ស្មានមិនដល់មែន គ្រាន់តែហូបចេក ឬប៊័រ1ផ្លែក្នុង1ថ្ងៃសោះ
ការស្រាវជ្រាវថ្មីមួយបានចង្អុលបង្ហាញថា
ការស្រាវជ្រាវថ្មីមួយបានចង្អុលបង្ហាញថា ការទទួលទានចេក ឬផ្លែប៊័រក្នុង១ថ្ងៃ១ផ្លែអាចទប់ស្កាត់ជំងឺគាំងបេះដូង និងជំងឺដាច់សរសៃឈាមខួរក្បាល ។
ការស្រាវជ្រាវបានរកឃើញថាអាហារសម្បូរជាតិប៉ូតាស្យូមអាចបញ្ឈប់ការរាំងស្ទះក្នុងសរសៃឈាមដែលអាចបណ្តាលឲ្យស្លាប់បាន ដោយទាប់ស្កាត់មិនឲ្យសរសៃឈាមអាកទែឡើងរឹង ។
ការស្រាវជ្រាវពីមុនបានបង្ហាញថា សរសៃឈាមអាកទែដែលឡើងរឹង និងមិនអាចបត់បែនបានអាចបង្កើនហានិភ័យជំងឺគាំងបេះដូង ឬដាច់សរសៃឈាមខួរក្បាលចំពោះមនុស្ស ។
ក្រុមអ្នកស្រាវជ្រាវជឿថាជាតិប៉ូតាស្យូមគ្រប់គ្រងហ្សែនដែលរក្សាភាពបត់បែនរបស់សរសៃឈាមអាកទែ ។ អ្នកនិពន្ធនៃការសិក្សានេះលោកវេជ្ជបណ្ឌិត Paul Sanders ពីសាកលវិទ្យាល័យ Alabama នៅBirmingham និយាយថា៖«ការរកឃើញនេះបង្ហាញពីអត្ថប្រយោជន៍នៃការបន្ថែមជាតិប៉ូតាស្យូមឲ្យបានគ្រប់គ្រាន់លើការទប់ស្កាត់មិនឲ្យសរសៃឈាមឡើងរឹង » ។
ក្រុមអ្នកស្រាវជ្រាវបានវិភាគលើសត្វកណ្តុរដែលមានហានិភ័យខ្ពស់ក្នុងការកើតជំងឺបេះដូងនៅពេលដែលពួកវាត្រូវបានគេឲ្យចំណីអាហារដែលមានជាតិខ្លាញ់ខ្ពស់ ។ កណ្តុរទាំងនោះត្រូវបានផ្តល់ឲ្យនូវកម្រិតប៉ូតាស្យូមទាប ធម្មតា ឬខ្ពស់ ។ លទ្ធផលបានបង្ហាញថាសរសៃឈាមអាកទែរបស់សត្វកណ្តុរដែលស៊ីអាហារមានជាតិប៉ូតាស្យូមទាបឡើងរឹង ។ ចំណែកសត្វកណ្តុរដែលស៊ីអាហារមានជាតិប៉ូតាស្យូមខ្ពស់ថយចុះការឡើងរឹងរបស់សរសៃឈាមអាកទែ ។ សត្វកណ្តុរដែលស៊ីអាហារមានជាតិប៉ូតាស្យូមច្រើនក៏មានការថយចុះរឹតតែខ្លាំងចំពោះសរសៃឈាមអាកទែចេញពីបេះដូង ដែលជាសរសៃឈាមសំខាន់របស់រាងកាយ ។
លោកវេជ្ជបណ្ឌិតSanders និយាយថា៖ «ការរកឃើញនេះមានសក្តានុពលនៃការផ្លាស់ប្តូរដ៏សំខាន់ ព្រោះវាបង្ហាញពីប្រយោជន៍នៃការទទួលទានជាតិប៉ូតាស្យូមឲ្យបានគ្រប់គ្រាន់លើការបង្ការការក្រិនសរសៃឈាមចំពោះកណ្តុរដែលងាយកើតមានបញ្ហានេះ និងផលប៉ះពាល់ពីការទទួលទានជាតិប៉ូតាស្យូមមិនគ្រប់គ្រាន់» ៕
ចែករំលែកព័តមាននេះ