ជើងខ្លាំងកម្ពុជា2រូបត្រៀមកណ្ដាប់ដៃស្វាគមន៍កីឡាករថៃនៅថ្ងៃសុក្រស្អែកនេះ
រាជធានីភ្នំពេញ ៖ អ្នកប្រដាល់ជើងខ្លាំងកម្ពុជាចំនួន២រូបត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀន
រាជធានីភ្នំពេញ ៖ អ្នកប្រដាល់ជើងខ្លាំងកម្ពុជាចំនួន២រូបត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ My TVក្នុងកម្មវិធីប្រដាល់អន្តរជាតិGanzberg Uber Fighters នៅថ្ងៃសុក្រ ទី១៣ តុលា ស្អែកនេះ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា ខណៈកីឡាករថៃដែលពួកគេត្រូវជួបនាពេលនេះហាក់មានសមត្ថភាពខ្លាំងមិនធម្មតាបែបហ្នឹងនោះ។
អឹុង បូរ៉ា មកពីក្លិបកុលបុត្រកូនខ្មែរ ត្រូវជួបប្រកួតជាមួយកីឡាករថៃឈ្មោះវីហ្គោ ស.ដានឆ័យ ក្នុងប្រភេទទម្ងន់៥៧គីឡូក្រាម ។ អឹុង បូរ៉ា អ្នកណាក៏ល្បីថាគេជាអ្នកប្រដាល់ជើងខ្លាំងដែលមានបទពិសោធន៍ប្រកួតនៅលើសង្វៀនជាយូរឆ្នាំមកហើយ ។ កីឡាករកម្ពុជារូបនេះធ្លាប់ប្រកួត៩៧ដង ឈ្នះ៨០ដង ចាញ់១៤ដង ស្មើ៣ដង និងផ្ដួលគូប្រកួតឱ្យសន្លប់បាន១៩ដង ក្នុងពេលកីឡាករថៃដែលគេត្រូវប្រកួតជាមួយធ្លាប់ប្រកួតបានត្រឹមតែ៥៧ដង ឈ្នះ៤៥ដង ចាញ់១២ដង និងផ្ដួលគូប្រកួតឱ្យសន្លប់បាន៦ដង ។ តាមរយៈប្រវត្តិប្រកួតខាងលើ គេមានជំនឿចិត្តលើអឹុង បូរ៉ា ច្រើនជាង ព្រោះកីឡាកររូបនេះមិនត្រឹមតែចាស់វស្សានៅលើសង្វៀនប៉ុណ្ណោះទេថែមទាំងមានចិត្តសឿង ចលនាវាយចេញក៏រហ័សរហួនថែមទៀត ។ ចាំមើលអឹុង បូរ៉ា អាចយកឈ្នះកីឡាករថៃបានដោយរបៀបណា?
ពុទ្ធ ឆាយរិទ្ធី មកពីក្លិបពុទ្ធសិរីវង្សពោធិសែនជ័យ ត្រូវជួបប្រកួតជាមួយកីឡាករថៃឈ្មោះវ៉ាំងហ៊ីន ឡេក ឡូកធុងវ៉ាំង ក្នុងប្រភេទទម្ងន់៦៧គីឡូក្រាម ។ រវាងពុទ្ធ ឆាយរិទ្ធី និងកីឡាករថៃជាគូប្រកួតមានប្រវត្តិប្រហាក់ប្រហែលគ្នា ។ ពុទ្ធ ឆាយរិទ្ធី ធ្លាប់ប្រកួតបាន៨២ដង ឈ្នះ៥៨ដង ចាញ់២១ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១៧ដង។ ចំណែកកីឡាករថៃវិញធ្លាប់ប្រកួតបាន៨៥ដង ឈ្នះ៦៥ដង ចាញ់១៧ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន១៥ដង ។ គូនេះប្រហែលជាពិបាកក្នុងការវាយតម្លៃបន្តិចហើយ ព្រោះកន្លងមកគេមិនធ្លាប់មកប្រកួតនៅស្រុកខ្មែរទេ។ ទោះជាយ៉ាងណា ពុទ្ធ ឆាយរិទ្ធី គឺជាកីឡាករជើងខ្លាំងមួយរូបដែលមានបទពិសោធន៍ប្រកួតនៅលើសង្វៀនយ៉ាងជោកជាំ ។ ដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះអ្នកណាខ្លាំងឬខ្សោយគង់តែដឹងទេ ។
ចំណែកគូប្រកួតមិត្តភាពធម្មតាវិញ កីឡាករបាន លីម មកពីក្លិបកងទ័ពពិសេសឆត្រយោង៩១១ ប្រកួតជាមួយកីឡាករ ឡុង ខេត្ត មកពីក្លិបខ្លារខិនមានរិទ្ធ និងកីឡាករ សុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករ សួង សុវណ្ណថា មកពីក្លិបពន្លឺណេអុង ៕
ចែករំលែកព័តមាននេះ