ការឡើងថ្លៃប្រាក់បាតធ្វើឱ្យការនាំចេញអង្ករធ្លាក់ចុះ
លោក Charoen Laothamatas ប្រធានសមាគមនាំចេញអង្ករថៃ បានថ្លែងកាលពីថ្ងៃសុក្រថា
លោក Charoen Laothamatas ប្រធានសមាគមនាំចេញអង្ករថៃ បានថ្លែងកាលពីថ្ងៃសុក្រថា
ទីក្រុងបាងកក ៖ លោក Charoen Laothamatas ប្រធានសមាគមនាំចេញអង្ករថៃ បានថ្លែងកាលពីថ្ងៃសុក្រថា កំណើនយ៉ាងខ្លាំងនៃរូបិយប័ណ្ណថៃ បានប៉ះពាល់អវិជ្ជមានដល់ការនាំចេញអង្ករ និងផលិតផលកសិកម្មផ្សេងទៀតដូចជា កៅស៊ូ ដំឡូងមី និងស្ករ ។ ផលិតផលទាំងនេះមានបរិមាណក្នុងស្រុក៩០% ដូច្នេះ បើប្រាក់បាតកើនឡើង នឹងធ្វើឱ្យផលិតផលខាងលើមានតម្លៃថ្លៃជាងគូប្រជែង ។
លោកថ្លែងថា ៖« ប្រាក់ថៃបានកើនឡើង៨,៥%ធៀបនឹងប្រាក់ដុល្លារ ខណៈប្រាក់ដុងវៀតណាមកើនឡើង២%ធៀបនឹងប្រាក់ដុល្លារ។ វានាំឱ្យក្រុមហ៊ុននាំចេញអង្ករថៃបាត់បង់ចំណែកទីផ្សាររបស់ខ្លួនទៅឲ្យវៀតណាម » ។
ការនាំចេញអង្កររបស់ថៃមានចំនួនសរុប៩៨៥.៨៧៩តោនកាលពីខែមុន ស្មើប្រមាណ៤៥៣លានដុល្លារ ធ្លាក់ចុះ០,១% និង២%រៀងគ្នា បើធៀបនឹងតួលេខកាលពីខែកក្កដា ។
ការធ្លាក់ចុះនៃការនាំចេញអង្ករស និងអង្ករ ក្រអូប Hom Mali ថៃ ក្នុងខែសីហា បានរួមចំណែកដល់ការធ្លាក់ចុះសរុប បើធៀបនឹងការនាំចេញអង្ករកាលពីខែមុន ។ ការនាំចេញអង្ករ Hom Mali បានធ្លាក់ចុះយ៉ាងគំហុក៣៩% ស្មើនឹង១៦៦.២១៥តោន ស្របពេលតម្រូវការមានកំណត់ ក៏ជាផ្នែកមួយធ្វើឲ្យនាំចេញធ្លាក់ចុះផងដែរ ។ រីឯការនាំចេញអង្ករសបានធ្លាក់ចុះ៤% ស្មើនឹង៣៩៤.៥៤២តោនក្នុងខែសីហា ។
ទោះជាយ៉ាងណា ការនាំចេញអង្ករ parboiled បានកើនឡើង៤៩% ស្មើនឹង៣៩៥.១៦០តោន គឺដោយសារតែពេលថ្មីៗនេះ នៅប្រទេសបង់ក្លាដែសជួបនឹងគ្រោះទឹកជំនន់ ដែលប៉ះពាល់ដល់ផលិតកម្មស្រូវក្នុងប្រទេសនេះ។ នេះបើតាមលោក Charoen ។
លោក Charoen ក៏បានសម្តែងការបារម្ភផងដែរអំពីគុណភាពអង្ករ Hom Mali ព្រោះថា វៀតណាមទទួលជោគជ័យក្នុងការអភិវឌ្ឍពូជស្រូវថ្មីៗដូចជា ពូជស្រូវក្រអូប ។ លោកថា ៖« យើងគ្មានពូជស្រូវថ្មីទេ ប៉ុន្តែវៀតណាមបានបង្កើតពូជស្រូវថ្មី ដែលអាចដាក់លក់លើទីផ្សារសកល។ វាជាក្តីបារម្ភសម្រាប់ក្រុមហ៊ុននាំចេញអង្ករថៃ » ។
ទាក់ទិននឹងប្រាក់បាតកើនឡើង លោក Charoen និយាយថា ក្រុមហ៊ុននាំចេញអង្ករថៃជាច្រើនគ្មានលទ្ធភាពទប់ទល់នឹងការប្រែប្រួលរូបិយប័ណ្ណទេ ខណៈធនាគារយកសេវាខ្ពស់ ។
កិច្ចប្រជុំគណៈកម្មាធិការគោលនយោបាយរូបិយវត្ថុ (MPC) កាលពីថ្ងៃពុធ បានរក្សាអត្រាគោលនយោបាយរបស់ខ្លួនឱ្យនៅដដែលត្រឹម១,៥% ទោះបីជាក្រសួងហិរញ្ញវត្ថុអំពាវនាវឱ្យកាត់បន្ថយអត្រាការប្រាក់ដើម្បីបញ្ចុះតម្លៃប្រាក់បាតក្តី ។
លោក Charoen បន្ថែមថា ៖« យើងមិនអាចធ្វើអ្វីបានទេ នៅពេលដែល MPC មិនចាត់វិធានការណាមួយ ។ យើងគ្រាន់តែព្យាយាមប្រាប់អាជ្ញាធរថា យើងមានបញ្ហា » ៕
ចែករំលែកព័តមាននេះ