បើនៅតែមិនស្ដាប់គ្នា ត្រូវទម្លាក់ស្លាកចោលបិទអាជីវកម្មរួចចុះក្នុងបញ្ជីខ្មៅ
រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ បានអញ្ជើញក្រុមអ្នករកស៊ីបើកហាងស៊ីផឹក និងហាងខារ៉ាអូខេ
រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ បានអញ្ជើញក្រុមអ្នករកស៊ីបើកហាងស៊ីផឹក និងហាងខារ៉ាអូខេ
រាជធានីភ្នំពេញ ៖ អាជ្ញាធរខណ្ឌពោធិ៍សែនជ័យ បានអញ្ជើញក្រុមអ្នករកស៊ីបើកហាងស៊ីផឹក និងហាងខារ៉ាអូខេ KTV ក្លឹបកម្សាន្តជាដើម ដើម្បីចូលរួមប្រជុំ ទទួលនូវគោលការណ៍មួយចំនួនដើម្បីបញ្ចៀសឲ្យបាន រាល់ភាពអនាធិបតេយ្យ និងទំនាស់ដែលតែងតែកើតឡើងជាបន្តបន្ទាប់ក្នុងពេលកន្លងមក ជាពិសេសទំនាស់វាយតប់គ្នា ដែលផ្ដើមចេញពីការដណ្ដើមម៉ូយ និងហាងកោសជប់ម៉ាស្សាវិញបានបន្លំលួចលុយភ្ញៀវជាបន្តបន្ទាប់ហាក់គ្មានការខ្មាសអៀន និងខ្លាចច្បាប់សោះឡើយ។ ដែលកន្លងមកអាជ្ញាធរធ្លាប់បានចុះបិទហាង ដែលមានទំនាស់ជាច្រើនមកហើយ ប៉ុន្តែដោយសារតែមានការយោគយល់ ក្រោយពីការធ្វើកិច្ចសន្យារួចបានអនុញ្ញាតឲ្យបើករកស៊ីឡើងវិញ ដោយសង្ឃឹមថាពួកគាត់កែខ្លួន តែផ្ទុយទៅវិញមិនត្រឹមតែមិនគោរពកិច្ចសន្យា និងការណែនាំប៉ុណ្ណោះទេរឹតតែផ្គើនថែមទៀតផង។ ក្រោយពីការប្រជុំណែនាំនេះរួចប្រសិនបើហាងណាមួយមិនព្រម គោរពតាមការណែនាំ បង្ករឿងបន្តទៀតនោះនឹងត្រូវទម្លាក់ស្លាកចោល ព្រមទាំងបិទរហូតលែងឲ្យបើកវិញ និងចុះចូលទៅក្នុងបញ្ជីខ្មៅរបស់ខណ្ឌតែម្ដង។
ពិធីនោះបានធ្វើឡើងកាលពីវេលាល្ងាចថ្ងៃទី១០ ខែតុលា ឆ្នាំ២០១៧ នៅក្នុងសាលប្រជុំធំរបស់សាលាខណ្ឌពោធិ៍សែនជ័យ ក្រោមការដឹកនាំដោយលោក ហែម ដារិទ្ធិ អភិបាលខណ្ឌ ដោយមានការអញ្ជើញចូលរួមពីសំណាក់ លោក លោកស្រី ដែលជាអភិបាលរងខណ្ឌ មន្ត្រីរាជការការិយាល័យ ចំណុះខណ្ឌ លោកអធិការរងនគរបាលខណ្ឌ លោកមេបញ្ជាការរងកងរាជអាវុធហត្ថខណ្ឌ លោកនាយប៉ុស្ដិ៍នគរបាលមួយចំនួន និងម្ចាស់ហាងចំនួនជាង៦០នាក់ផងដែរ។ តាមប្រភពព័ត៌មានបានឲ្យដឹងថា