លួចម៉ូតូមិនបានសម្រេច រត់ទៅពួនក្នុងបន្ទប់ទឹកពហុកីឡាដ្ឋាន
ខេត្តពោធិ៍សាត់ ៖ ចោរលួចម៉ូតូមិនបានសម្រេចម្នាក់បានត្រូវអ្នកស្រុកអ្នកភូមិដេញប្រផាប់ចាប់ប្រភីង
ខេត្តពោធិ៍សាត់ ៖ ចោរលួចម៉ូតូមិនបានសម្រេចម្នាក់បានត្រូវអ្នកស្រុកអ្នកភូមិដេញប្រផាប់ចាប់ប្រភីងទាំងកណ្ដាលថ្ងៃរហូតចាប់ខ្លួនបាន ខណៈដែលចូលទៅសម្ងំក្នុងបង្គន់អនាម័យរបស់ពហុកីឡាដ្ឋានខេត្ត។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង២រសៀល ថ្ងៃទី១០ ខែតុលា ឆ្នាំ២០១៧នេះ នៅផ្សារចាស់ទល់មុខសាលាបឋមសិក្សាពោធិ៍សាត់ ស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់។ ម៉ូតូដែលចោរបម្រុងលួចនោះម៉ាកហុងដាវ៉េវ ពណ៌ខ្មៅ ពាក់ស្លាកលេខ ពោធិ៍សាត់ 1A.8896 ជាកម្មសិទ្ធិរបស់ប្រជាពលរដ្ឋឈ្មោះ សា សុខខេង ភេទស្រី អាយុ៣៨ឆ្នាំ រស់នៅភូមិសង្កាត់កើតហេតុខាងលើ។ តាមការរៀបរាប់របស់ស្ត្រីជាម្ចាស់ម៉ូតូបានឲ្យដឹងថា នៅរសៀលនោះគាត់ជិះម៉ូតូត្រលប់មកពីផ្សារ។
ពេលមកដល់ផ្ទះបានចាក់សោកម៉ូតូ ហើយដាក់នៅខាងមុខផ្ទះដូចសព្វដងរួចហើយក៏ដើរចូលទៅក្នុងផ្ទះ។ ទើបតែដើរចូលបានបីបួនជំហ៊ានស្រាប់តែមានបុរសម្នាក់ស្លៀកពាក់ខោអាវកីឡាដៃខ្លីពណ៌ខៀវ និងពាក់ម៉ាស់ទៀត បានមកអូសម៉ូតូរបស់គាត់បម្រុងលួច ប៉ុន្តែដោយសារជាប់សោកអូសចេញមិនរួចបុរសនោះក៏ទុកចោលហើយរត់ចូលទៅក្នុងបរិវេណសាលាបឋមសិក្សាពោធិ៍សាត់ដើម្បីគេចខ្លួន។ ភ្លាមៗនោះគាត់បានស្រែកចោរៗ….ឮដូច្នេះអ្នកជិតខាងបួនប្រាំនាក់បានដេញប្រផាប់ចាប់ប្រភីងរហូតរត់ឆ្លងចូលទៅក្នុងបរិវេណពហុកីឡាដ្ឋានខេត្តដែលនៅជាប់របងសាលាបឋមសិក្សានោះ។ ពេលចូលទៅដើររកក្នុងពហុកីឡាដ្ឋានខេត្តមិនឃើញសោះ ប៉ុន្តែមានបង្គន់អនាម័យមួយជាប់គន្លឹះខាងក្នុងយូរមិនឃើញមនុស្សចេញមកសោះ។
ដោយមានការសង្ស័យក៏ទូរស័ព្ទប្រាប់ទៅលោកមេប៉ុស្ដិ៍រដ្ឋបាលផ្ទះព្រៃ និងកម្លាំងប្រជាការពារឲ្យមកជួយធ្វើអន្តរាគមន៍។ ពេលសមត្ថកិច្ចមកដល់បានស្រែកឲ្យអ្នកនៅខាងក្នុងនោះបើកទ្វារជាបន្ទាន់ ទើបជននោះព្រមបើក។ ពេលបើកមកឃើញបុរសនោះអង្គុយឈ្ងោកមុខស្លៀកតែខោលីអូប៉ុណ្ណោះ ហើយសមត្ថកិច្ចបានរកឃើញខោអាវកីឡាពណ៌ខៀវ និងម៉ាស់ពណ៌ខ្មៅដែលគេពាក់ធ្វើសកម្មភាពបម្រុងលួចម៉ូតូទម្លាក់ទៅបង្គន់អនាម័យជាប់គ្នានោះក៏ចាប់វ៉ៃខ្នោះតែម្ដង។
លោកអនុសេនីយ៍ឯក ប៉ិច ស៊ីផាន់ នាយប៉ុស្ដិ៍រដ្ឋបាលផ្ទះព្រៃឲ្យដឹងថា ជនសង្ស័យដែលឃាត់ខ្លួននេះឈ្មោះ យឹម អ៊ាក ភេទប្រុស អាយុ២៥ឆ្នាំ រស់នៅស្រុកក្រគរ ជាមុខសញ្ញាចាស់ទើបតែចេញពីពន្ធនាគារ។លោកឲ្យដឹងថា ក្នុងរយៈពេលប្រហែលមួយខែនេះនៅក្នុងក្រុងពោធិ៍សាត់មានករណីចោរលួចម៉ូតូប៉ុន្មានករណីមកហើយរកមិនឃើញសោះ។ លោកសូមឲ្យបងប្អូនប្រជាពលរដ្ឋចូលរួមជាមួយកម្លាំងប្រជាការពារ និងសមត្ថកិច្ចគ្រប់លំដាប់ថ្នាក់ដើម្បីភូមិឃុំសង្កាត់មានសុវត្ថិភាព។ ជនសង្ស័យបានបញ្ជូនទៅកាន់អធិការដ្ឋាននគរបាលក្រុងពោធិ៍សាត់ ដើម្បីសួរនាំស្រាវជ្រាវរកមុខសញ្ញាផ្សេងទៀត និងបង្កសំណុំរឿងបញ្ជូនទៅសាលាដំបូង៕
ចែករំលែកព័តមាននេះ