ពិព័រណ៍ស្នាដៃស្ថាបត្យកម្ម និងសម្តែងសិល្បៈរៃអង្គាសថវិកាចូលរួមបរិច្ចាគមន្ទីរពេទ្យគន្ធបុប្ផា
រាជធានីភ្នំពេញ៖ សាលាន័រតុនបានប្រារព្ធពិធីសម្តែង និងពិព័រណ៍ស្នាដៃស្ថាបត្យកម្មរបស់និស្សិតមកពីគ្រប់ជំនាន់
រាជធានីភ្នំពេញ៖ សាលាន័រតុនបានប្រារព្ធពិធីសម្តែង និងពិព័រណ៍ស្នាដៃស្ថាបត្យកម្មរបស់និស្សិតមកពីគ្រប់ជំនាន់ ក្នុងគោលបំណងរៃអង្គការថវិកាចូលរួមបរិច្ចាគដល់មន្ទីរពេទ្យគន្ធបុប្ផា។ លោក អ៊ុង វ៉ាន់ធឿន សកលវិទ្យាធិការរង នៃសកលវិទ្យាល័យន័រតុនបានឲ្យដឹងថា ដាក់តាំងពិព័រណ៍ស្នាដៃរបស់និស្សិត និងបង្កើតកម្មវិធីសប្បុរសធម៌ ដើម្បីយកប្រាក់ជួយមន្ទីរពេទ្យគន្ធបុប្ផារយៈពេល៣ថ្ងៃ។
លោកបន្តថា ពិព័រណ៍ស្នាដៃរបស់និស្សិតមានចាប់តាំងពីឆ្នាំទី១ រហូតដល់ឆ្នាំទី៤ និងទី៥ រួមនឹងបានបង្កើតកម្មវិធីសប្បុរសធម៌មួយក្នុងគោលបំណងយកថវិកាទាំងអស់នោះ ជួយដល់មន្ទីរពេទ្យគន្ធបុប្ផា ដែលមានក្មេងៗជាច្រើនកំពុងពិនិត្យ និងព្យាបាលជារៀងរាល់ថ្ងៃ ហើយសកលវិទ្យានាំថវិកាដែលបានមកពីកម្មវិធីមួយនេះ គឺដើម្បីជួយសម្រាលបន្ទុកមន្ទីរពេទ្យមួយនេះផងដែរ។
ចំពោះការដាក់តាំងបង្ហាញស្នាដៃនិស្សិតវិញ គឺមានពីរផ្នែក៖ ទី១-ស្ថាបត្យកម្ម និងសំណង់ស៊ីវិល ទី២-ការបង្ហាញឱសថរបស់និស្សិតផ្នែកសុខាភិបាលបានផលិត។ លោកបញ្ជាក់យ៉ាងដូច្នោះថា «ក្រុមនិស្សិតដែលនាំមុខនៅក្នុងការតាំងពិព័រណ៍នេះ គឺពួកគេមកពីមហាវិទ្យាល័យវិទ្យាសាស្ត្រសុខាភិបាល មហាវិទ្យាល័យវិទ្យាសាស្ត្រ និងមហាវិទ្យាល័យសង្គម»។
លោក មួន ស៊ីម៉េង និស្សិតឆ្នាំទី៣ នៃសកលវិទ្យាល័យន័រតុនផ្នែកស្ថាបត្យកម្ម និងនគររូបនីយវិទ្យាចាត់ទុកការតាំងពិព័រណ៍នេះ គឺជាកម្មវិធីមួយល្អ ដើម្បីឲ្យនិស្សិតបង្ហាញពីស្នាដៃរបស់ពួកគេ។ និស្សិតឆ្នាំទី៣រូបនេះបានបន្ថែមថា វាបានបង្ហាញពីស្នាដៃនិស្សិតក្នុងការគូរប្លង់ ដែលមានទាំងរូបសំណាកអគារ ដូចយើងបានសាងសង់ពិតៗ ហើយសកម្មភាពនេះ វាបានបង្ហាញពីរីកចម្រើនខាងផ្នែកស្ថាបត្យកម្ម ដើម្បីបង្ហាញទៅដល់ប្អូនៗ នៅសាលាផ្សេងៗបានដឹង។ សម្រាប់មហិច្ឆតារបស់និស្សិតឆ្នាំទី៣ម្នាក់នេះ ចង់ឲ្យសកលវិទ្យាល័យយកស្នាដៃទាំងនេះទៅ តាំងបង្ហាញនៅទីសាធារណៈផ្សេងៗផងដែរ ៕
ចែករំលែកព័តមាននេះ