សមត្ថកិច្ច៖ ព្រួញ១ពិតជាបា.ញ់បានសត្វ២មែន!
រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងសមត្ថកិច្ចចម្រុះដាក់គោលដៅ ត្រួតពិនិត្យជាតិផ្ទុះ
រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងសមត្ថកិច្ចចម្រុះដាក់គោលដៅ ត្រួតពិនិត្យជាតិផ្ទុះ និងច្បាប់ចរាចរណ៍ បានឃាត់ខ្លួនយកទៅសាកសួរ បន្ទាប់ពីចែកឆែករកឃើញថ្នាំញៀនប្រភេទក្រាមពណ៌សថ្លា ចំនួន៦កញ្ចប់តូច ហេតុការណ៍ឃាត់ខ្លួននេះ បានធ្វើឡើងនៅវេលាម៉ោង៨ និង៣០នាទី យប់ថ្ងៃទី១២ ខែតុលា ឆ្នាំ២០១៧ នៅចំណុចលូប្រាំ ផ្លូវវេងស្រេង ភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ។ ជនសង្ស័យមានឈ្មោះ ឌិម លីហេង ភេទប្រុស អាយុ៣០ឆ្នាំ មុខរបបរជាងផ្សារដែក ស្នាក់នៅ កន្លែងធ្វើការ សង្កាត់បឹងទំពុន ខណ្ឌមានជ័យ។
តាមសម្តីលោក ហួរ ម៉េងវ៉ាង អធិការរងទទួលបន្ទុកនគរបាលយុត្តិធម៌ បានឲ្យដឹងថា មុននឹងឈានទៅដល់ការឃាត់ខ្លួនជនសង្ស័យម្នាក់នេះបាន គឺកម្លាំង នៃគណៈបញ្ជាការឯកភាព ខណ្ឌមានជ័យ ដឹកនាំដោយលោក មា សុភាព អភិបាលរង ជួសមុខឲ្យលោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ បានដឹកនាំកម្លាំងចុះ បានដាក់គោលដៅ ត្រួតពិនិត្យអាវុធជាតិផ្ទុះ និងច្បាប់ចរាចរណ៍ជើងគោក នៅចំណុចស្តុបលូប្រាំ ផ្លូវវេងស្រេង សង្កាត់ស្ទឹងមានជ័យ៣ ខណ្ឌមានជ័យ។ ខណៈនោះក៏ស្រាប់តែមានបុរសម្នាក់ បានជិះម៉ូតូម៉ាកសង់ប៊ិច ពណ៌ខ្មៅ មួយគ្រឿង បានធ្វើដំណើរតាមផ្លូវវេងស្រេង ក្នុងទិសដៅពីលិចទៅកើត ឆ្លងកាត់គោលដៅត្រួតពិនិត្យរបស់កម្លាំងសមត្ថកិច្ច។
ដោយឃើញ បុរសម្នាក់នោះជិះម៉ូតូអត់ពាក់មួកសុវត្ថិភាព និងអត់កញ្ចក់ កម្លាំងបានហៅឲ្យឈប់ រួចហើយសុំធ្វើការត្រួតពិនិត្យ និងឆែកឆេរ ស្រាប់តែរកឃើញនូវសារធាតុញៀនចំនួន៦កញ្ចប់តូច ដែលបុរសម្នាក់នោះបានលាក់ទុកក្នុងម៉ូតូ។ ដោយឃើញសភាពបែបនេះ កម្លាំងសមត្ថកិច្ចបាននាំខ្លួនជនសង្ស័យរូបនោះយកទៅសាកសួរនៅប៉ុស្តិ៍នគរបាលស្ទឹងមានជ័យ។ នៅចំពោះមុខសមត្ថកិច្ចជនសង្ស័យបានសារភាពថា រូបគេពិតជាបានទិញថ្នាំញៀននេះនៅម្តុំរោងចក្រ៦ជាន់ ស្ថិតនៅសង្កាត់ចោមចៅ ខណ្ឌពោធ៍សែនជ័យ ក្នុងចំនួន៦កញ្ចប់តូច តម្លៃ១២ម៉ឺនរៀល ហើយគោលបំណងយកទៅប្រើប្រាស់ជាមួយនឹងមិត្តភក្តិ ក៏ត្រូវសមត្ថកិច្ចឃាត់ខ្លួនតែម្តង។ ក្រោយពេលកើតហេតុ បន្ទាប់ពីសាកសួរួច ជនសង្ស័យ ព្រមទាំងវត្ថុតាំង ត្រូវបានសមត្ថកិច្ចកសាងសំណុំរឿង បញ្ជួនខ្លួនទៅអធិការដ្ឋានខណ្ឌមានជ័យដើម្បីចាត់ការបន្តតាមនីតិវិធី៕
ចែករំលែកព័តមាននេះ