ក្រុមអ្នកបើកហាងផឹកស៊ី និងខារ៉ាអូខេ KTV ព្រមទាំងក្លឹបកម្សាន្ត ដែលត្រូវអញ្ជើញឲ្យចូលរួមប្រជុំដើម្បីដុសក្អែលខាងលើនោះ មានទីតាំងស្ថិតនៅតាមបណ្ដោយផ្លូវលេខ២០០៤ ស្ថិតនៅក្នុងសង្កាត់ចំនួន៣របស់ខណ្ឌ ក្នុងនោះមានសង្កាត់កាកាប សង្កាត់ចោមចៅ និងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។ ដែលនៅក្នុងពេលកន្លងមកហាងដែលបង្ករឿងវាយតប់គ្នាញឹកញាប់ បង្កឲ្យមានភាពអនាធិបតេយ្យ ព្រទាំងធ្វើឲ្យបាត់បងសណ្ដាប់ធ្នាប់ បង្កការភ័យខ្លាច និងរំខានដល់ប្រជាពលរដ្ឋដែលរស់នៅក្បែរខាងជាបន្តបន្ទាប់នោះ គឺហាងនៅតាមបណ្ដោយផ្លូវលេខ២០០៤ ភូមិត្រពាំងល្វា សង្កាត់កាកាបតែម្ដង ចំណែកឯហាងកោសជប់ម៉ាស្សាវិញ គ្រប់កន្លែងដែលបានធ្វើឲ្យអាជ្ញាធរ និងសមត្ថកិច្ចឈឺក្បាលមិនតិចដែរ ព្រោតែបានបន្លំដូរ និងលួចលុយភ្ញៀវមិនស្វាង និងគ្មានការខ្មាសអៀនបន្តិចណាសោះ។
ប្រភពដដែលបានបន្តទៀតថា ការដែលមានទំនាស់វាយតប់គ្នាដែលបានកើតឡើងនៅតាមហាងផឹកស៊ី និងខារ៉ាអូខេ KTVនោះផ្ដើមចេញពីការដណ្ដើមម៉ូយគ្នា មិនតែប៉ុណ្ណោះម្ចាស់ហាងទាំងនោះបានបណ្ដែតបណ្ដោយឲ្យបុគ្គលិករបស់ខ្លួនរត់ដេញចាប់ម៉ូយតាមផ្លូវយ៉ាងប្រសេចប្រសាច ប៉ះពាល់ដល់សណ្ដាប់ធ្នាប់ចរាចរណ៍តាមផ្លូវ និងរំខានអ្នកជិតខាង។ ជាងនេះទៀតក៏ត្រូវបានអាជ្ញាធរខណ្ឌខាងលើ ធ្លាប់បានប្រមូលម្ចាស់ហាងទាំងនោះទៅប្រជុំណែនាំជាច្រើនលើករាប់មិនអស់មកហើយ និងបានចុះបិទចំពោះហាងដែលល្មើសជាបន្តបន្ទាប់មកហើយដែរ ប៉ុន្តែដោយមានការយោគយល់ មនោសញ្ចេតនាជាមួយពួកគាត់ទើបអនុញ្ញាតឲ្យបើកឡើងវិញ ក្រោយពេលធ្វើកិច្ចសន្យារួច។ ប៉ុន្តែពួកគាត់មិនដែលស្ដាប់ និងអនុវត្តតាមឡើយ ទើបពេលនេះហៅប្រជុំជាលើកចុងក្រោយបើនៅតែល្មើសទៀត នឹងត្រូវទម្លាក់ស្លាកចោលហើយបិទចោលលែងឲ្យបើកវិញរហូត ឲ្យពួកគាត់ទៅរកស៊ីនៅកន្លែងណាក៏ទៅចុះ ឲ្យតែក្រៅពីខណ្ឌពោធិ៍សែនជ័យ ព្រមទាំងចុះនៅក្នុងបញ្ជីខ្មៅរបស់ខណ្ឌតែម្ដង៕
ចែករំលែកព័តមាននេះ