ទើបបង់ថ្លៃឱ្យសាលាអន្តរជាតិ(Stamford) គេបិទទ្វារអត់ប្រាប់មួយម៉ាត់
រាជធានីភ្នំពេញ ៖ អាណាព្យាបាលសិស្សតូចៗប្រមាណជា៥០នាក់
រាជធានីភ្នំពេញ ៖ អាណាព្យាបាលសិស្សតូចៗប្រមាណជា៥០នាក់
រាជធានីភ្នំពេញ ៖ អាណាព្យាបាលសិស្សតូចៗប្រមាណជា៥០នាក់ បាននាំគ្នាមកដាក់ពាក្យបណ្តឹងនៅប៉ុស្តិ៍រដ្ឋបាលនគរបាលស្ទឹងមានជ័យ ទាមទារឱ្យសមត្ថកិច្ចជួយរកយុត្តិធម៌ លើករណីសាលាអន្តរជាតិ Stamford ដែលបានបិទទ្វារដោយមិនដឹងមូលហេតុ ក្រោយពួកគាត់បានបង់ប្រាក់ថ្លៃការសិក្សាររបស់កូនៗ ចន្លោះពី៥០០ដុល្លារ ដល់២០០០ដុល្លារ ។ មុនពេលមកដាក់ពាក្យបណ្តឹងនៅប៉ុស្តិ៍នគរបាល ក្រុមអាណាព្យាបាលបានប្រមូលម្តុំគ្នានៅមុខទីតាំងសាលាតែម្តង ស្ថិតក្នុងភូមិមានជ័យ សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង៧ព្រឹកថ្ងៃទី១០ តុលា ឆ្នាំ២០១៧ ។
តាមប្រភពព័ត៌មានពីក្រុមអាណាព្យាបាលសិស្សខាងលើឱ្យដឹងថា កូនពួកគាត់ម្នាក់ៗ សុទ្ធសឹងតែរៀននៅសាលានេះ ចាប់ពី៤ ទៅ៥ឆ្នាំកន្លងមកហើយ ពុំដែលមានបាតុភាពអ្វីឡើយ ។ ពួកគាត់លើកឡើងថា ចំពោះស្តង់ដានៃការបង្រៀន គឺមានគុណភាពល្អ ទាំងការអប់រំ និងចំណេះដឹងដល់កុមារតូចៗ ពិសេសកូនៗរបស់ពួកគាត់ផ្ទាល់ ដែលមានអាយុចាប់ពី៥ឆ្នាំ ដល់១០ឆ្នាំ ។ កាលពីវេលាថ្ងៃទី៩ ខែតុលា ឆ្នាំ២០១៧ ម្សិលមិញ ក្រុមអាណាព្យាបាលក្មេងៗ បានមកទទួលកូនចាកចេញពីសាលាត្រឡប់ទៅផ្ទះធម្មតា ពុំមានរឿងអ្វីឡើយ ហើយសាលាក៏ពុំបានផ្តល់ព័ត៌មានអ្វីឡើយ ។ លុះវេលាព្រឹកឡើង នៅពេលដែលពួកគាត់ជូនកូនមកសិក្សា ស្រាប់តែសាលាត្រូវបានបិទទ្វារដោយមិនដឹងមូលហេតុ ពិសេសនោះ សាខាធំៗចំនួន២ផ្សេងទៀតរបស់សាលានេះ ដែលមានទីតាំងក្នុងខណ្ឌសែនសុខ និងខណ្ឌឬស្សីកែវ ក៏ត្រូវបានបិទទ្វារទន្ទឹមគ្នាផងដែរ ជាហេតុធ្វើអោយពួកគាត់បង្កការឆោរឡោរនៅមុខសាលា រហូតភ្ញាក់ផ្អើលដល់កម្លាំងសមត្ថកិច្ចចុះសាកសួរនាំទើបដឹងថា ម្ចាស់សាលាបានបិទទ្វាររត់បាត់ទៅហើយ ។ប្រភពក្រៅផ្លូវការណ៍អោយដឹងថា ការបិទគឺដោយសារម្ចាស់សាលាដែលជាជនជាតិហ្វីលីពិន ជំពាក់បំណុលគេច្រើន ។
ក្រុមអាណាព្យាបាលសិស្សដដែលបាននាំគ្នាបន្តថា សាលាអន្តរជាតិនេះមួយ ជាសាលាដែលមានឈ្មោះល្បី និងធ្លាប់ឈានទៅដល់ការប្រកួតប្រជែងសមត្ថភាពលើឆាកអន្តរជាតិ លើជំនាញផ្សេងៗរបស់កុមារនៅតាមបណ្តាប្រទេសជាច្រើន ដូចជាសិង្ហបុរី ជាដើម ។ ពួកគាត់បន្ថែមថា ក្នុងរៀងរាល់កន្លះឆ្នាំ ឬ១ឆ្នាំម្តង ពួកគាត់ត្រូវចំណាយថ្លៃការសិក្សាររបស់កូនៗចាប់ពី៥០០ដុល្លារ ដល់២០០០ដុល្លារ ទៅតាមកម្រិតរបស់កុមារ ពីថ្នាក់តូចដល់ថ្នាក់ធំ បូករួមទាំងការសិក្សាទាំងអក្សរខ្មែរ និងអង់គ្លេសផងដែរ ។
យ៉ាងណាមិញ ក្រុមអាណាព្យាបាលនៅតែមិនយល់ពីមូហេតុអ្វីដែលនាំឱ្យម្ចាស់សាលាបិទទ្វារបែបនេះ ទាំងសាលាជាសាលាដែលល្អសម្រាប់ក្មេងៗសិក្សារៀនសូត្រ ហើយក៏ជាសាលា ដែលពុំធ្លាប់មានបាតុភាពអាក្រក់អ្វីផងដែរនោះ ។
ចែករំលែកព័តមាននេះ