លោកយាយ៨២ឆ្នាំបានទទួលអំណោយបំបាត់ការស្រេកឃ្លាន
ខេត្តស្វាយរៀង ៖ ក្រោយ កោះសន្តិភាព ចេញផ្សាយស្តីពីលោកយាយទុរគតមួយរូប
ខេត្តស្វាយរៀង ៖ ក្រោយ កោះសន្តិភាព ចេញផ្សាយស្តីពីលោកយាយទុរគតមួយរូប
ខេត្តស្វាយរៀង ៖ ក្រោយ «កោះសន្តិភាព» ចេញផ្សាយស្តីពីលោកយាយទុរគតមួយរូបឈ្មោះ មាស ខុន អាយុ៨២ឆ្នាំ រស់នៅភូមិថ្លា ឃុំគោកព្រីង ស្រុកស្វាយជ្រំ ខេត្តស្វាយរៀង មានជីវភាពដុនដាបខ្លាំងណាស់ ស្រេកឃ្លាននូវម្ហូបឆ្ងាញ់ ដោយបានអំពាវនាវសុំសប្បុរសជនជួយផង មកការិយាល័យនិពន្ធ «កោះសន្តិភាព» ព្រឹកថ្ងៃទី៨ ខែតុលា បានទទួលអំណោយពីសប្បុរសជនមួយរូប គឺកញ្ញា ពេជ្រ នារី និងក្រុមញាតិចំនួនប្រាក់១០ម៉ឺនរៀល សុំឱ្យជួយយកទៅជូនលោកយាយ មាស ខុន ផង ។
ក្រោយពេលទទួលអំណោយបានភ្លាម ទីចាត់ការសារព័ត៌មាន «កោះសន្តិភាព» បានវេរប្រាក់នោះឆ្ពោះទៅតំណាងនៅខេត្តស្វាយរៀងភ្លាមដែរ ។
ព្រឹកថ្ងៃទី០៩ តុលា លោកវ៉ាន់ ប៊ុនធឿន អ្នកឆ្លើយឆ្លងព័ត៌មានប្រចាំខេត្តស្វាយរៀង បានយកអំណោយរបស់កញ្ញា ពេជ្រ នារី និងក្រុមញាតិទៅជូនលោកយាយ មាស ខុន ដោយផ្ទាល់ដៃនៅមុខខ្ទមដ៏តោកយ៉ាករបស់គាត់ ដោយមានសាច់ញាតិជិតខាងចូលរួមដោយក្តីរំភើងរីករាយ ចូលរួមសាទរក្រៃលែង។
ជាមួយអំណោយ១០ម៉ឺនរៀលនេះដែរ ក៏មានអំណោយពីសប្បុរសជនមួយរូបទៀត គឺលោក ហ៊ឹង សុខជាតិ ជាបុគ្គលិកក្រុមហ៊ុនផ្នែកទីផ្សារ នៅរាជធានីភ្នំពេញ ចំនួន៣០ដុល្លារផងដែរ ។
ជាអំណោយជូនដល់ដៃលោកយាយ មាស ខុន លើកទី២ហើយ តាមរយៈកោះសន្តិភាព ក្រោយពេលបានចេញផ្សាយ ។
នៅពេលទទួលអំណោយនេះ លោកយាយ មាស ខុន បានលើកដៃទូលសំពះសម្តែងឱ្យឃើញនូវក្តីរំភើបរីករាយលាយឡំដោយទឹកភ្នែក ដោយលោកយាយនិយាយថា បានអំណោយប៉ុណ្ណេះមិនដែលបានជួបទេ… ពិតជាបានហូបឆ្ងាញ់តាមបំណងហើយចៅសម្រាប់ទ្រទ្រង់ជីវិតចុងក្រោយ ។
លោកយាយក៏បានជូនពរហូរហែជាពរព្រះជូនម្ចាស់អំណោយមិនដាច់ពីមាត់ឡើយ ។
ចែករំលែកព័តមាននេះ