ព្រះមហាក្សត្រថៃដង្ហែអង្គកឋិនទានចូលវត្តចិនដំដែក
រាជធានីភ្នំពេញ ៖ អង្គកឋិនទានព្រះរាជទ្រព្យរបស់ព្រះមហាក្សត្រថៃដង្ហែចូលវត្តព្រះពុទ្ធ
រាជធានីភ្នំពេញ ៖ អង្គកឋិនទានព្រះរាជទ្រព្យរបស់ព្រះមហាក្សត្រថៃដង្ហែចូលវត្តព្រះពុទ្ធ ឃោសាចារ្យហៅវត្តដំដែកខាងត្បូង ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ នាព្រឹកថ្ងៃទី៩ ខែតុលា ឆ្នាំ២០១៧ ។
អង្គកឋិនទានព្រះរាជព្រទ្យនេះដឹកនាំដោយព្រះរាជតំណាងដ៏ខ្ពង់ខ្ពស់របស់ព្រះមហាក្សត្រថៃ លោកនាយឧត្តមសេនីយ៍ឯកធៈណៈស័ក្តិ បតិម៉ាប្រៈកន ឧបនាយករដ្ឋមន្ត្រីថៃ ព្រមទាំងមានការចូលរួមពីសម្តេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាមួយវត្តមានរបស់មន្ត្រីស្ថានទូតថៃប្រចាំកម្ពុជា មន្ត្រីក្រសួងការបរទេសកម្ពុជា អស់លោក លោកស្រី ជាសមាជិករាជរដ្ឋាភិបាលកម្ពុជា និងពុទ្ធបរិស័ទចំណុះជើងវត្តយ៉ាងច្រើនកុះករ។ ពិធីនោះក៏មានព្រះរាជវត្តមានសម្ដេចព្រះអគ្គមហាសង្ឃរាជាធិបតីទេព វង្ស សម្ដេចព្រះមហាសង្ឃរាជនៃព្រះរាជាណាចក្រកម្ពុជាយាងចូលរួមផងដែរ ។
ព្រះរាជពិធីបុណ្យបានប្រព្រឹត្តទៅតាមគន្លងទំនៀមទម្លាប់ប្រពៃណីព្រះពុទ្ធសាសនា ដោយបានប្រារព្ធព្រះរាជពិធីដង្ហែអង្គកឋិនទានព្រះរាជទ្រព្យ ជុំវិញព្រះវិហារ និងថ្វាយគ្រឿងសក្ការបូជាចំពោះព្រះពុទ្ធរូបស្នងអង្គព្រះសម្មាសម្ពុទ្ធ ព្រះបរមគ្រូនៃយើង និងបានប្រារព្ធនូវបទនមស្ការព្រះរតនត្រ័យ ថ្វាយបង្គំព្រះ សមាទានសីល ដើម្បីគោរពរំឭកដល់គុណបុណ្យ ព្រះរតនត្រ័យ កែវទាំងបី មានព្រះពុទ្ធ ព្រះធម៌ និងព្រះសង្ឃ ។ ក្រោយពីក្បួនដង្ហែព័ទ្ធជុំវិញ ព្រះវិហារ រួចយកត្រៃចីវរអង្គកឋិនព្រះរាជទាន និងគ្រឿងបរិក្ខារពីព្រះមហាក្សត្រថៃ រៀបចំវេរប្រគេនព្រះសង្ឃ រួចមក លោកនាយឧត្តមសេនីយ៍ឯកធៈណៈស័ក្តិ បតិម៉ាប្រៈកន ឧបនាយករដ្ឋមន្ត្រីថៃ បានអានប្រកាសអំពីព្រះទ័យជ្រះថ្លារបស់ព្រះមហាក្សត្រថៃ ដែល តែងតែមានបំណងចូលរួមលើកស្ទួយវិស័យព្រះពុទ្ធសាសនា ដែលប្រទេសថៃ និងកម្ពុជា គោរពចំពោះព្រះពុទ្ធសាសនា តាមប្រពៃណីដូចគ្នាតាំងពីយូរលង់ណាស់មកហើយ ។
បច្ច័យដែលទទួលបានក្នុងពិធីបុណ្យកឋិនទាននេះមានចំនួន៩.៥៤៥ ដុល្លារអាមេរិក និងលុយបាត ចំនួន៥៨៣.៣២០បាត និង ១៣.២២៩.៤០០រៀល ។
ព្រះមហាក្សត្រថៃ តែងតែបានដង្ហែអង្គកឋិនទានព្រះរាជទ្រព្យ មកកាន់ប្រទេសកម្ពុជា ជារៀងរាល់ឆ្នាំ តាមរយៈក្រសួងការបរទេសថៃ ដើម្បីផ្សារភ្ជាប់ចំណងមិត្តភាព រវាងព្រះពុទ្ធសាសនា និងដើម្បីសម្ព័ន្ធមេត្រីភាពរវាងប្រជាជន និងប្រជាជននៃប្រទេសទាំងពីរ ។ នេះជាលើកទី១៩ ដែលបានរៀបចំអង្គកឋិនទាន ៕
ចែករំលែកព័តមាននេះ