បឹងស្នេហ៍ តំបន់ធម្មជាតិសម្បូរដោយសត្វស្លាបរាប់ពាន់ក្បាល
ខេត្តព្រៃវែង ៖ តំបន់អភិរក្សបឹងស្នេហ៍ គឺជាតំបន់អភិរក្សធម្មជាតិទំហំជាង៧០ហិកតា ស្ថិតនៅ
ខេត្តព្រៃវែង ៖ តំបន់អភិរក្សបឹងស្នេហ៍ គឺជាតំបន់អភិរក្សធម្មជាតិទំហំជាង៧០ហិកតា ស្ថិតនៅលើទីទួលពាន់កាឡី ក្នុងភូមិបឹងស្នេហ៍ ឃុំធាយ ស្រុកបាភ្នំ ខេត្តព្រៃវែង ។ តំបន់អភិរក្សនោះក្រៅពីមានផ្ទៃបឹងដ៏ធំ ក៏មានទីទួល ព្រៃរបោះ និងព្រៃលិចទឹក ជាពិសេសពពួកសត្វស្លាបច្រើនប្រភេទចំនួនរាប់ពាន់ក្បាលរស់នៅ ។
តំបន់អភិរក្សបឹងស្នេហ៍បង្កើតឡើងកាលពីឆ្នាំ២០១២ ក្រោមជំនួយឧបត្ថម្ភពីអង្គការវូមែន (women) ដោយអភិរក្សទៅលើធនធានធម្មជាតិនៅក្នុងតំបន់នេះ ជាពិសេសពពួកសត្វស្លាបដូចជា ននៀលខ្យង ទុង ក្រសារ កុក និងសំបកត្រពាំងជាដើម ។ ថ្មីៗកន្លងមកពពួកសត្វស្លាបទាំងនោះរងការគំរាមគំហែងខ្លាំង ពីអ្នកស្រុកលបលួចដាក់អន្ទាក់ និងលួចបាញ់នៅពេលយប់ ។
លោកប៉ាន់ យន ប្រធានសហគមន៍អភិរក្សបឹងស្នេហ៍ កាលពីពេល ថ្មីៗកន្លងមកឲ្យដឹងថា បច្ចុប្បន្នសត្វស្លាបត្រូវគេលួចចាប់ស្ទើររៀងរាល់យប់ ដោយសារសហគមន៍ពុំមានឧបករណ៍ និងបុគ្គលិកគ្រប់គ្រាន់សម្រាប់ដើរល្បាត ។ ចំនួនសត្វស្លាបថយចុះគួរឲ្យកត់សម្គាល ់ហើយពពួកសត្វ ននៀលខ្យង ទុង ក្រសារ បានបន្លាស់ទីចេញពីតំបន់នោះស្ទើរអស់ ព្រោះឆ្នាំនេះទឹកតូចដីនៅទំនេរច្រើន ងាយស្រួលក្នុងការចល័តទីតាំងរកចំណីទៅកន្លែង ផ្សេងៗ គួបផ្សំនឹងមានការបរបាញ់ពីជនខិលខូចមួយចំនួន ធ្វើឱ្យវាភ័យខ្លាច។
លោកប៉ាន់ យន និយាយថា «បច្ចុប្បន្នសហគមន៍អភិរក្សបឹងស្នេហ៍ មានបុគ្គលិកធ្វើការតែបីនាក់ប៉ុណ្ណោះ អ្នកផ្សេងឈប់អស់ហើយព្រោះប្រាក់ខែតិចពេក ចំណែកឧបករណ៍ខ្វះខាតច្រើន ជាហេតុធ្វើឲ្យការគ្រប់គ្រង និងការការពារមិនសូវមានប្រសិទ្ធភាព ព្រោះផ្ទៃដីធំដល់ទៅជាង៧០ហិកតា ដូច្នេះខ្ញុំសុំអំពាវនាវដល់សប្បុរសជនជិតឆ្ងាយ និងមន្ត្រីពាក់ពន្ធ័ទាំងអស់ សូមជួយឧបត្ថមដល់សហគមន៍អភិរក្សបឹងស្នេហ៍នេះផង» ។
លោកទឹម ទេពវង្សា ប្រធានមន្ទីរទេសចរណ៍ខេត្តព្រៃវែង ឲ្យកោះសន្តិភាពដឹងថា តំបន់អភិរក្សបឹងស្នេហ៍មានជំនួយពីក្រៅប្រទេស គឺអង្គការវូមែន ហើយមានសហគមន៍អ្នកស្ម័គ្រចិត្តនៅក្នុងមូលដ្ឋានជួយអភិរក្ស ។ ពីមុនមិនសូវមានសត្វច្រើនរស់នៅទេ ទើបតែរយៈពេលប៉ុន្មានឆ្នាំមកនេះ សំបូរសត្វបក្សីរស់នៅ និងបង្កាត់ពូជព្រោះមានការអភិរក្ស។ ការអភិរក្សនៅទីនោះទាំងធនធានធម្មជាតិ និងសត្វគ្រប់ប្រភេទ ៕
ចែករំលែកព័តមាននេះ