តើបុគ្គលដែលតាំងខ្លួនជាព្រះអរហន្ត ជានរណា?
ខេត្តតាកែវ ៖ ប៉ុន្មានថ្ងៃចុងក្រោយនេះ ព័ត៌មានទាក់ទិននឹងបុគ្គលឈ្មោះ ធាន វុទ្ធី
ខេត្តតាកែវ ៖ ប៉ុន្មានថ្ងៃចុងក្រោយនេះ ព័ត៌មានទាក់ទិននឹងបុគ្គលឈ្មោះ ធាន វុទ្ធី
ខេត្តតាកែវ ៖ ប៉ុន្មានថ្ងៃចុងក្រោយនេះ ព័ត៌មានទាក់ទិននឹងបុគ្គលឈ្មោះ ធាន វុទ្ធី ដែលធ្លាប់តាំងខ្លួនជាព្រះសិរអារ្យមេត្រី កាន់កាប់វត្តទួលព្រះរាជា កាលពីប៉ុន្មានឆ្នាំមុន រហូតតម្រូវឱ្យចេញពីវត្តនៅស្រុកកោះធំ ខេត្តកណ្តាល ស្រាប់តែពេលនេះបានធ្វើឱ្យមហាជនមានការភ្ញាក់ផ្អើលយ៉ាងខ្លាំងភ្លូកទឹកភ្លូកដីទៀតហើយ។ បន្ទាប់ពីការបង្ហោះវីដេអូតាមហ្វេសប៊ុក ពីការហែក្បួនមានទូលត្រៃ បាំងខ្លស់ពីហ្វូងមនុស្សរាប់សិបនាក់ ដែលស្លៀកពាក់ស ស្របពេលដែលជនានុជន ជាពុទ្ធបរិស័ទប្រារព្ធធ្វើបុណ្យកឋិនទានហែទៅកាន់ទីអារាមនានា តាមពុទ្ធានុញ្ញាត។ ដោយសារតែការបង្ហោះនោះ ក៏បានធ្វើឱ្យមានការភ្ញាក់ផ្អើលជាថ្មី ពីបុគ្គល ធាន វុទ្ធី ដោយសារតែគេបានប្រកាសថាជាព្រះអរហន្ត។
ជាមួយគ្នានេះក៏មានការបង្ហោះស្តីពីបុរសម្នាក់ដែលតាំងខ្លួនជាស្តេចចក្កវាឡគ្រងភស្តារ ប្រៀបដូចជាស្តេចឋានលើ តែអ្វីដែលធ្វើឱ្យមហាជនភ្ញាក់ផ្អើលបន្ថែមទៀតនោះ គឺការបង្ហាញរូបថតសម្តេចឪផងដែរ។ ដោយសារតែមានការបង្ហោះផ្ទួនៗពីបុគ្គល ធាន វុទ្ធី បានតាំងខ្លួនជាព្រះអរហន្ត ហើយក៏មានបុគ្គលម្នាក់ទៀតគ្រងភស្តារ ធ្វើជាស្តេចចក្កវាឡ បានធ្វើឱ្យប្រភពព័ត៌មានខ្លះមានការយល់ច្រឡំថា ជាបុគ្គល ធាន វុទ្ធី តែមួយមិនចោលក្បួនកុហក។ នៅលើបណ្ដាញសង្គមហ្វេសប៊ុក សាធារណជនមានការខឹងសម្បាយ៉ាងខ្លាំងទៅលើបុគ្គលឈ្មោះ ធាន វុទ្ធី នោះ នឹងបានអំពាវនាវដល់ក្រសួងធម្មការ និងសាសនា ព្រមទាំងសមត្ថកិច្ចពាក់ព័ន្ធទាំងអស់ជួយចាត់វិធានការទៅតាមផ្លូវច្បាប់លើបុគ្គលម្នាក់នេះ ដែលថ្ងៃមុន និងប៉ុន្មានខែមុនបុគ្គលនេះបានបំពានការសន្យារបស់ខ្លួនជាបន្តបន្ទាប់។
