ពលរដ្ឋខ្មែរចាប់ផ្ដើមគាំទ្រផលិតផលក្នុងស្រុកកាន់តែខ្លាំងឡើង
រាជធានីភ្នំពេញ ៖ ខណៈដែលក្ដីព្រួយបារម្ភពីសុវត្ថិភាពចំណីអាហារកាន់តែខ្លាំងនោះ ប្រជាពលរដ្ឋខ្មែរ ពិសេស
រាជធានីភ្នំពេញ ៖ ខណៈដែលក្ដីព្រួយបារម្ភពីសុវត្ថិភាពចំណីអាហារកាន់តែខ្លាំងនោះ ប្រជាពលរដ្ឋខ្មែរ ពិសេសអ្នករស់នៅទីប្រជុំជនបានចាប់ផ្ដើមងាកមកប្រើប្រាស់ផលិតផលក្នុងស្រុកកាន់តែកើនឡើងគួរឲ្យកត់សម្គាល់ ។ ជាក់ស្ដែង ផ្សារលក់ផលិតផលក្នុងស្រុកមួយនៅខេត្តកំពត ដែលទើបបើកសម្ពោធដំណើរការកាលពីចុងខែកញ្ញា ពេលនេះ ទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋនៅក្នុងតំបន់ ហើយអ្វីគួរឲ្យកត់សម្គាល់នោះ អ្នកដែលធ្លាប់ទៅទិញម្ហូបអាហារនៅផ្សារធំៗ បានងាកមករកផលិតផលនៅផ្សារទើបបង្កើតថ្មីនេះ ។
លោក ចាន់ ស៊ីថា អគ្គនាយកក្រុមហ៊ុនង៉ូវ ហេង និងជាម្ចាស់ផ្សារង៉ូវហេងក្នុងខេត្តកំពតបានឱ្យដឹងថា ចាប់តាំងពីផ្សារបានបើកដំណើរការមកឃើញថា ប្រជាពលរដ្ឋបានគាំទ្រច្រើនពីមួយថ្ងៃទៅមួយថ្ងៃ ព្រោះផ្សារនេះ ជាផ្សារដែលដាក់តាំងលក់តែផលិតផលខ្មែរសុទ្ធសាធ និងមានការធានាពីសុវត្ថិភាពចំណីអាហារជូនអតិថិជន ។
លោកថា ៖« តាំងពីយើងបើកដំណើរការ យើងយកតែផលិតផលខ្មែរសុទ្ធសាធមកដាក់លក់ ដូចជា ផលិតផលជលផលសមុទ្រ និងផលិតផលផ្សេងៗទៀត » ។
លោកបន្តថា ក្រៅពីផលិតផលដែលផលិតនៅក្នុងខេត្តកំពត ផ្សារមួយនេះ ក៏ទទួលយកពីបណ្ដាខេត្តផ្សេងទៀតមកដាក់លក់ផងដែរ ក៏ប៉ុន្តែត្រូវទាមទារឱ្យមានការវេចខ្ចប់បានស្អាត ធានាពីគុណភាព និងសុវត្ថិភាពដល់អ្នកបរិភោគ។ ម្យ៉ាងទៀត ផ្សារនេះក៏ដើរតួនាទីសំខាន់ផងដែរក្នុងការផ្សព្វផ្សាយពីផលិតផលខ្មែរ។ ជាក់ស្ដែង ផលិតផលដែលបានយកមកដាក់លក់ មានផលិតផលខ្លះ អតិថិជនមិនទាន់បានស្គាល់ ប៉ុន្តែជាផលិតផលដែលទទួលបានលិខិតបញ្ជាក់ស្តង់ដាត្រឹមត្រូវពីអង្គការសុវត្ថិភាព ចំណីអាហារ និងក្រសួងពាក់ព័ន្ធជាច្រើនទៀតផងដែរ ។
លោក ស៊ីថា បានបន្តទៀតថា ថ្វីដ្បិតតែប្រជាពលរដ្ឋមួយចំនួនបានគាំទ្ររួចហើយទៅលើផ្សារលក់ផលិតផលខ្មែរសុទ្ធសាធមែន ក៏ប៉ុន្តែផ្សារនេះក៏មិនទាន់ទាក់ទាញប្រជាពលរដ្ឋនៅឆ្ងាយពីទីតាំងបានច្រើនប៉ុន្មានដែរ ។ ដូចនេះ លោកត្រូវការផ្សព្វផ្សាយបន្ថែមទៀត ដើម្បីឱ្យព័ត៌មាននេះបានទៅដល់អ្នកនៅឆ្ងាយៗ ។
