Super Stars ​កីឡា​7​រូប​ដែល​ធ្លាប់​លេចធ្លោ


រាជធានី​ភ្នំពេញ ៖ កីឡាករ​-​កីឡាការិនី ចំនួន​៧​រូប​ត្រូវ​បាន​គេ​ចាត់​ទុក​ថា​ ជា Super Stars ​នៅ​ក្នុង​វិស័យ​កីឡា បាន​ក្លាយជា​តំណាង ផ្សព្វផ្សាយ​ផលិតផល​ប្រចាំ​ក្រុមហ៊ុន​ធំៗ។ Super Stars ​កីឡា​ទាំងនោះ​ក៏​ស៊ី​ថ្លៃ​មិន​ចាញ់​តារា​ល្បី​ជួរមុខ​ក្នុង​វិស័យ​សិល្បៈ​ប៉ុន្មាន​ទេ ​បើ​ទោះជា​ខ្លះ​មិន​ធ្លាប់​សម្ដែង​ក្នុង​ស្ប៉ត​ពាណិជ្ជកម្ម​ឬ​ភាពយន្ត និង​ខ្លះ​បាន​ផុត​កុងត្រា​ទៅ​ហើយ​ក្ដី ។

1- ស៊ន សៀវ​ម៉ី ៖ គឺជា​Super Star តែ​ម្នាក់​គត់​របស់​សហព័ន្ធ​កីឡា​តេ​ក្វា​ន់​ដូ​កម្ពុជា ដោយ​នាង​បាន​ជួយ​ឱ្យ​សហព័ន្ធ​នេះ​មានការ​ទទួលស្គាល់​មិន​ត្រឹមតែ​កេរ្តិ៍ឈ្មោះ​ក្នុងស្រុក​ប៉ុណ្ណោះ លើ​ឆាក​អន្តរជាតិ​ក៏​ទទួលស្គាល់​ថា​នាង​ជា​ជើង​ខ្លាំង​នៅ​ក្នុង​ប្រភេទ​កីឡា​មួយ​នេះ​ដែរ ។ គ្រាន់តែដណ្ដើម​បាន​មេដាយមាស​ពី​កីឡា​អា​ស៊ី​ភ្លាម នាងក៏​ទទួល​បាន​ឱកាស​ថត​ស្ប៉ត​តែ​ម្ដង ដោយ​ក្រុមហ៊ុន​សែ​ល​កាត​បាន​ជ្រើសរើស​ឱ្យធ្វើ​ជា​តំណាងក្រុមហ៊ុន​ផ្សព្វផ្សាយ​កម្មវិធី​ថ្មី​ៗ​របស់​គេ​ក្នុងតម្លៃ​ខ្លួន​ខ្ពស់ ។

ក្នុង​រយៈពេល​នោះ នាង​ក៏​មាន​សំណាង​បាន​ថត​ស្ប៉ត​ធនាគារ និង​ស្ប៉តរាយរង​មួយ​ចំនួន​ទៀត​ផង ធ្វើ​ឱ្យ​នាង​ទទួលបាន​ប្រាក់​ចំណូល​ច្រើន​មិនធម្មតា​ក្នុង​ពេល​មាន​ទីផ្សារ​ថត​ស្ប៉ត ។ ទោះបី​យ៉ាងណា នាង​ត្រូវ​បាន​គេ​អះអាង​ថា បាន​ដាច់​កុងត្រា​ជាមួយ​ក្រុមហ៊ុន​ធំ​ៗ​ដែល​នាង​ធ្លាប់​ធ្វើ​ជា​តំណាង​ទាំងនោះ​ហើយ ដោយ​ការងារ​ថត​ស្ប៉ត​ថ្មី​ក៏​មិន​ទាន់​លេច​ឡើង​ក្នុង​ពេល​ទីផ្សារ​ថត​ស្ប៉ត​ហាក់​មិនសូវ​ផ្ដោត​ការ​ចាប់អារម្មណ៍​ចំពោះ​នាង​ដូច​មុន ។ ប៉ុន្តែ​នាង​នៅ​តែ​ជា Super Star គ្មាន​គូ​ផ្ទឹម​មក​ទល់​ពេល​នេះ​សម្រាប់​ប្រភេទ​កីឡា​តេ​ក្វា​ន់​ដូ បើ​ទោះជា​ក្នុង​ពេល​នេះ​ក៏​មាន​កីឡាករ​និង​កីឡាការិនី​ប្រចាំ​សហព័ន្ធ​មួយ​នេះ​កំពុង​តែ​លេចធ្លោ​ផង​ដែរ ។

