ក្រោយលោក សាម អ៊ីន និងលោក សែម ហាក់ ចាកចេញ គណបក្សប្រជាធិបតេយ្យមូលដ្ឋាន បង្ហាញអ្នកជំនួសថ្មី
- ភ្នំពេញ
ភ្នំពេញ៖ គណបក្សប្រជាធិបតេយ្យមូលដ្ឋាន ដែលមានលោក យ៉េង វីរៈ ជាប្រធាន បានប្រកាសពីការសម្រេចជ្រើសតាំង៖ ១. លោក សេក…
ភ្នំពេញ៖ គណបក្សប្រជាធិបតេយ្យមូលដ្ឋាន ដែលមានលោក យ៉េង វីរៈ ជាប្រធាន បានប្រកាសពីការសម្រេចជ្រើសតាំង៖ ១. លោក សេក សុខា ជាប្រធានគណៈកម្មាធិការនាយកស្តីទី ជំនួសលោក សាម អ៊ីន និង២. លោក វ៉ៃ ឡងឌី ជាអគ្គលេខាធិការ ជំនួសលោក សែម ហាក់។
លោក សាម អ៊ីន និងលោក សែម ហាក់ បានចាកចេញពីគណបក្សប្រជាធិបតេយ្យមូលដ្ឋាន ទៅចូលរួមនយោបាយជាមួយគណបក្សប្រជាជនកម្ពុជា។ ក្នុងនោះ លោក សាម អ៊ីន ដែលមានសញ្ញាបត្របណ្ឌិតផ្នែកព្រៃឈើ មកពីអាល្លឺម៉ង់ ត្រូវបានតែងតាំងជារដ្ឋលេខាធិការក្រសួងបរិស្ថាន។ រីឯលោក សែម ហាក់ ត្រូវបានតែងតាំងជាអនុរដ្ឋលេខាធិការក្រសួងបរិស្ថាន។
សូមរម្លឹកថា កាលពីចុងខែវិច្ឆិកា ឆ្នាំ២០២២ លោកបណ្ឌិត ខាងកសិកម្ម យ៉ង់ សាំងកុមារ ជាអតីតប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បានទៅចូលរួមនយោបាយជាមួយគណបក្សប្រជាជនកម្ពុជា។ លោកបណ្ឌិត យ៉ង់ សាំងកុមារ ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
គណបក្សប្រជាធិបតេយ្យមូលដ្ឋាន ត្រូវបានបង្កើតឡើង កាលពីឆ្នាំ២០១៥ ដោយមេដឹកនាំអង្គការសង្គមស៊ីវិលមួយចំនួន រួមមាន លោក យ៉េង វីរៈ លោក យ៉ង់ សាំងកុមារ លោក កែម ឡី និងលោក សាម អ៊ីន ជាដើម។ គណបក្សប្រជាធិបតេយ្យមូលដ្ឋាន បានចូលរួមការបោះឆ្នោតឃុំសង្កាត់ ឆ្នាំ២០១៧ ការបោះឆ្នោតជាតិ ឆ្នាំ២០១៨ រួមទាំងការបោះឆ្នោតឃុំសង្កាត់ ឆ្នាំ២០២២៕
ចែករំលែកព័តមាននេះ