ម្សិលមិញ… ម្នាក់ៗមានអារម្មណ៍បែបណាទៅ ពេលទៅដល់តំបន់ស្ពានជ្រោយចង្វារ
រាជធានីភ្នំពេញ ៖ មន្ត្រីរដ្ឋបាលរាជធានីភ្នំពេញបានថ្លែងថា
រាជធានីភ្នំពេញ ៖ មន្ត្រីរដ្ឋបាលរាជធានីភ្នំពេញបានថ្លែងថា នៅព្រឹកថ្ងៃ១ តុលា ចរាចរណ៍មានការកកស្ទះយ៉ាងខ្លាំង នៅតំបន់គល់ស្ពានជ្រោយចង្វាត្រើយខាងលិច បន្ទាប់ពីការបិទស្ពានជ្រោយចង្វាចាស់ (ស្ពានទី១) ដើម្បីធ្វើការជួសជុល ។ មូលហេតុនៃការកកស្ទះខ្លាំងនេះ គឺមកពីប្រជាពលរដ្ឋនៅមិនទាន់ដឹងឱ្យបានទូលំទូលាយអំពីផ្លូវវាង តាមរយៈការជូនដំណឹងរបស់អាជ្ញាធររាជធានីភ្នំពេញ និងតាមរយៈប្រព័ន្ធផ្សព្វផ្សាយផ្សេងៗ ។
បន្ទាប់ពីមានការបិទទាំងស្រុងស្ពានមិត្តភាពកម្ពុជា-ជប៉ុន(ស្ពានជ្រោយចង្វាចាស់) ដើម្បីធ្វើការជួសជុលនោះ គេសង្កេតឃើញថា ការធ្វើចរាចរណ៍នៅតំបន់គល់ស្ពានជ្រោយចង្វាត្រើយខាងលិចឬតំបន់រង្វង់មូលកួចកាណុង និងតំបន់ក្បែរៗនោះ មានការកកស្ទះចរាចរណ៍យ៉ាងខ្លាំង ទោះបីមានការខិតខំជួយសម្រួលចរាចរណ៍ពីសមត្ថកិច្ចក៏ដោយ ។
ជាក់ស្តែង លើកំណាត់ផ្លូវចាប់ពីវត្តភ្នំទៅដល់គល់ស្ពានជ្រោយចង្វា មានការកកស្ទះចាប់តាំងពីរង្វង់មូលវត្តភ្នំរហូតដល់គល់ស្ពានតែម្តង ។ ចំណែកឯផ្លូវទំនប់ទួលគោកឬផ្លូវលេខ៧០ ក៏មានការកកស្ទះចាប់ពីអង់តែនរង្វង់មូលទួលគោក រហូតដល់គល់ស្ពានដែរ។ ឯកំណាត់ផ្លូវជាតិលេខ៥ប៉ែកខាងជើងវិញ មានការកកស្ទះចាប់ពីឃ្លាំងសាំងសូគីម៉ិចរហូតដល់រង្វង់មូលកួចកាណុង ឬក្រោមគល់ស្ពានជ្រោយចង្វាតែម្តង ។ ក្រៅពីនេះ នៅមានការស្ទះចរាចរណ៍នៅតំបន់ក្បែរៗគល់ស្ពាន ដូចជា តំបន់ផ្លូវក្នុងៗមុខមន្ទីរពេទ្យកាល់ម៉ែត តំបន់បឹងកក់ និងតំបន់ទួលសង្កែជាដើម ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី២៧ ខែកញ្ញា បានឲ្យដឹងថា ស្ពានមិត្តភាពកម្ពុជា-ជប៉ុន(ស្ពានជ្រោយចង្វាចាស់) នឹងត្រូវបិទជាបណ្តោះអាសន្ន ចាប់ពីថ្ងៃទី១ ខែតុលា ឆ្នាំ២០១៧ ដើម្បីធ្វើការជួសជុលស្តារទ្បើងវិញ ដែលតម្រូវឲ្យធ្វើចរាចរណ៍ទ្វេទិសនៅលើស្ពានមិត្តភាពកម្ពុជា-ចិន តែមួយប៉ុណ្ណោះ ។ ការធ្វើចរាចរណ៍អាចនឹងមានការកកស្ទះខ្លាំងនៅបរិវេណជុំវិញការដ្ឋានសាងសង់ ជាពិសេសនៅត្រង់ចំណុចរង្វង់មូលស្ពានទាំងសងខាង គឺរង្វង់មូលកួចកាណុង និងរង្វង់មូលព្រហ្មមុខបួន ។
