រាជធានីភ្នំពេញ ៖ រយៈពេលបីថ្ងៃកន្លងមកនេះចាប់ពីថ្ងៃទី២៣ដល់២៥ មេសា សាលាខណ្ឌដូនពេញបានបើកយុទ្ធនាការចុះបង្ក្រាបអ្នកបន្ទោបង់អនាធិបតេយ្យតាមរមណីយដ្ឋាន សួនច្បារ និងផ្លូវសាធារណៈចំនួន១៤នាក់យកមកអប់រំ ធ្វើកិច្ចសន្យាឱ្យបញ្ឈប់ទម្លាប់អាក្រក់ដែលបណ្តាលឱ្យប៉ះពាល់ដល់បរិស្ថាន និងសណ្តាប់ធ្នាប់សាធារណៈ
រាជធានីភ្នំពេញ ៖ រយៈពេលបីថ្ងៃកន្លងមកនេះចាប់ពីថ្ងៃទី២៣ដល់២៥ មេសា សាលាខណ្ឌដូនពេញបានបើកយុទ្ធនាការចុះបង្ក្រាបអ្នកបន្ទោបង់អនាធិបតេយ្យតាមរមណីយដ្ឋាន សួនច្បារ និងផ្លូវសាធារណៈចំនួន១៤នាក់យកមកអប់រំ ធ្វើកិច្ចសន្យាឱ្យបញ្ឈប់ទម្លាប់អាក្រក់ដែលបណ្តាលឱ្យប៉ះពាល់ដល់បរិស្ថាន និងសណ្តាប់ធ្នាប់សាធារណៈ។
លោកសុខ សម្បត្តិ អភិបាលខណ្ឌដូនពេញបានឱ្យដឹងថា យោងតាមបទបញ្ជាសាលារាជធានីភ្នំពេញ បានដាក់ចេញឱ្យសាលាខណ្ឌត្រូវចុះបង្ក្រាប និងលុបបំបាត់ឱ្យបានចំពោះអ្នកបន្ទោបង់អនាធិបតេយ្យតាមផ្លូវសាធារណៈ តាមរមណីយដ្ឋាន និងសួនច្បារ ដើម្បីរួមចំណែកថែរក្សាបរិស្ថាន អនាម័យ ព្រោះខណ្ឌដូនពេញជាបេះដូងរបស់រាជធានី ហើយសំបូរទៅដោយភ្ញៀវជាតិ អន្តរជាតិមកដើរកម្សាន្ត។ ទោះបីជាសាលាខណ្ឌបានព្យាយាមផ្សព្វផ្សាយជាសាធារណៈដល់ប្រជាពលរដ្ឋកុំឱ្យចោលសំរាមតាមទីសាធារណៈ ជាពិសេសការបន្ទោបង់តាមផ្លូវសាធារណៈ រមណីយដ្ឋាន សួនច្បារ ប៉ុន្តែតាមការសង្កេតឃើញថា មានប្រជាពលរដ្ឋមួយចំនួននៅតែបន្ទោបង់ដដែល ទើបសាលាខណ្ឌដាក់កម្លាំងល្បាតពិនិត្យតាមផ្លូវសាធារណៈជាប្រចាំ។
លោកហែម ឫទ្ធី នាយករងរដ្ឋបាលសាលាខណ្ឌដូនពេញបាននិយាយថា ក្នុងរយៈពេល៣ថ្ងៃចាប់ពីថ្ងៃទី២៣ មេសា មក កម្លាំងផ្នែកសណ្តាប់ធ្នាប់ខណ្ឌបានឃាត់ខ្លួនអ្នកបន្ទោបង់អនាធិបតេយ្យនៅចំណុចជាប់របងខាងកើតរតនាគារជាតិលើកំណាត់ផ្លូវលេខ១៩ ស្ថិតក្នុងសង្កាត់វត្តភ្នំបានចំនួន១៤នាក់ បញ្ជូនទៅសាលាខណ្ឌដើម្បីសាកសួរ។ ក្រោយពីធ្វើកំណត់ហេតុសាកសួររួច យោងតាមការចង្អុលបង្ហាញរបស់លោកអភិបាលខណ្ឌដូនពេញ បានឱ្យធ្វើការអប់រំ និងកិច្ចសន្យាបញ្ឈប់ការបន្ទោបង់តាមទីសាធារណៈ ព្រមទាំងថតរូបទុកជាឯកសារទៀតផង។
លោកអភិបាលខណ្ឌដូនពេញបានបញ្ជាក់ថា ខណ្ឌដូនពេញនឹងបន្តអនុវត្តលុបបំបាត់ការបន្ទោបង់អនាធិបតេយ្យ និងចោលសំរាមតាមផ្លូវសាធារណៈឱ្យដូចភ្លៀងរលឹម និងឈានដល់ការលុបបំបាត់ទាំងស្រុងដើម្បីរួមចំណែកថែរក្សាបរិស្ថាន និងអនាម័យឱ្យល្អប្រសើរ ៕
ចែករំលែកព័តមាននេះ