នាំគ្នាមកកកកុញក្នុងវត្តពងពស់… ដោយសារភិក្ខុសង្ឃ១អង្គ
ខេត្តព្រៃវែង ៖ នារសៀលថ្ងៃទី២ តុលា ប្រជាពុទ្ធបរិស័ទរាប់សិបនាក់
ខេត្តព្រៃវែង ៖ នារសៀលថ្ងៃទី២ តុលា ប្រជាពុទ្ធបរិស័ទរាប់សិបនាក់
ខេត្តព្រៃវែង ៖ នារសៀលថ្ងៃទី២ តុលា ប្រជាពុទ្ធបរិស័ទរាប់សិបនាក់ បាននាំគ្នាទៅពេញវត្តពងពស់ ដែលស្ថិតក្នុងឃុំរោងដំរី ស្រុកបាភ្នំ ដើម្បីរង់ចាំមើលការដោះស្រាយរបស់មន្ត្រីក្រសួងធម្មការ និងសាសនា ក្នុងរឿងដែលពួកគាត់បានស្នើសុំនិមន្តភិក្ខុសង្ឃមួយអង្គនាម សួស វេន ព្រះជន្ម៧១ឆ្នាំ ឱ្យចូលគង់នៅក្នុងវត្តពងពស់វិញ ។
អ្នកស្រុកទាំងនោះបានប្រាប់កោះសន្តិភាពដឹងថា ព្រះតេជគុណ សួស វេន ពីមុនជាចៅអធិការវត្តពងពស់នេះ ប៉ុន្តែកាលពីឆ្នាំ២០១១ដោយព្រះតេជគុណមានអាពាធខ្លាំង ក៏សម្រេចចិត្តសឹកជាគ្រហស្ថ ដើម្បីទៅព្យាបាលជំងឺ លុះក្រោយពីព្យាបាលជាសះស្បើយហើយ ក៏បានបួសជាសង្ឃឡើងវិញ ហើយពួកគាត់ជាពុទ្ធបរិស័ទចំណុះជើងវត្ត ដែលស្រលាញ់គាំទ្រលោកក៏បាននិមន្តព្រះតេជគុណឱ្យមកគង់នៅវត្តពងពស់នេះវិញ ដោយបានសុំនិងព្រមព្រៀងពីចៅអធិការវត្តពងពស់ថ្មី និងព្រះអនុគណស្រុកបាភ្នំផងដែរ។
ប៉ុន្តែថ្ងៃដែលលោកនិមន្តមកដល់វត្តវិញ ជាថ្ងៃហែទៀនវស្សាចូលវត្តផង គឺថ្ងៃទី៧ សីហា ២០១៧ វេលាម៉ោង៨យប់ស្រាប់តែមានកម្លាំងប៉ូលិស៦ទៅ៧នាក់បានទៅចាប់ព្រះតេជគុណចេញពីវត្តទាំងយប់ យកទៅដាក់នៅក្នុងវត្តជ្រៃឧត្តម ដែលជាវត្តអនុគណស្រុក លុះព្រឹកឡើងក៏ដេញលោកចេញលែងឱ្យគង់នៅក្នុងស្រុកបាភ្នំតទៅទៀត ទើបធ្វើឱ្យពួកគាត់ជាពុទ្ធបរិស័ទដែលគាំទ្រលោក កើតទុក្ខមិនសុខចិត្តហើយក៏បានធ្វើលិខិតផ្តិតមេដៃជាង៣០០នាក់ ស្នើសុំទៅក្រសួងឱ្យជួយអន្តរាគមន៍ឱ្យលោកបានមកគង់នៅក្នុងវត្តពងពស់វិញ ។
