បទពិសោធន៍របស់អ្នកជំងឺម្នាក់ ៖ ចាប់ផ្តើមជ្រុះសក់ ក្រោយពីទទួលការព្យាបាលដោយការវះកាត់ និងចាក់គីមី!

ថ្ងៃទី ១២ ខែ តុលា ឆ្នាំ ២០១៧
ម៉ោង ០២:៥៩
bopha bopha

នាំមកជូនដោយ Forte Insurance

រាជធានីភ្នំពេញ ៖ ការព្យាបាលអ្នកជំងឺមហារីកសុដន់ គឺមានច្រើនប្រភេទ ដូច្នេះយើងសូមជម្រាបជូននូវការព្យាបាលដោយការវះកាត់ និងការចាក់គីមី ក៏ដូចជាផលវិបាកនៃរបស់វា ។

អ្នកស្រី ស្វាយ ចេង វ័យ៧១ឆ្នាំ រស់នៅក្រុងភ្នំពេញ ដែលបានវះកាត់ចោលសុដន់ទាំងមូលចេញ ដោយសារតែជំងឺ «មហារីកសុដន់» និងបានបន្តការព្យាបាលដោយសារធាតុគីមីក្រោយការវះកាត់សុដន់ អះអាងថា អ្នកស្រីទទួលរងនូវផលប៉ះពាល់មួយចំនួនតាមរយៈការព្យាបាលដោយការចាក់គីមី ។

អ្នកស្រីមានប្រសាសន៍ថា៖ «នៅពេលទទួលការព្យាបាលដោយចាក់គីមី គឺខ្ញុំពិបាកក្នុងខ្លួន ហូបអីចូលទៅក្អួតមកវិញ ជាពិសេសសក់របស់ខ្ញុំជ្រុះសឹងអស់ពីក្បាល ។ ត្រឹមតែការចាក់គីមីលើកទី១ គឺពេលសិតសក់ចាប់ផ្តើមជ្រុះសក់ទាំងដុំៗទៅហើយ»។

ការវះកាត់ដើម្បីព្យាបាលជំងឺមហារីកសុដន់មានដូចជា ៖
• ការកាត់តែដុំសាច់ចេញពីក្នុងសុដន់ ៖ ករណីនេះអាចធ្វើបានលុះត្រាតែដុំសាច់នោះតូចប៉ុណ្ណោះ។
• ការកាត់សុដន់ទាំងមូលចេញ ៖ វាជាការវះកាត់យកនូវជាលិកាសុដន់ទាំងអស់ដូចជា បំពង់ទឹកដោះ ជាលិកាខ្លាញ់ សាច់សុដន់ និងស្បែកមួយចំនួនផងរួមទាំងក្បាលសុដន់ផងដែរ។

• កាត់កូនកណ្តុរចេញ ៖ ករណីបែបនេះ គឺគ្រូពេទ្យសង្ស័យថា មានការរាលដាលមហារីកចូលទៅក្នុងកូនកណ្តុរ។
• កាត់កូនកណ្តុរនៅឃ្លាកចេញផងដែរ ដែលអាចមានចំនួនច្រើន

• កាត់សុដន់ទាំងសងខាងតែម្តង ៖ ការធ្វើបែបនេះលុះត្រាតែអ្នកជំងឺមានកត្តាហ្សែនកើតមហារីកសុដន់ខ្លាំងបំផុត។ ទោះបីជាយ៉ាងណាក៏ដោយ ស្ត្រីភាគច្រើនដែលមានមហារីកសុដន់តែម្ខាង គឺមិនអាចឆ្លងទៅម្ខាងទៀតបានទេ ដូច្នេះគួរតែមានការពិភាក្សាជាមួយគ្រូពេទ្យផង។

ចំពោះផលវិបាកនៃការវះកាត់សុដន់វិញ គឺអាស្រ័យទៅតាមជម្រើសដែលប្រើប្រាស់។ ការវះកាត់មហារីកសុដន់អាចប្រឈមនឹងការឈឺចាប់ ហូរឈាម ការបង្ករោគ និងហើមដៃ ។

វេជ្ជបណ្ឌិត ឡាយ សានីន ឯកទេសសម្ភព និងរោគស្ត្រីនៃមន្ទីរពេទ្យកាល់ម៉ែត មានប្រសាសន៍ថា ការព្យាបាលជំងឺមហារីកសុដន់ ពឹងផ្អែកទៅតាមប្រភេទនៃជំងឺ និងទំហំរបស់ដុំ អាយុរបស់ស្ត្រី និងការសង់សីនជាមួយអរម៉ូនទៅតាមស្ត្រីម្នាក់ៗ។ ក្នុងការព្យាបាលជំងឺមហារីកសុដន់មានការព្យាបាលដោយការវះកាត់ បន្ទាប់ពីការវះកាត់រួច គឺអ្នកជំងឺត្រូវមកធ្វើការបាញ់កាំរស្មី ការចាក់ថ្នាំគីមី អាចធ្វើស្របពេលជាមួយគ្នា ហើយនិងការព្យាបាលដោយអរម៉ូន ។

លោកស្រីវេជ្ជបណ្ឌិត ឡាយ សានីន បន្តទៀតថា៖ «វិធីនៃការវះកាត់ដុំមហារីកសុដន់ វាមានពីរស្ថាន បើក្នុងករណីដែលដុំមហារីកនោះតូចល្មម យើងអាចត្រឹមតែកាត់ដុំនោះចេញ ហើយដែលយើងកាត់ឲ្យបានធំ ដើម្បីយកឲ្យផុតនូវដុំសាច់មហារីក ។ តែបើក្នុងករណីដុំនោះវាធំ ដូច្នេះគ្រូពេទ្យតម្រូវធ្វើការវះកាត់សុដន់ទាំងមូលហើយនឹងអាចចៀរកូនកណ្តុរចេញទៀត ។ បន្ទាប់ពីវះកាត់ ហើយយើងតម្រូវបាញ់កាំរស្មី ការបាញ់កាំរស្មីនេះគឺអាចជួយដុតកម្ទេចកោសិការមហារីកដែលនៅសេសសល់»។

គ្រូពេទ្យបន្តទៀតថា ការព្យាបាលនេះ គឺធ្វើឡើងមួយខែក្រោយពីការវះកាត់ ហើយការព្យាបាលដោយបាញ់កាំរស្មីអាចធ្វើស្របពេលជាមួយនឹងការចាក់គីមីតែម្តង។ ចំណែករយៈពេលនៃការព្យាបាលមានរយៈពេល៣ទៅ៦សប្តាហ៍ ហើយក្នុងមួយសប្តាហ៍បាញ់ពី២ទៅ៥ដង ។ ក្នុងមួយដងបាញ់មាន២ទៅ៣នាទី ហើយការព្យាបាលដោយបាញ់កាំរស្មីវាអាចមានផលប៉ះពាល់ដូចជា អ្នកជំងឺអាចអស់កម្លាំង អ្នកជំងឺអាចមានការហើមនៅកន្លែងដែលបាញ់ ស្បែកអាចឡើងពណ៌ក្រមៅមួយរយៈ ហើយនឹងបាត់ទៅវិញ ៕