ចាប់បានចោរគាស់តូបលក់ដូរនៅក្នុងសាលារៀន៤នាក់
រាជធានីភ្នំពេញ ៖ ជនសង្ស័យវ័យក្មេង៤នាក់ចូលទៅគាស់តូបលក់ដូរនៅក្នុងសាលាបឋមសិក្សាជម្ពូវន្ត ត្រូវម្ចាស់គេទាន់ស្រែកថាចោរ ផ្អើលប្រជាពលរដ្ឋ និងសន្តិសុខព័ទ្ធចាប់បានទាំង៤នាក់
រាជធានីភ្នំពេញ ៖ ជនសង្ស័យវ័យក្មេង៤នាក់ចូលទៅគាស់តូបលក់ដូរនៅក្នុងសាលាបឋមសិក្សាជម្ពូវន្ត ត្រូវម្ចាស់គេទាន់ស្រែកថាចោរ ផ្អើលប្រជាពលរដ្ឋ និងសន្តិសុខព័ទ្ធចាប់បានទាំង៤នាក់ កាលពីវេលាម៉ោង១១និង២០នាទីយប់ ថ្ងៃទី១០ ខែតុលា ឆ្នាំ២០១៧ ស្ថិតនៅក្នុងសាលាបឋមសិក្សាជម្ពូវន្ត ស្ថិតនៅភូមិជម្ពូវន្ត សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មានពីជនរងគ្រោះជាម្ចាស់តូបបានឲ្យដឹងថា តូបរបស់គាត់លក់នំ និងរបស់របរក្មេងលេង និងសម្ភារសិក្សានៅក្នុងសាលាបឋមសិក្សាជម្ពូវន្ត ហើយគាត់លក់តែពេលថ្ងៃទេ យប់ឡើងបិទទ្វារចាក់សោទុក ទៅសម្រាកនៅផ្ទះនៅក្បែរសាលាដែរ ។ ជារៀងរាល់យប់ គាត់តែងតែទៅមើលតូបរបស់គាត់ក្នុងមួយយប់២ដងទៅ៣ដង ។ នៅយប់កើតហេតុ គាត់បានដើរទៅមើលតូបរបស់គាត់ដូចសព្វមួយដង ស្រាប់តែឃើញជនសង្ស័យមួយក្រុមមានគ្នា៤នាក់ កំពុងតែគាស់តូបរបស់គាត់ តែមិនទាន់បានលួចយករបស់របរនៅឡើយទេ គឺគាត់ទៅទាន់បានស្រែកថាចោរៗ ធ្វើឲ្យជនសង្ស័យភ័យរត់ចេញពីកន្លែងកើតហេតុ ភ្លាមៗនោះប្រជាពលរដ្ឋនាំគ្នាប្រដាប់ដោយដំបង កាំបិត មកជួយអន្តរសគមន៍ រួមនិងសន្តិសុខផ្សារជម្ពូវន្តផងដែរ បានឃាត់បានជនសង្ស័យចំនួន៤នាក់ ។
ជនសង្ស័យទាំង៤នាក់ខាងលើសុទ្ធតែជាក្មេងក្រោមអាយុ១៥ឆ្នាំទាំងអស់ បន្ទាប់ពីចាប់បាន ហើយប្រជាពលរដ្ឋបាននិយាយថា ពួកគាត់ស្អប់ណាស់ឈ្មោះថាចោរ តែដោយសាតែជនសង្ស័យខាងលើសុទ្ធតែក្មេងតូចៗ ទើបពួកគាត់មិនបានវាយតប់ទេ គ្រាន់តែសំណូមពរឲ្យក្មេងទាំងអស់ឈប់ធ្វើចោរទៀត ។
ក្រោយពេលកើតហេតុ ជនរងគ្រោះជាម្ចាស់តូបមិនទាន់បាត់បង់របស់របរនៅឡើយ ហើយម្យ៉ាងទៀតជនសង្ស័យសុទ្ធសឹងតែជាក្មេងអាយុក្រោម១៥ឆ្នាំផងនោះ គាត់មិនប្តឹងផ្តល់ទេ សុំឲ្យសមត្ថកិច្ចធ្វើការអប់រំ ហើយហៅអាណាព្យាបាលមកធ្វើកិច្ចសន្យា រួចឲ្យត្រលប់ទៅផ្ទះវិញ ៕
ចែករំលែកព័តមាននេះ