តើការទិញសិទ្ធិធ្វើអាជីវកម្មពីបរទេសផ្តល់ប្រយោជន៍អ្វីខ្លះដល់កម្ពុជា ?
រាជធានីភ្នំពេញ ៖ ស្របពេលរាជរដ្ឋាភិបាលកម្ពុជា បានបើកចំហដល់ការវិនិយោគលើវិស័យនានាក្នុងរយៈពេល
រាជធានីភ្នំពេញ ៖ ស្របពេលរាជរដ្ឋាភិបាលកម្ពុជា បានបើកចំហដល់ការវិនិយោគលើវិស័យនានាក្នុងរយៈពេលប្រមាណ១ទសវត្សរ៍នេះ ការនាំចូល Franchise (សិទ្ធិអាជីវកម្ម) មកធ្វើអាជីវកម្មនៅកម្ពុជាបានកើនឡើងជាបន្តបន្ទាប់ ក្នុងនោះមានទាំងភេសជ្ជៈ និងអាហារ។ ការនាំចូល Franchise យីហោល្បីៗមកនេះ តើវាបានផ្ដល់ប្រយោជន៍អ្វីខ្លះដល់កម្ពុជា ?
លោក ងន សាំង អគ្គនាយកក្រុមហ៊ុន អអិមអេ ខេមបូឌា ដែលជាក្រុមហ៊ុនមួយបាននាំចូល Franchise ភោជនីយដ្ឋាន និងភេសជ្ជៈ បានឱ្យដឹងថា ប្រទេសណា ក៏ដូចប្រទេសណាដែរ បើសិនជាសេដ្ឋកិច្ចមានអំណោយផលល្អ គេតែងតែឃើញអាជីវកម្ម Franchise ចាប់ផ្ដើមចូលធ្វើអាជីវកម្ម ។ សម្រាប់ប្រទេសកម្ពុជា ក៏មិនខុសគ្នាដែរ ដោយសារតែជីវភាព និងប្រាក់ចំណូលប្រជាពលរដ្ឋល្អប្រសើរជាងមុន អាជីវកម្មនេះ ក៏បានចូលមកជាបន្តបន្ទាប់ ទាំង Franchise ម្ហូបអាហារ ភេសជ្ជៈ និងអាជីវកម្មផ្សេងៗទៀត ។ លោកថា ៖« ថ្វីដ្បិតតែកន្លងមក មានអាជីវកម្ម Franchise មួយចំនួនបានមកដល់កម្ពុជា ហើយត្រឡប់ទៅវិញ ដោយសារតែ Franchise នោះ មិនត្រូវទៅតាមតម្រូវការរបស់ប្រជាពលកម្ពុជាយើង ។ ក្នុងនោះក៏ឃើញមាន Franchise ជាច្រើនហើយដែរ ដែលទទួលបានជោគជ័យ និងការគាំទ្រពីពលរដ្ឋខ្មែរ ព្រោះគេបានសិក្សាច្បាស់ពីតម្រូវការ និងបរិបទទីផ្សារនៅក្នុងប្រទេសកម្ពុជា » ។
លោកបន្តថា ការចូលមកដល់នៃ Franchise បរទេសមកកាន់កម្ពុជា វាមិនអត់ប្រយោជន៍ទេ គឺបានផ្តល់អត្ថប្រយោជន៍ជាច្រើនដល់កម្ពុជា និងប្រជាពលរដ្ឋ ។ ឧទាហរណ៍ ក្រុមហ៊ុន អអិមអេ ខេមបូឌា រហូតមកដល់ពេលនេះ បាននាំចូល Franchise បរទេសមកកម្ពុជា ចំនួន៧ម៉ាកយីហោហើយ ក្នុងនោះមានសាខាសរុបទាំងអស់ជាង៦០កន្លែង និងផ្តល់ការងារទាំងផ្ទាល់ និងប្រយោល ។ លោកថា ៖« ក្រុមហ៊ុនបានផ្តល់ការងារផ្ទាល់ដល់បុគ្គលិកជនជាតិខ្មែររាប់ពាន់នាក់ និងទទួលបានប្រាក់បៀវត្សរ៍សមរម្យ ។ ក្រៅពីនោះ ក្រុមហ៊ុនបានប្រើប្រាស់វត្ថុធាតុដើមប្រមាណ៥០% ដែលផលិតក្នុងស្រុកដើម្បីផ្គត់ផ្គង់ភោជនីយដ្ឋាន » ។
លោក ហេង សេងលី នាយកគ្រប់គ្រងទូទៅនៃក្រុមហ៊ុនផាកកាហ្វេ ក៏បានឱ្យដឹងដែរថា ការចូលមកដល់នៃម៉ាកយីហោពីបរទេស ឬហៅថា Franchise នេះ វាបានបង្រៀនមនុស្សឲ្យចេះចាយ ហើយចេះរកលុយ ។ លោកថា ៖«កាលពីមិនទាន់មាន Franchise មកដល់កម្ពុជា យើងមិនសូវមានការវិនិយោគ ឬជួបជជែកគ្នានៅហាងស្តង់ដាប៉ុន្មានទេ តែនៅពេលមានហាងត្រឹមត្រូវស្របតាមស្តង់ដា ស្អាត និងមានកន្លែងសម្រាប់ជជែកគ្នាស្រួល ពួកគាត់បានយកទីតាំងនោះសម្រាប់ជាកន្លែងការងារផង និងទទួលទានអាហារ ឬភេសជ្ជៈផង » ។
លោកបន្តថា ការនាំចូល Franchise បរទេសមកកាន់កម្ពុជាមិនអត់ប្រយោជន៍ទេ បើទោះជាវាប្រកួតប្រជែងជាមួយម៉ាកយីហោក្នុងស្រុកបន្តិចក្តី ។ តួយ៉ាង ក្នុងបរិបទប្រទេសកម្ពុជា កាលពីប៉ុន្មានឆ្នាំមុននេះបន្តិច យុវវ័យខ្មែរភាគតិចណាស់ដែលចេះញ៉ាំកាហ្វេ តែក្រោយពេល Franchise បរទេសចូលមក ឃើញថា យុវវ័យសម័យនេះមួយភាគធំចេះញ៉ាំកាហ្វេ ហើយពួកគាត់ញ៉ាំកាហ្វេដោយមិនរើសពេលវេលាដូចចាស់ៗបុរាណនោះទេ ដែលភាគច្រើនចូលចិត្តទទួលទានពេលព្រឹក ។
លោកបន្ថែមថា ការធ្វើអាជីវកម្មនាំ Franchise ពីបរទេសមកក្តី ឬធ្វើអាជីវកម្មដោយបង្កើតម៉ាកយីហោផ្ទាល់ខ្លួនក្តី បើសិនជាម្ចាស់អាជីវកម្មនោះគ្មានវិធីទាក់ទាញអតិថិជន ឬគ្មានអ្វីផ្ដល់ជូនអតិថិជនទេ វានឹងពិបាកជោគជ័យណាស់ ។ ជាក់ស្ដែង អាជីវកម្មដូចគ្នា តែមួយធំ មួយតូច ពេលខ្លះអាជីវកម្មតូចក៏អាចទទួលបានប្រាក់ចំណូលច្រើនជាងអាជីវកម្មធំ និងទទួលបានជោគជ័យជាងអាជីវកម្មធំៗផងដែរ ៕
ចែករំលែកព័តមាននេះ