ហាមឃាត់សាច់ជ្រូកគ្មានប្រភពច្បាស់លាស់ ដើម្បីការពារសុខភាពពលរដ្ឋ
យោងតាមគណៈកម្មាធិការប្រជាជនក្រុងបានឱ្យដឹងថា
ទីក្រុងហូជីមិញ ៖ យោងតាមគណៈកម្មាធិការប្រជាជនក្រុងបានឱ្យដឹងថា សាច់ជ្រូកមិនបញ្ជាក់ពីប្រភពដើម នឹងត្រូវហាមឃាត់ការលក់ក្នុងទីផ្សារលក់ដុំទាំង២របស់ទីក្រុងហូជីមិញ គឺ Binh Dien និង Hoc Mon ចាប់ពីថ្ងៃទី១៦ តុលា តទៅ ។
លោក Tran Vinh Tuyen អនុប្រធានគណៈកម្មាធិការប្រជាជន បានដឹកនាំមន្ទីរ និងវិស័យពាក់ព័ន្ធសហការយ៉ាងជិតស្និទ្ធដើម្បីតាមដានប្រភពសាច់ជ្រូក ។
លោកបានណែនាំដល់មន្ទីរយុត្តិធម៌ ឧស្សាហកម្ម ពាណិជ្ជកម្ម និងក្រុមប្រឹក្សាភិបាលគ្រប់គ្រងសុវត្ថិភាពចំណីអាហារ ដើម្បីគាំទ្រការគ្រប់គ្រងទីផ្សារទាំង២ និងហាមឃាត់សាច់ជ្រូកដែលគ្មានប្រភពដើមដូចចែងក្នុងកម្មវិធី ។
លោកបានចាត់តាំងនាយកដ្ឋានគ្រប់គ្រងទីផ្សារ និងនគរបាល ឱ្យធ្វើការជាមួយខេត្ត Long An និងអាជ្ញាធរពាក់ព័ន្ធដទៃ ចំពោះវិធានការតឹងរ៉ឹងជាមួយឈ្មួញដែលដឹកជញ្ជូនសាច់ជ្រូកទៅកាន់ទីក្រុង ដោយគ្មានអាជ្ញាប័ណ្ណ វិក្កយបត្រ និងឯកសារផ្សេងទៀត ហើយបង្ក្រាបការក្លែងបន្លំដូចជា ការបញ្ចូលទឹកទៅក្នុងខ្លួនជ្រូកដើម្បីបង្កើនទម្ងន់ជាដើម ។
លោកបានបញ្ជាឱ្យភ្នាក់ងារពាក់ព័ន្ធ និងផ្សារលក់ដុំទាំងពីរបង្ក្រាបឈ្មួញដែលមិនគោរពតាមបទប្បញ្ញត្តិ ។ លោកបន្តថា ទីក្រុងនេះនឹងបន្តឧបត្ថម្ភធន៥០%នៃការចំណាយ ដើម្បីបញ្ជាក់ពីអត្តសញ្ញាណសម្រាប់គ្រួសារតូចៗ និង១០០%ចំពោះក្រុមសហប្រតិបតិ្តការ រហូតដល់ថ្ងៃទី៣១ ធ្នូ ឆ្នាំនេះ ។
លោកនិយាយថា ការតាមដានប្រភពដើមផលិតផលម្ហូបអាហារ គឺមានសារសំខាន់ណាស់សម្រាប់ការពារសុខភាពពលរដ្ឋវៀតណាម។ លោកថា ៖« ទីក្រុងនេះ គឺជាអ្នកត្រួសត្រាយអនុវត្តកម្មវិធីដំបូង ហើយបញ្ហាប្រឈម គឺមិនអាចចៀសផុតឡើយ ។ ដូច្នេះ មន្ទីរ និងភ្នាក់ងារពាក់ព័ន្ធចាំបាច់ត្រូវអត់ធ្មត់ និងផ្សព្វផ្សាយកម្មវិធីនេះជាសាធារណៈដើម្បីធានាថា អតិថិជន និងភាគីពាក់ព័ន្ធយល់ច្បាស់ពីគោលបំណងរបស់រដ្ឋាភិបាល » ៕
ចែករំលែកព័តមាននេះ