សេចក្តីជូនដំណឹងរបស់រដ្ឋបាលរាជធានីភ្នំពេញបានបញ្ជាក់ថា ដើម្បីចៀសវាងការកកស្ទះចរាចរណ៍នៅលើស្ពានមិត្តភាពកម្ពុជា-ចិន(ស្ពានជ្រោយចង្វាទី២) រដ្ឋបាលរាជធានីភ្នំពេញ សូមស្នើដល់រថយន្តធុនធំចូលរាជធានីភ្នំពេញតាមផ្លូវជាតិ៦ ត្រូវវាងបត់ចូលតាមផ្លូវលីយ៉ុងផាត់ ។ ឯយានយន្តគ្រប់ប្រភេទ ដែលធ្វើចរាចរណ៍ទិសដៅចូលរាជធានីភ្នំពេញតាមផ្លូវជាតិលេខ៦ មកដល់ចំណុចថ្នល់កែង ត្រូវបត់ស្តាំធ្វើចរាចរណ៍តាមកំណាត់ផ្លូវជាតិលេខ៦ ឆ្ពោះទៅស្ពានព្រែកក្តាម និងបន្តដំណើរចូលរាជធានីភ្នំពេញ តាមផ្លូវជាតិលេខ៥វិញ។ ក្នុងករណីមានការកកស្ទះចរាចរណ៍ក្នុងតំបន់ការដ្ឋានធ្ងន់ធ្ងរ អ្នកបញ្ជាយានយន្តគ្រប់ប្រភេទ ត្រូវអនុវត្តតាមការបង្វែរទិសចរាចរណ៍របស់សមត្ថកិច្ចជំនាញ ។
គួររំឭកថា ការជួសជុលទ្បើងវិញស្ពានជ្រោយចង្វាចាស់ គឺជាការឆ្លើយតបទៅនឹងសំណើសុំបន្ទាន់របស់រាជរដ្ឋាភិបាលកម្ពុជាទៅកាន់រដ្ឋាភិបាលជប៉ុន ព្រោះស្ពាននេះមានសភាពទ្រុឌទ្រោមខ្លាំងដោយមិនអាចធានាសុវត្ថិភាពសម្រាប់ការដឹកជញ្ជូនសាធារណៈឆ្លងកាត់បានទៀត ។ គម្រោងជួសជុលទ្បើងវិញនេះត្រូវបានគាំទ្រដោយហិរញ្ញប្បទានឥតសំណងរបស់រដ្ឋាភិបាលជប៉ុន ក្នុងទឹកប្រាក់ចំនួន៣.៣៤៣លានយ៉េន ឬប្រហាក់ប្រហែលនឹងជាង៣៣លានដុល្លារអាមេរិក ។ ការជួសជុលនេះមានរយៈពេល២១ខែ ដែលត្រូវបញ្ចប់ក្នុងខែមិថុនា ឆ្នាំ២០១៩ខាងមុខ។
តាមប្រភពព័ត៌មានឲ្យដឹងថា នៅព្រឹកថ្ងៃនោះដែរ បន្ទាប់ពីកកស្ទះចរាចរណ៍នៅចំណុចគល់ស្ពានជ្រោយចង្វា អ្នកដំណើរមួយចំនួន ក៏បានបង្វែរទិសទៅធ្វើដំណើរឆ្លងកាត់ស្ពានព្រែកព្នៅវិញ តែមានចំនួនតិចតួចប៉ុណ្ណោះ មិនបង្កឲ្យមានការកកស្ទះនោះឡើយ ។ នៅព្រឹកនោះគេឃើញបញ្ជរបង់ប្រាក់របស់ក្រុមហ៊ុន នៅតែប្រមូលប្រាក់ទាំងរថយន្តធំនិងតូច ដោយមិនឲ្យរបូតឡើយ ។ គេនៅចាំបានថា លោកអភិបាលរាជធានីភ្នំពេញ ធ្លាប់បានអំពាវនាវសុំកុំឱ្យយកប្រាក់ពីរថយន្តតូចៗផងដែរ ក្នុងការឆ្លងកាត់ស្ពានព្រែកព្នៅនេះ នាអំឡុងពេលជួសជុលស្ពានជ្រោយចង្វាចាស់នេះ ។
តាមមន្ត្រីនគរបាលចរាចរណ៍បានឱ្យដឹងថា ស្ថានភាពផ្លូវត្រង់ចំណុចគល់ស្ពានជ្រោយចង្វា ទាំងសងខាង បានស្ទះចរាចរណ៍ពេញមួយព្រឹក គឺតាំងពីវេលាម៉ោង៦និងបន្តរហូតម៉ោងប្រមាណ១១ព្រឹក រហូតដល់ពេលមានភ្លៀងធ្លាក់ ។ប្រភពដដែលឱ្យដឹងទៀតថា ដោយសារតែកំណើនយានយន្ត ការបិទស្ពានជ្រោយចង្វាចាស់នេះ គឺចរចរណ៍អាចនៅតែបន្តកកស្ទះជារៀងរាល់ថ្ងៃ ។ ទោះបីជាយ៉ាងណា ការកកស្ទះអាចធ្វើចរាចរណ៍ទៅមុខបានតែយឺតៗ ហើយនៅថ្ងៃបន្ទាប់ទៀត បើសិនជាយានយន្តមួយចំនួនបានបង្វែរទៅធ្វើដំណើរតាមស្ពានព្រែកព្នៅវិញចរាចរណ៍នឹងប្រសើរឡើងវិញបណ្តើរៗ ៕
ចែករំលែកព័តមាននេះ