សំណាងហើយគោឆ្លងកាត់ ចុះបើមនុស្សមិនស្លា.ប់ទេអី !
រាជធានីភ្នំពេញ ៖ មេគោ១ក្បាលក្នុងចំណោម៣ក្បាលបានងាប់ភ្លាមៗនៅហ្នឹងកន្លែង
រាជធានីភ្នំពេញ ៖ មេគោ១ក្បាលក្នុងចំណោម៣ក្បាលបានងាប់ភ្លាមៗនៅហ្នឹងកន្លែង ខណៈដែលគោទាំងនោះដើរកាត់ទឹកដែលដក់នៅក្បែរបង្គោលភ្លើង១ដើម ក្រោយពេលមានភ្លៀងធ្លាក់១មេបង្កឲ្យមានការភ្ញាក់ផ្អើលកាលពីវេលាម៉ោង៨ និង៣០នាទីព្រឹក ថ្ងៃទី១២ ខែតុលា ឆ្នាំ២០១៧ នៅចំណុចលេខP1-493 តាមផ្លូវលំជាប់របងវត្តភ្នៀតសម្ពលី ស្ថិតនៅក្នុងភូមិអង្គរជ័យ សង្កាត់ស្នោ ខណ្ឌពោធិ៍សែនជ័យ។ ប្រជាពលរដ្ឋដែលបានឃើញហេតុការណ៍នោះបានឲ្យដឹងថា មេគោ១ក្បាលខាងលើនោះផើមជិតដល់ពេលកើតកូនទៅហើយ វាមានទម្ងន់ប្រមាណ១០០គីឡូក្រាម ដែលមានម្ចាស់ឈ្មោះ រ៉ន អាយុជាង៤០ឆ្នាំ មុខរបរកសិករមានទីលំនៅក្នុងភូមិស្កុលក្រស្នា សង្កាត់ស្នោ ខណ្ឌពោធិ៍សែនជ័យ។
នៅមុនពេលកើតហេតុខាងលើម្ចាស់បានលែងមេគោរបស់ខ្លួនជាមួយ និងគោ១ហ្វូងផ្សេងទៀតដែលជារបស់អ្នកភូមិជាមួយគ្នា ហើយពួកវាបានដើរស៊ីស្មៅចេញពីភូមិរហូតទៅដល់ចំណុចកើតហេតុនោះដែលមានចម្ងាយផ្លូវប្រហែលជាង២គីឡូម៉ែត្រ ដោយម្ចាស់មិនបានតាមឃ្វាលវានោះឡើយ។ ដែលជារៀងរាល់ថ្ងៃគឺបានលែងចោលនៅវេលាព្រឹកលុះដល់វេលាល្ងាចគោខ្លះបានដើរទៅរកផ្ទះដោយខ្លួនវា និងគោខ្លះទៀតអត់ទៅទេរហូតម្ចាស់តាមទៅរក និងដេញឲ្យទៅផ្ទះទើបទៅ។ លុះពេលទៅដល់ត្រង់ចំណុចកើតហេតុនោះមេគោ១ក្បាលខាងលើបានដើរឆ្លងកាត់ទឹកថ្លុកដែលដក់តាមផ្លូវក្រោយពេលមានភ្លៀងធ្លាក់កាលពីវេលាល្ងាចថ្ងៃទី១១ ខែតុលា ហើយក៏ស្រាប់តែដួលប្រកាច់ងាប់ទាំងកំរោលតែម្ដង ខណៈនោះមិនមាននរណាម្នាក់បានដឹងថា នៅទីនោះមានឆ្លងចរន្តអគ្គីសនីនោះឡើយ ដោយម្នាក់ៗនឹកស្មានថាមេគោផើម១ក្បាលនោះមានជំងឺដួលងាប់ដោយខ្លួនវាប៉ុណ្ណោះ សូម្បីតែម្ចាស់របស់វាក៏មិនបានដឹងដែរ។
បន្ទាប់មកម្ចាស់របស់វាបានលក់ទៅឲ្យឈ្មួញបានឲ្យតម្លៃត្រឹម៦០ម៉ឺនរៀលតែប៉ុណ្ណោះ ដែលគោនោះបើលក់ឲ្យស្រួលបួលអាចបានតម្លៃជាង២លានរៀលឯណោះ ប៉ុន្តែដោយស្មានថាគោឈឺងាប់ទើបលក់បានថោកបែបនេះ។ ប្រភពខាងលើបានបន្តទៀតថា លុះក្រោយពេលត្រូវរ៉ូវតម្លៃគ្នាហើយឈ្មួញបានចាប់ទាញក្រឡុសអូសចេញពីកន្លែងកើតហេតុរួចទើបដាក់រ៉ឺម៉កម៉ូតូដឹកចេញទើបមិនបានបណ្ដាលឲ្យឆក់ ហើយបន្តិចក្រោយមកមានគោ២ក្បាលទៀតបានដើរកាត់ទីនោះស្រាប់តែត្រូវបានចរន្តអគ្គីសនីឆក់ប្រកាច់ទៀត ប៉ុន្តែវាអត់ដួល និងបានស្ទុះលោត និងរត់ចេញរួច។ ទើបធ្វើឲ្យមានការសង្ស័យហើយពួកគាត់បាននាំគ្នាចាប់កូនកង្កែប១ក្បាលបោះចូលទៅក្នុងទឹកថ្លុកនោះ ស្រាប់តែឆក់បណ្ដាលឲ្យងាបត្រង់ជើងស្ដូក ទើបដឹងថាទឹកនោះឆ្លងចរន្តអគ្គីសនីចេញពីបង្គោលភ្លើងលេខP1-493 នោះហើយក៏បានខលប្រាប់នគរបាលឲ្យជួយរាយការណ៍បន្តទៅកាន់មន្ត្រីអគ្គីសនីកម្ពុជាចុះទៅពិនិត្យមើល។
នគរបាលបានឲ្យដឹងថា ក្រោយពេលប្រជាពលរដ្ឋរាយការណ៍កម្លាំងបានចុះទៅពិនិត្យមើល ប៉ុន្តែមេគោ១ក្បាលដែលងាប់នោះត្រូវបានម្ចាស់យកចេញពីកន្លែងកើតហេតុបាត់ហើយ ពេលនោះកម្លាំងបានដាក់របាំងការពារមិនឲ្យអ្នកដំណើរជាពិសេសក្មេងៗសិស្សសាលាដែលស្ថិតនៅក្បែរនោះឆ្លងកាត់ខ្លាចមានគ្រោះថ្នាក់។ បន្ទាប់មកបានជូនដំណឹងទៅកាន់មន្ត្រីអគ្គីសនីកម្ពុជាឲ្យទៅពិនិត្យមើល ហើយរហូតដល់វេលាម៉ោង១២ថ្ងៃ ត្រង់ថ្ងៃដដែលទើបមន្ត្រីអគ្គីសនីទៅដល់ត្រួតពិនិត្យមើលឃើញថាបង្គោល១ដើមខាងលើពិតជាមានការឆ្លងចរន្តពិតមែន រួចបានផ្ដាច់ចរន្តភ្លើងជាបណ្ដោះអាសន្នរង់ចាំការជួសជុលកែលម្អឡើងវិញនៅពេលបន្ទាប់ ហើយផ្លូវនោះក៏ត្រូវបានបើកឲ្យអ្វើចរាចរណ៍ឡើងវិញនាពេលនោះផងដែរ៕
ចែករំលែកព័តមាននេះ