ប្រជាពលរដ្ឋទាំងនោះបានបញ្ជាក់ថា ក្រោយពីពិនិត្យឃើញសំណើរបស់ពួកគាត់ហើយ លោក ហ៊ឹម ឆែម រដ្ឋមន្ត្រីក្រសួងធម្មការ និងសាសនា បានចេញលិខិតមួយលេខ៦០៣/១៧កធស ចុះថ្ងៃទី២៥ សីហា ២០១៧ ដោយជម្រាបមកប្រធានមន្ទីរធម្មការនិងសាសនាខេត្តព្រៃវែងឱ្យធ្វើការសម្របសម្រួល តាមការស្នើសុំរបស់ពុទ្ធបរិស័ទ តែលិខិតនេះមិនត្រូវបានមន្ត្រីនៅថ្នាក់ក្រោមអនុវត្តតាមនោះទេ រហូតមកដល់ថ្ងៃទី២ តុលា ២០១៧ ក៏ឮដំណឹងថាមានមន្ត្រីខាងក្រសួងចុះមកដោះស្រាយ ទើបពួកគាត់នាំគ្នាមករង់ចាំមើលការដោះស្រាយនៅក្នុងវត្តពងពស់ តែជាលទ្ធផលពួកគាត់បានត្រឹមតែខកចិត្ត ព្រោះមិនឃើញខាងក្រសួងណាម្នាក់បានចុះទៅដល់វត្តពងពស់នោះទេ ។
ចំពោះការលើកឡើងនេះត្រូវបានព្រះតេជគុណ នុត វណ្ណៈ ព្រះអនុគណស្រុកបាភ្នំ និងជាព្រះគ្រូចៅអធិការវត្តជ្រៃឧត្តម ហៅវត្តខ្លាលោត បានមានថេរដីកាថា នៅរសៀលថ្ងៃទី២តុលានោះ គឺពិតជាមានមន្ត្រីខាងក្រសួងធម្មការនិងសាសនាចុះមកមែន ប៉ុន្តែក្រោយពីស្តាប់ព័ត៌មានទាក់ទងនឹងរឿងរ៉ាវជុំវិញវត្តពងពស់ពីខាងអាជ្ញាធរ មន្ត្រីធម្មការស្រុក និងព្រះអនុគណស្រុករួចមក ឃើញថាមានភាពមិនច្បាស់លាស់ច្រើន ទើបខាងក្រសួងចាត់ឱ្យមន្ត្រីធម្មការខេត្តចុះធ្វើការស្រាវជ្រាវឡើងវិញ និងធ្វើរបាយការណ៍ជូនទៅក្រសួងសាជាថ្មី ។
ដោយឡែកពាក់ព័ន្ធនឹងការចោទប្រកាន់ថា មានប៉ូលិសទៅចាប់ព្រះតេជគុណ សួស វេន យកចេញពីវត្តទាំងយប់នោះ ត្រូវបានលោក ឃិន សារ៉ែន នាយប៉ូស្តិ៍រដ្ឋបាលឃុំរោងដំរីបញ្ជាក់ប្រាប់កោះសន្តិភាពឱ្យដឹងថា នៅយប់ថ្ងៃទី៧សីហានោះ ពិតជាមានកម្លាំងប៉ូលិសទៅកាន់វត្តពងពស់មែន គឺរូបលោកជាអ្នកដឹកនាំទៅដោយផ្ទាល់ ប៉ុន្តែមិនមែនទៅចាប់លោកទេ គឺទៅនិមន្តលោកតាមសម្រួលក្រោមបទបញ្ជាពីលោកអភិបាលស្រុកនិងលោកអធិការស្រុកផ្ទាល់ បញ្ជាឱ្យនិមន្តលោកទៅគង់នៅវត្តជ្រៃឧត្តម ដើម្បីបញ្ចៀសកុំឱ្យមានបញ្ហាកើតឡើង ព្រោះនៅក្នុងបរិវេណវត្តពេលដែលលោកតា សួស វេន និមន្តចូលដល់ភ្លាមទាំងព្រះសង្ឃ ទាំងគណៈកម្មការអាចារ្យវត្ត និងពុទ្ធបរិស័ទបានចែកបក្សគ្នាជា២កាន់ជើងម្ខាងម្នាក់ ដូច្នេះបើទុកលោកឱ្យគង់នៅក្នុងវត្តច្បាស់ជាមានអធិករណ៍កើតឡើងនៅពេលណាមួយមិនខាន ទើបព្រះអនុគណស្រុកនិងលោកអភិបាលសម្រេចឱ្យនិមន្តលោកតា សួស វេន ចេញពីវត្តតែម្តងទៅ ។
ចែករំលែកព័តមាននេះ