តើហេតុអ្វីបានជាក្រសួង និងសមត្ថកិច្ចមិនមានវិធានការទប់ស្កាត់សោះបែបនេះ ដោយទុកឱ្យមនុស្សមួយចំនួនលង់ និងការបោកប្រាស់របស់បុគ្គលម្នាក់នេះ ដែលមានជំនឿផ្កាប់មុខខ្វះការពិចារណា។ មហាជនមានប្រតិកម្មយ៉ាងខ្លាំងក្លា បន្ទាប់ពីឃើញមនុស្សរាប់សិបនាក់មានក្មេងចាស់បាននាំគ្នាស្លៀកពាក់ស និងបានចាត់ទុកបុគ្គល ធាន វុទ្ធី ជាព្រះអរហន្ត ព្រមទាំងមានការដង្ហែជាអង្គកឋិនទានទៀត។ ទីតាំងដែលបុគ្គល ធាន វុទ្ធី ស្នាក់នៅក្នុងភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ។ លោក ជួង វ៉ាង ប្រធានមន្ទីរធម្មការ និងសាសនាខេត្ត បានប្រាប់កោះសន្តិភាពថ្ងៃទី១១ តុលាឱ្យដឹងថា ការហែក្បួនដូចហែកឋិនរបស់អ្នកស្លៀកពាក់សនោះ មិនមែនគេហែកឋិនទេ តែជាពិធីបុណ្យដែលមានវត្តមានបុគ្គល ធាន វុទ្ធី។
ពិធីបុណ្យសាសនាគេធ្វើនៅថ្ងែទី៦ តុលា ដែលជាថ្ងៃទី១ នៃរដូវកាលបុណ្យកឋិន មិនមានអ្វីដែលប្លែកឡើយ តែនៅក្នុងពិធីបុណ្យនោះ ពលរដ្ឋនៅក្នុងមូលដ្ឋានមិនបានមកចូលរួមទេ តែពលរដ្ឋដែលមកចូលរួមនោះ ភាគច្រើនគេមកពីខេត្តឆ្ងាយៗ ដោយមានដង្ហែត្រឹមត្រូវ តែអ្វីដែលប្លែកនោះនៅក្នុងសាដកមិនមានច្បង់ចីវរទេគឺក្រណាត់ស។ លោកប្រធានមន្ទីរធម្មការបានបន្តទៀតថា បុគ្គល ធាន វុទ្ធី ដែលធ្លាប់បានតាំងខ្លួនជាព្រះសិរអារ្យមេត្រី នោះបានបាត់មុខយូរមកហើយ មិនឃើញមុខនោះទេ ហើយចំណុចភូមិចំប៉ា ដែល ធាន វុទ្ធី បានបង្ហាញមុខធ្វើបុណ្យតាំងខ្លួនជាព្រះអរហន្តនេះ គឺជាទួលអង្គដែលបានធ្វើរបងបេតុងជុំជិត។ បុគ្គលនេះ មិនដែលបានបង្ហាញនៅក្នុងអាស្រមលើទួលក្នុងភូមិចំប៉ានោះទេ គឺទើបតែលេចមុខមកវិញ នៅក្នុងពិធីបុណ្យសាសនា ដោយតាំងខ្លួនជាព្រះអរហន្ត។