លោកបណ្ឌិត យ៉ង សាំងកុមារ បានឱ្យដឹងថា ការបង្កើតផ្សារលក់តែផលិតផលខ្មែរសុទ្ធសាធ គឺជាកត្តាល្អប្រសើរមួយដែលអាចជួយទាំងកសិករ និងអ្នកបរិភោគ ក៏ប៉ុន្តែអ្វីដែលម្ចាស់ផ្សារ ឬអ្នកគ្រប់គ្រងត្រូវធ្វើនោះ គឺត្រូវធានាពីសុវត្ថិភាពផលិតផលដែលដាក់លក់ជូនអ្នកទិញយកទៅបរិភោគ និងប្រាកដថា ផលិតផលទាំងនោះមានសុវត្ថិភាព ។
លោកថា ៖« បើសិនជាមានទីតាំងលក់ផលិតផលខ្មែរច្បាស់លាស់ អ្នកផលិតនឹងមានទឹកចិត្តក្នុងការផលិតសម្រាប់ផ្គត់ផ្គង់ ហើយអ្នកបរិភោគ ក៏មិនញញើតនឹងបរិភោគ ហើយក៏មិនព្រួយពីការនាំចូលពីប្រទេសជិតខាង » ។
លោកបន្តថា បើសិនជាមានផ្សារលក្ខណៈបែបនេះកាន់តែច្រើននៅតាមខេត្តផ្សេងៗទៀតនោះ វាពិតជាល្អសម្រាប់កសិករ ហើយពួកគាត់ក៏មានទីផ្សារច្បាស់លាស់មួយ ។ ជាក់ស្ដែង ផ្សារនៅខេត្តកំពត គឺជាផ្សារមួយដែលអាចឲ្យកសិករ និងប្រជានេសាទយកផលិតផលមកលក់បានស្រួល ហើយអ្នកទិញក៏ងាយស្រួលស្វែងរកផលិតផលរបស់ខ្មែរ ដែលមានប្រភពផលិតចេញពីក្នុងស្រុក ។
អភិបាលខេត្តកំពតលោក ចាន់ ជេស្តា បានសម្តែងការស្វាគមន៍ចំពោះវត្តមាននៃផ្សារ មួយនេះ ហើយបានបង្ហាញជំនឿថា នឹងជួយ បង្កើតការងារ និងប្រាក់ចំណូលបន្ថែមជូនប្រជាពលរដ្ឋ ព្រមទាំងបង្កើនសកម្មភាពពាណិជ្ជកម្មនៅក្នុងខេត្តកំពតឲ្យកាន់តែមានកំណើនថែមទៀត ។
គួររំឭកថា ផ្សារមួយនេះ ត្រូវបានបង្កើតឡើងក្រោមហិរញ្ញប្បទានរបស់គម្រោងជលផលសមុទ្រនៃកម្មវិធីពិពិធកម្ម និងពង្រីកការនាំចេញកម្ពុជា (CEDEP II) ដំណាក់កាលទី២ ក្នុងទំហំទឹកប្រាក់៥ពាន់ដុល្លារអាមេរិក ដែលមាននាយកដ្ឋានសហប្រតិបត្តិការអន្តរជាតិនៃក្រសួងពាណិជ្ជកម្ម ជាអ្នកសម្របសម្រួល និងអនុវត្តដោយអភិវឌ្ឍន៍វិស័យឯកជន សហការជាមួយអង្គការសហប្រជាជាតិអភិវឌ្ឍន៍ឧស្សាហកម្ម (UNIDO) ។
បច្ចុប្បន្ននេះ កម្ពុជាបាននាំចូលផលិតផលពីប្រទេសជិតខាងក្នុងទំហំច្រើន។ ជាក់ស្ដែង ត្រីសាច់ បន្លែ និងផ្លែឈើ ដែលដាក់លក់នៅតាមផ្សារនានា ភាគច្រើនជាផលិតផលនាំចូលពីថៃ វៀតណាម ចិន និងបណ្ដាប្រទេសផ្សេងៗទៀត។ ក្នុងនោះ គ្រាន់តែបន្លែមួយមុខ កម្ពុជាបាននាំចូលប្រមាណ៥៦%នៃតម្រូវការសរុបក្នុងស្រុក ដោយបានផ្គត់ផ្គង់នៅរាជធានីភ្នំពេញ ប្រមាណពី២០០ទៅ៣០០តោនក្នុង១ថ្ងៃ ៕
ចែករំលែកព័តមាននេះ