2- ចាន់ វឌ្ឍនាកា ៖ លោក​គឺ Super Star ក្នុង​ប្រភេទ​កីឡាបាល់ទាត់​ដែល​កេរ្តិ៍ឈ្មោះ​របស់​លោក​គឺ​ល្បី​រន្ទឺ​ស្ទើរតែ​ពេញ​មួយ​ផ្ទៃ​ប្រទេស​តែ​ម្ដង​ក្នុង​ពិភព​បាល់ទាត់ ។ លោក​បាន​សាង​កេរ្តិ៍ឈ្មោះ​នៅ​ក្នុង​វិស័យ​នេះ​ធ្វើ​ឱ្យ​មានការ​ទទួលស្គាល់​យ៉ាង​ខ្លាំង ជា​ពិសេស​បន្ទាប់​ពី​លោក​បាន​ឈ្នះ​ពានរង្វាន់​លេចធ្លោ​ក្នុង​ក្រុម​ជម្រើសជាតិ​ផ្ទួន​ៗ ​ហើយ​ចុង​ក្រោយ​ក៏​ត្រូវ​បាន​ក្រុមបាល់ទាត់​នៅ​ក្នុង​លី​គ​ទី​៣​ជប៉ុន​ទិញ​ឱ្យទៅ​លេង​ក្នុង​ក្លិប​របស់​ខ្លួន​រយៈពេល​មួយ​ឆ្នាំ ដែល​នឹង​ដាច់​កុងត្រា​ឆ្នាំ​ទី​១​នៅ​ដើមឆ្នាំ​២០១៨ ខាង​មុខ​នេះ ។ លោក​គឺជា Super Star ផ្នែក​បាល់ទាត់​កម្ពុជា​ដែល​មាន​ទាំង​ជាតិ និង​អន្តរជាតិ​ទទួលស្គាល់ ជា​ពិសេស​គឺ​សមត្ថភាព​បណ្ដើរ​បាល់ ចែក​បាល់ និង​ស៊ុត​បាល់​បញ្ចូល​ទី​គូប្រកួត ។

ក្នុង​នោះ​លោក​ក៏​រត់លឿន​មិន​ចាញ់​កីឡាករ​ល្អ​ៗ​របស់​បរទេស​ផង​ដែរ ទើប​សមត្ថភាព​របស់​លោក​ត្រូវ​គេ​ប្រៀបធៀប​ថា​ជា Messi របស់​កម្ពុជា​ទៅ​ទៀត ។ មក​ទល់​ពេល​នេះ លោក​នៅ​តែ​ជាតា​រា​ស្ប៉ត​ពាណិជ្ជកម្ម​ប្រចាំ​ក្រុមហ៊ុន​រថយន្ត​ធំ​មួយ ផលិតផល​ខោ​ទ្រនាប់ និង​ជា​តំណាង​ក្រុមហ៊ុនទូរស័ព្ទ​ចល័ត​ថ្មី​មួយ​ក្នុង​ប្រទេស ដោយ​ការងារ​ជា​តំណាង​ក្រុមហ៊ុន​ទាំងនោះ​នៅ​មិន​ទាន់​ដាច់​កុងត្រា​នោះ​ទេ ។

3- ប្រាក់ មុន្នី​ឧត្តម ៖ លោក​ក៏​ជា​Super Star​នៅ​ក្នុង​ពិភព​បាល់ទាត់ ដោយ​ក្រៅពី​មាន​ប្រជាប្រិយភាព​ខ្លាំងក្លា​នៅ​ក្នុង​វិស័យ​នេះ លោក​ក៏​មាន​ហាងឆេង​មិន​គួរ​ឱ្យ​ជឿ​នៅ​ក្នុង​វិស័យ​ថត​ស្ប៉ត​ផង​ដែរ ។ លោក​គឺជា​តារា​ស្ប៉ត​ប្រចាំ​ក្រុមហ៊ុន​ធំ​២​គឺ​ក្រុមហ៊ុន​រថយន្ត​ធំ​មួយ និង​ក្រុមហ៊ុន​ផលិតផល​លាប​បំបាត់​ការ​ឈឺចាប់​របស់​ថៃ ។ លោក​ត្រូវ​គេ​ឃើញ​នៅ​លើ​កញ្ចក់​ទូរទស្សន៍​ជា​រៀងរាល់ថ្ងៃ​នា​មួយ​រយៈ​ចុង​ក្រោយ ដោយសារ​តែ​ស្ប៉ត​ដែល​លោក​កុងត្រា បាន​ផ្សាយពាណិជ្ជកម្ម​ភ្លូកទឹកភ្លូកដី​លើ​កញ្ចក់​ទូរទស្សន៍ ជា​ពិសេស​នៅ​លើ​កញ្ចក់​ទូរទស្សន៍​ប៉ុស្តិ៍​លេខ​៥ ក្នុង​ម៉ោង​មាស ។