លោកប្រធានមន្ទីរឱ្យដឹងថា ពេលការិយាល័យធម្មការ និងសាសនាស្រុករាយការណ៍ប្រាប់ភ្លាមលោកក៏បានចុះទៅធ្វើការណែនាំ និងផ្ដាំផ្ញើទៅអាជ្ញាធរមូលដ្ឋានថា ត្រូវតែហាមប្រាមសកម្មភាពគ្រប់បែបយ៉ាងដែលធ្វើឱ្យប៉ះពាល់ដល់ព្រះពុទ្ធសាសនា និងច្បាប់ បើអនុវត្តបំពានលើការហាមប្រាមត្រូវតែទទួលខុសត្រូវចំពោះមុខច្បាប់។ ពាក់ព័ន្ធទៅនឹងករណីខាងលើនេះដែរ លោក អ៊ឹត សារ អភិបាលស្រុកព្រៃកប្បាសបានប្រាប់កោះសន្តិភាពឱ្យដឹងថា លោកសូមបដិសេធចំពោះព័ត៌មាន នៅក្នុងបណ្តាញសង្គម និងសារព័ត៌មាន ដែលបានចេញផ្សាយថាបុគ្គល ធាន វុទ្ធី បានតាំងខ្លួនជាស្តេចចក្កវាឡ គឺបុគ្គល ធាន វុទ្ធី នៅក្នុងពិធីបុណ្យនោះ ស្លៀកពាក់សំពត់សធម្មតាតែប៉ុណ្ណោះហើយក៏គ្មានប្រជាពលរដ្ឋរស់នៅភូមិ ឃុំ ក្បែរនោះទៅចូលរួមទេ។
ចំពោះអ្នកមកចូលរួមមកពីខេត្តបន្ទាយមានជ័យ ខេត្តបាត់ដំបង និងខេត្តផ្សេងៗទៀតដែលមានកាជឿជាក់មកលើបុគ្គលរូបនេះ។ លោកអភិបាលស្រុកបានបន្តទៀតថា បុគ្គល ធាន វុទ្ធី ចេញចូលទៅមកកន្លែងរបស់គេ មិនសូវមាននរណាបានដឹងទេ មកអើតមួយភ្លែតៗត្រឡប់ទៅវិញ មិននៅយូរទេ។ ចំពោះព័ត៌មានដែលថា បុគ្គល ធាន វុទ្ធី បានតាំងខ្លួនជាស្តេចព្រះបិតាចក្កវាឡ និងជាព្រះពោធិ៍សាត់នោះ គឺជាការយល់ច្រឡំទេ តាមពិត គឺជាមនុស្ស២នាក់ផ្សេងគ្នា។ បុគ្គលដែលតុបតែងខ្លួនធ្វើដូចស្តេចនោះ និងមានអ្នកអោនក្រាបថ្វាយបង្គំនោះ មិនដឹងថា មកពីទីណាទេ ហើយបើយោងតាមវីដេអូឃ្លីប ដែលបានបង្ហោះក្នុងបណ្តាញសង្គមនោះ ឮជនម្នាក់ប្រកាសថា ពិធីនោះបានធ្វើឡើងនៅក្នុងខែឧសភា ឆ្នាំ២០១៧។
រហូតមកដល់ពេលនេះ នៅមិនទាន់ធ្លាយដំណឹងថា អ្នកតាំងខ្លួនជាព្រះបិតាចក្កវាឡ ឬជាព្រះពោធិ៍សាត់នោះ ស្ថិតនៅទីណាទេ តែពិតណាស់ថា ការផ្ទុះប្រតិកម្មបែបនេះ មន្ត្រីសមត្ថកិច្ចជំនាញខាងបច្ចេកវិទ្យា IT និងស្រាវជ្រាវរកឃើញអត្តសញ្ញាណអ្នកបង្ហោះវីដេអូ និងរូបថតលើបណ្តាញសង្គមនោះ ពិតជាបានដឹងឫសគល់ពីជនដែលគេលើកតម្កើងជាព្រះពោធិសាត់នោះមិនខាន។ ជាការពិតណាស់ថា អ្នកឆបោកមិនមានប៉ុន្មាននាក់នោះទេ តែមកពីអ្នកចាញ់បោកទេតើ ដែលធ្វើឱ្យជនបោកប្រាស់ក្លាយជាអាទិទេព និងក្លាយជាព្រះ៕
ចែករំលែកព័តមាននេះ