ភ្នំពេញ៖ គ.ជ.ប បានប្រកាសថា ស្ថានភាពទូទៅនៃដំណើរការឃោសនាបោះឆ្នោត ក្នុងថ្ងៃទីមួយ នាថ្ងៃទី៣១មីនានេះ បានប្រព្រឹត្តទៅដោយរលូន មានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។ ការឃោសនាបោះឆ្នោតនេះ មានរយៈពេល ៨ថ្ងៃ ចាប់ពីថ្ងៃទី៣១មីនា ដល់ថ្ងៃទី៧ ខែមេសា ឆ្នាំ២០២៣។
គ.ជ.ប ប្រកាសថា នៅថ្ងៃទី១ នៃយុទ្ធនាការឃោសនាបោះឆ្នោត នាថ្ងៃទី៣១មីនានេះ គឺគណបក្សប្រជាជនកម្ពុជា បានធ្វើសកម្មភាពជួបប្រជុំជាមួយបេក្ខជនឈរឈ្មោះបោះឆ្នោត អង្គបោះឆ្នោត និងសមាជិកគណបក្សនៅតាមមណ្ឌលបោះឆ្នោតនៃក្រុងស្រុក ចំនួន ៤ រួមមាន ក្រុងអរិយក្សត្រ ( អ្នកចូលរួមប្រមាណ ១៩៤នាក់ ) ក្រុងឧដុង្គម៉ែជ័យ ( អ្នកចូលរួមប្រមាណ ៥៨នាក់ ) ស្រុកសាមគ្គីមុនីជ័យ ( អ្នកចូលរួមប្រមាណ ៨០នាក់ ) និងស្រុកអូរគ្រៀងសែនជ័យ ( អ្នកចូលរួម ប្រមាណ ៥៥នាក់ )។
គ.ជ.ប បន្ថែមថា ដោយឡែក គណបក្ស ២ទៀត រួមមាន គណបក្សភ្លើងទៀន និងគណបក្សហ៊្វុនស៊ិនប៉ិច ពុំមានធ្វើសកម្មភាពឃោសនាបោះឆ្នោតឡើយ។
យុទ្ធនាការឃោសនាបោះឆ្នោតនេះ ដើម្បីឆ្ពោះទៅបោះឆ្នោតជ្រើសរើសក្រុមប្រឹក្សាក្រុងស្រុក ចំនួន ៥ ដែលទើបបំបែក និងបង្កើតថ្មី រួមមាន៖ ក្រុងអរិយក្សត្រ ក្រុងសំពៅពូន នៃខេត្តកណ្តាល ក្រុងឧដុង្គម៉ែជ័យ ស្រុកសាមគ្គីមុនីជ័យ នៃខេត្តកំពង់ស្ពឺ និងស្រុកអូរគ្រៀងសែនជ័យ នៃខេត្តក្រចេះ។
ថ្ងៃអាទិត្យ ទី៩ ខែមេសា ឆ្នាំ២០២៣ ជាថ្ងៃបោះឆ្នោត ហើយមានតែក្រុមប្រឹក្សាឃុំសង្កាត់ ក្នុងតំណែង នៅក្នុងស្រុកក្រុង ទាំង ៥នេះប៉ុណ្ណោះ ដែលជាអ្នកបោះឆ្នោត៕
ចែករំលែកព័តមាននេះ