ទើបដឹងថាទឹកនោះឆ្លងចរន្តអគ្គិសនីចេញពីបង្គោលភ្លើងលេខ P1-493 យ៉ាងពិតប្រាកដ ហើយក៏បានទាក់ទងទៅនគរបាលឲ្យជួយរាយការណ៍បន្តទៅកាន់មន្ត្រីអគ្គិសនីកម្ពុជាចុះទៅពិនិត្យ ។
បើតាមអ្នកស្រុកបាននិយាយថា មុនពេលឆក់គោងាប់ មានឆ្កែ១ក្បាលរបស់ព្រះសង្ឃនៅក្នុងវត្តភ្នៀតសម្ពលីនោះរត់កាត់ទឹកថ្លុកខាងលើ ក៏ត្រូវបានចរន្តអគ្គិសនីឆក់ដែរ ប៉ុន្តែមិនងាប់ទេ ដោយឆ្កែនោះស្ទុះរត់និងស្រែកយ៉ាងខ្លាំង តែពួកគាត់មិនបានចាប់អារម្មណ៍ថា មានចរន្តអគ្គិសនីឆក់បែបហ្នឹងទេ ។ លុះពេលឆក់គោងាប់និងបោះកង្កែបពិសោធន៍មើល ទើបដឹងច្បាស់គឺពិតជាបង្គោលមរណៈមែន។
ទាក់ទងនឹងការឆ្លងចរន្តនេះមន្ត្រីនគរបាលបានឲ្យដឹងថា ក្រោយពេលប្រជាពលរដ្ឋរាយការណ៍មក កម្លាំងបានចុះទៅពិនិត្យមើល ប៉ុន្តែមេគោ១ក្បាលដែលងាប់នោះត្រូវបានម្ចាស់យកចេញពីកន្លែងកើតហេតុបាត់ហើយ ពេលនោះនគរបាលបានដាក់របាំងការពារមិនឲ្យអ្នកដំណើរឆ្លងកាត់ត្រង់ចំណុចនោះ ជាពិសេសក្មេងៗសិស្សសាលា ដែលស្ថិតនៅក្បែរនោះខ្លាចមានគ្រោះថ្នាក់។ បន្ទាប់មកបានជូនដំណឹងទៅខាងមន្ត្រីអគ្គិសនីកម្ពុជាឲ្យទៅពិនិត្យមើល រហូតដល់វេលាម៉ោង១២ថ្ងៃត្រង់ថ្ងៃដដែលទើបមន្ត្រីអគ្គិសនីទៅដល់ពិនិត្យឃើញថា បង្គោលភ្លើងមួយដើមខាងលើពិតជាមានការឆ្លងចរន្តប្រាកដមែន រួចបានផ្ដាច់ចរន្តភ្លើងជាបណ្ដោះអាសន្ន រង់ចាំការជួសជុលកែលម្អឡើងវិញនៅពេលបន្ទាប់ ហើយផ្លូវនោះក៏ត្រូវបានបើកឲ្យធ្វើចរាចរណ៍ឡើងវិញផងដែរ ។ នេះមិនមែនជារឿងថ្មីទេដែលគោដើរស៊ីស្មៅក្បែរបង្គោលភ្លើងឆក់ងាប់បែបនេះ គឺកើតមានជាច្រើនមកហើយ ៕
ចែករំលែកព័តមាននេះ