មិននឹកស្មានថា ប្រេងអូលីវមានប្រយោជន៍បែបនេះ
អ្នកដឹកនាំការស្រាវជ្រាវលោក Gracjan Michlewski បាននិយាយថា
អ្នកដឹកនាំការស្រាវជ្រាវលោក Gracjan Michlewski បាននិយាយថា
សមាសធាតុមួយដែលមាននៅក្នុងប្រេងអូលីវអាចជួយទប់ស្កាត់ការកើតជំងឺមហារីកក្នុងខួរក្បាល ។ នេះបើតាមការសិក្សាមួយបានឲ្យដឹង ។ ការស្រាវជ្រាវទៅលើអាស៊ីតអូលីក ដែលជាសារធាតុសំខាន់នៅក្នុងប្រេងអូលីវបានបង្ហាញពីរបៀបដែលវាអាចជួយទប់ស្កាត់ហ្សែនបង្កជំងឺមហារីកមិនឲ្យដំណើរការនៅក្នុងកោសិកា ។
អ្នកដឹកនាំការស្រាវជ្រាវលោក Gracjan Michlewski នៃសាកលវិទ្យាល័យ Edinburgh ចក្រភពអង់គ្លេសបាននិយាយថា ៖ « ទោះបីជាយើងមិនទាន់អាចនិយាយបានថា ប្រេងអូលីវដែលមាននៅក្នុងរបបអាហារអាចជួយការពារជំងឺមហារីកខួរក្បាល ប៉ុន្តែការរកឃើញរបស់យើងបានបង្ហាញថា អាស៊ីតអូលីកអាចទ្រទ្រង់ការបង្កើតម៉ូលេគុលមួយប្រភេទដែលមានមុខងារបញ្ឈប់ការរីកលូតលាស់ដុំសាច់នៅក្នុងកោសិកាលូតលាស់ក្នុងមន្ទីរពិសោធន៍ ។ ការសិក្សាបន្ថែមអាចនឹងជួយកំណត់តួនាទីរបស់ប្រេងអូលីវចំពោះសុខភាពខួរក្បាល » ។
ការរកឃើញរបស់ពួកគេបានបោះពុម្ភផ្សាយនៅក្នុងព្រឹត្តិបត្រជីវសាស្ត្រម៉ូលេគុល បានចង្អុលថា អាចមានការព្យាបាលដោយពឹងផ្អែកលើការប្រើប្រាស់ប្រេងដើម្បីការពារជំងឺមហារីកខួរក្បាល ។ ក្រុមអ្នកអ្នកវិទ្យាសាស្ត្របានវិភាគទៅលើឥទ្ធិពលរបស់អាស៊ីតអូលីកនៅលើម៉ូលេគុលកោសិកាមួយដែលគេស្គាល់ថាជាកោសិកា miR-7 ដែលមានសកម្មភាពនៅក្នុងខួរក្បាល និងមានតួនាទីទប់ស្កាត់ការបង្កើតជាដុំសាច់ ។
ពួកគេបានរកឃើញថាអាស៊ីតអូលីករារាំងប្រូតេអីុនកោសិកាមួយដែលគេស្គាល់ថាជាប្រូតេអីុន MSI2 ដែលវាទៅបញ្ឈប់ការផលិតកោសិកា miR-7 ។ ការស្រាវជ្រាវនេះបានឲ្យដឹងថា សមាសភាគរបស់ប្រេងអូលីវទ្រទ្រង់ការផលិតកោសិកា miR-7 ដែលជួយទប់ស្កាត់មិនឲ្យមានការរីកលូតលាស់ជាដុំសាច់ ។ ក្រុមអ្នកស្រាវជ្រាវបានធ្វើការរកឃើញរបស់ខ្លួននៅក្នុងការធ្វើតេស្តនៅលើសារធាតុចម្រាញ់ចេញពីកោសិកាមនុស្ស និងនៅក្នុងកោសិការស់ក្នុងមន្ទីរពិសោធន៍ ៕
ចែករំលែកព័តមាននេះ