ការព្យាយាមតម្រង់ទិសដៅរបស់ហ្វេសប៊ុក
កង្វះខាតការតាមដាន និងត្រួតពិនិត្យអស់រយៈពេលជាច្រើនឆ្នាំមកនេះបានធ្វើឲ្យ
ទីក្រុងញូវយ៉ក ៖ កង្វះខាតការតាមដាន និងត្រួតពិនិត្យអស់រយៈពេលជាច្រើនឆ្នាំមកនេះបានធ្វើឲ្យ Facebook មានថាមពលយ៉ាងខ្លាំងក្លាលើអ្នកប្រើប្រាស់ប្រមាណ២ប៊ីលាននាក់។ Facebook ក៏បានបង្កផលប៉ះពាល់ដោយអចេតនាមួយចំនួនផងដែរ ។
ក្រុមទទួលស៊ើបអង្កេតបញ្ហាប្រទេសរុស្ស៊ី ពាក់ព័ន្ធនឹងការបោះឆ្នោតឆ្នាំ២០១៦ បានអញ្ជើញ Facebook, Google និង Twitter មកសាកសួរ ។ Facebook បានយល់ស្របឲ្យអ្នកស៊ើបអង្កេតផ្សាយពាណិជ្ជកម្មផ្នែកនយោបាយ ដែលទិញដោយក្រុមមនុស្សមានការគាំទ្រពីរុស្ស៊ី និងប្រកាសគោលនយោបាយថ្មីសម្រាប់ការផ្សាយពាណិជ្ជកម្មបែបនេះ ។
Facebook បានទទួលស្គាល់ពីតួនាទីរបស់ខ្លួន ដែលអនុញ្ញាតឲ្យអ្នកប្រើប្រាស់មើលឃើញព័ត៌មានក្លែងក្លាយក្នុងអំឡុងពេលធ្វើយុទ្ធនាការបោះឆ្នោតឆ្នាំ២០១៦ និងប្រកាសពីវិធានការដោះស្រាយផងដែរ ។ ស្ថាបនិក និងនាយកប្រតិបត្តិហ្វេសប៊ុក លោក Mark Zuckerberg បាននិយាយសូមទោសប្រមាណ១០ខែមកហើយ បន្ទាប់ពីទទួលស្គាល់បញ្ហានេះ ។
ពេលមានបញ្ហាកើតមានឡើង Facebook តែងតែអះអាងថា គោលការណ៍របស់ខ្លួនមិនបង្កឲ្យមានការប្រើប្រាស់មិនត្រឹមត្រូវឡើយ ។ ពួកគេលំបាកចាប់អ្នកគ្រប់គ្នា ដែលព្យាយាមប្រើ Facebook មិនត្រឹមត្រូវ ។ ពេលដែលត្រូវបានប្តឹង ពួកគេតែងទទួលស្គាល់កំហុសមួយចំនួន រួចផ្តល់វិធានការដោះស្រាយបន្តិចបន្តួច ។
មកដល់ពេលនេះ Facebook មើលឃើញការលូតលាស់នៃចំនួនអ្នកប្រើប្រាស់ ប្រាក់ចំណូល និងតម្លៃភាគហ៊ុនកើនឡើងមិនឈប់។ ជាមួយគ្នានេះ ពួកគេក៏បានបង្កើតចំណុចពិសេសថ្មីៗដល់អ្នកប្រើប្រាស់ បើទោះជាពួកគេប្រើប្រាស់ព័ត៌មានលម្អិតរបស់អ្នកប្រើប្រាស់ដើម្បីផ្សាយពាណិជ្ជកម្ម និងពិសោធន៍លើអាកប្បកិរិយារបស់អ្នកប្រើប្រាស់ជាដើម ។
Facebook ពឹងផ្អែកលើចំនួនអ្នកប្រើប្រាស់ថ្មីៗ និងទាញថវិកាពីការផ្សាយពាណិជ្ជកម្ម។ ប្រព័ន្ធបង្កើតគណនីថ្មី និងទិញការផ្សាយពាណិជ្ជកម្មមានភាពស្វ័យប្រវត្តិយ៉ាងខ្លាំង ដែលធ្វើឲ្យក្រុមហ៊ុននេះដំណើរការមានប្រសិទ្ធភាព និងរកប្រាក់ចំណេញបានច្រើន ។
ក្នុងរយៈពេល៦ខែដំបូងឆ្នាំនេះ Facebook បានទាក់ទាញការលក់ប្រមាណ១៧ប៊ីលានដុល្លារ និងរាយការណ៍ពីប្រាក់ចំណេញស្មើជិត៧បីលានដុល្លារ ។
លោក David Gerzof Richard សាស្ត្រាចារ្យផ្នែកទំនាក់ទំនងក្នុងមហាវិទ្យាល័យ Emerson College គិតថា Facebook គួរតែមើលទៅលើការប្រើប្រាស់មិនត្រឹមត្រូវជាបញ្ហាបច្ចេកទេសមួយ។
បច្ចុប្បន្ន Facebook ផ្តល់រង្វាន់ដល់អ្នករកឃើញចន្លោះខ្វះខាត ឬបញ្ហាផ្សេងៗលើ Facebook ។ ពួកគេក៏គួរផ្តល់រង្វាន់ដល់អ្នកដែលតាមដានការប្រើប្រាស់មិនត្រឹមត្រូវក្នុងប្រព័ន្ធផ្សាយពាណិជ្ជកម្មផងដែរ ៕ ដោយ ៖ ណៃ ដាលីន
ចែករំលែកព័តមាននេះ