4- វ៉​ន វី​វ៉ា ៖ កីឡាករ​ប្រដាល់​រូប​នេះ ក៏​ធ្លាប់​បាន​គ្រង​តំណែង​ក្នុង​ស្ប៉ត​ពាណិជ្ជកម្ម​ធំ​ៗ​ផង​ដែរ ក្នុង​ពេល​លោក​នៅ​ជា​កីឡាករ​ប្រដាល់​ដែល​មាន​ប្រជាប្រិយភាព​ខ្លាំង ។ ផលិត​ផល​ថ្នាំលេប​បំបាត់​ការ​ឈឺចាប់ និង​ផលិតផល​រាយ​រយ​មួយ​ចំនួន​ទៀត ក៏​កីឡាករ​ប្រដាល់​រូប​នេះ បាន​ក្លាយជា​តំណាង​យ៉ាង​កាលី​ប​ផង​ដែរ បើ​ទោះជា​តម្លៃ​ខ្លួន​មិន​ត្រូវ​បាន​គេ​ទម្លាយ​ថា​បាន​ច្រើន​ឬ​តិច​ក្ដី ។ លោក​ក៏​ជា​តារាភាពយន្ត​ដែល​មានមុខ​សម្ដែង​ក្នុង​រឿង​មួយ​ចំនួន​ផង​ដែរ​នា​ពេល​កន្លង​មក ។

5- អេ ភូ​ថង ៖ អតីត​កីឡាករ​ប្រដាល់​ល្បីឈ្មោះ​រូប​នេះ ក៏​មានមុខ​ថត​ស្ប៉ត​មិន​អន់​នោះ​ដែរ ក្នុង​ពេល​ដែល​លោក​ឡើង​កូដ ជា​ពិសេស​ស្ប៉ត​អប់រំ និង​ស្ប៉ត​ទាក់ទង​នឹង​ប្រភេទ​កីឡា ។

6- សែន រ៉ា​ឌី ៖ លោក​ក៏​មាន​តែម​មិន​អន់​ដែរ​ក្នុង​ស្ប៉ត​ពាណិជ្ជកម្ម ។ លោក​គឺជា​តំណាង​ផលិតផល​ភេសជ្ជៈ​ធំ​មួយ ហើយ​បើ​ទោះជា​ស្ប៉ត​មួយ​នោះ​យូរ​ៗ​ម្ដង​ទើប​ឃើញ​ផ្សាយ​នៅ​លើ​កញ្ចក់​ទូរទស្សន៍ មិន​គគ្រឹកគគ្រេង​ដូច​មុន ក៏​លោក​នៅ​តែ​ជា​តំណាង​នៅឡើយ​នៅ​ក្នុង​ពេល​នេះ​។  

7- ហែម​ថុ​ន វិ​ទិ​នី ៖ នាង​គឺជា Super Star ក្នុង​វិស័យ​ហែល​ទឹកជា​យូរ​មក​ហើយ ហើយ​បើ​ទោះជា​មិន​ទាន់​មានឱកាស​បាន​ធ្វើ​តំណាង​ឱ្យ​ផលិតផល​ធំ​ៗ​នៅឡើយ តែ​នាង​ក៏​មានមុខ​ក្នុង​ស្ប៉ត​ពាណិជ្ជកម្ម​ធំ​ៗ​ថ្នាក់​ជាតិ​ដែល​រៀបចំ​ដោយ​គណៈកម្មាធិការ​ជាតិ​អូ​ឡាំ​ពិ​ក​ផង​ដែរ ។ ក្នុង​នោះ​នាង​ក៏​ធ្លាប់​ថត​ស្ប៉ត​ឱ្យ​ក្រុមហ៊ុន​មួយ​កាលពី​ប៉ុន្មាន​ឆ្នាំ​មុន​ដែរ ។
ក្រៅពី​កីឡាករ​-​កីឡាការិនី​ទាំង​៧​រូប​ខាងលើ ក៏​មាន Super Stars មួយ​ចំនួន​ទៀត​ធ្លាប់​បង្ហាញមុខ​ក្នុង​ស្ប៉ត​ពាណិជ្ជកម្ម​បែប​នេះ​ផង​ដែរ ដោយ​គ្រាន់តែ​មិនសូវ​លេចធ្លោ​ខ្លាំង​ដូច​អ្នក​ទាំង​៧​ខាងលើ​ដែល​សុទ្ធតែ​មានមុខ​យ៉ាង​សកម្ម​លើ​កញ្ចក់​ទូរទស្សន៍​នា​ពេល​កន្លង​មក ៕

កីឡាជាតិ

អត្រាប្តូរប្រាក់

  • ប្រាក់រៀល (1USD)
  • KHR 4,048.00
អត្រាប្តូរប្រាក់ផ្សេងទៀត

Live

To Top

ការស្ទង់មតិគេហទំព័រថ្មី




Please leave this field empty.

សូម​អរគុណ