ខេត្តសៀមរាប ៖ នាព្រឹកថ្ងៃសៅរ៍ទី៣០ ខែកញ្ញា ឆ្នាំ២០១៧ នៅទីស្នាក់ការគណៈកម្មាធិការគណបក្សប្រជាជនកម្ពុជា ខេត្តសៀមរាប មានធ្វើពិធីប្រកាស និងប្រគល់សេចក្តីសម្រេច ស្តីពីការកែសម្រួល និងតែងតាំងបន្ថែមសមាជិកក្រុមការងារចុះជួយតាមបណ្តាភូមិ សង្កាត់ ក្នុងក្រុងសៀមរាប ឆ្ពោះទៅកាន់ការងារបោះឆ្នោត ជ្រើសតាំងតំណាងរាស្ត្រ អាណត្តិទី៦ ក្រោមអធិបតីភាពរបស់ លោក ឃឹម ប៊ុនសុង សមាជិកគណៈកម្មាធិការកណ្តាល និងជាប្រធានគណៈកម្មាធិការ នៃគណបក្សប្រជាជន ខេត្តសៀមរាប ដោយមានការអញ្ជើញចូលរួមពីសំណាក់ លោក លោកស្រី ជាប្រធាន អនុប្រធាន សមាជិក សមាជិកាក្រុមការងារថ្នាក់កណ្ដាលថ្នាក់ខេត្ត ក្រុង ភូមិ សង្កាត់ ផងដែរ ។
ក្នុងកិច្ចស្វាគមន៍នោះដែរ លោក ទេព ប៊ុនឆាយ ប្រធានគណៈកម្មាធិការគណបក្សប្រជាជន ក្រុងសៀមរាប បានធ្វើសេចក្តីរាយការណ៍ អំពីស្ថានភាពការងារសន្តិសុខ សណ្តាប់ធ្នាប់ និងការងារកសាង និងគ្រប់គ្រង ព្រមទាំងការធ្វើបច្ចុប្បន្នភាព ក្នុងការជំរឿនសមាជិកក្រុមបក្ស និងការអានប្រកាសកែសម្រួល បំពេញបន្ថែមសមាសភាពក្រុមការងារ ដើម្បីដឹកនាំចុះជួយមូលដ្ឋានភូមិ សង្កាត់ ក្នុងក្រុងសៀមរាបផងដែរ ។
មានប្រសាសន៍នោះដែរ លោក ឃឹម ប៊ុនសុង បានបញ្ជាក់ថា គណបក្សប្រជាជន ជាគណបក្សធំ មានធនធានមនុស្ស មានធនធានហិរញ្ញវត្ថុ មានបទពិសោធន៍ ក្នុងការដឹកនាំប្រទេសគ្រប់ដំណាក់កាល ដូចនេះគណបក្សប្រជាជនកម្ពុជា ពិតជាមានសមត្ថភាពគ្រប់គ្រាន់ ក្នុងការសម្រេចទិសដៅជម្រុញការអភិវឌ្ឍន៍ប្រទេសកម្ពុជា ឲ្យមានការរីកចម្រើនខ្ពស់នៅឆ្នាំ២០៣០ ។
លោកបានបន្ថែមថា នៅពេលខាងមុខនេះ យើងនឹងមានការបោះឆ្នោតអសកលពីរទៀត គឺការបោះឆ្នោតជ្រើសរើសក្រុមប្រឹក្សាក្រុង ស្រុក ខេត្ត និងការបោះឆ្នោតជ្រើសរើសមាជិកព្រឹទ្ធសភា ។ លោក ឃឹម ប៊ុនសុង ក៏បានពន្យល់ដល់សមាជិកក្រុមការងារបក្ស អំពីគោលនយោបាយដែលគណបក្សចូលរួមបោះឆ្នោត និងការដាក់ចេញនោះ វាជាកិច្ចការដែលគណបក្សប្រជាជនយើង បានធ្វើ នឹងកំពុងធ្វើ នាពេលបច្ចុប្បន្ននេះ ។ ម្យ៉ាងទៀតការ កែសម្រួល និងបំពេញបន្ថែមសមាជិកក្រុមការងារចុះជួយមូលដ្ឋានភូមិនាពេលនេះ គឺជាការពង្រឹង និងជម្រុញ ព្រមទាំងក្តាប់ឲ្យបានការធ្វើបញ្ជី បច្ចុប្បន្នភាពលើបញ្ជីគ្រួសារបក្ស និងធ្វើការជម្រុញដល់សមាជិកបក្សទាំងអស់ ដែលមិនទាន់បានចុះឈ្មោះក្នុងបញ្ជីបោះឆ្នោត និងការធ្វើបច្ចុប្បន្នភាពបញ្ជីឈ្មោះបោះឆ្នោត ឲ្យបានគ្រប់ៗគ្នាផងដែរ ។
លោកក៏បានគូសបញ្ជាក់ថា ក្រុមការងារទាំងអស់ ត្រូវបង្កើននូវកិច្ចសហការជាមួយអាជ្ញាធរមូលដ្ឋាន ក្នុងការគ្រប់គ្រងសមាជិករបស់ខ្លួន ព្រមទាំងផ្តល់នូវជំនឿទុកចិត្តដល់ប្រជាជន ដែលជាកត្តាស្នូលដ៏សំខាន់របស់គណបក្សប្រជាជនកម្ពុជា ។ ក្នុងនោះដែលលោកក៏បានធ្វើការក្រើនរំលឹក ដល់ក្រុមការងារ និងអាជ្ញាធរគ្រប់ជាន់ថ្នាក់ ត្រូវក្តាប់ឲ្យបានអំពីសកម្មភាព និងសតិអារម្មណ៍របស់ប្រជាជន និងក្រុមជនអគតិមួយចំនួន ដែលតែងបង្កនូវភាពអសន្តិសុខក្នុងសង្គម ។
លោកក៏បានគូសបញ្ជាក់ថា ដើម្បីប្រទេសជាតិយើងឆ្ពោះឈានទៅមុខ តម្រូវការជាមុននោះ គឺការរក្សាសន្តិភាពឲ្យខាងតែបាន ទោះដោយតម្លៃណាក៏ដោយ ក៏យើងមិនឲ្យបរទេសមកប្រើប្រាស់ជនជាតិខ្មែរ ដើម្បីសម្លាប់ខ្មែរតទៅទៀតឡើយ ហើយយើងក៏មិនឲ្យនណាមកបំផ្លាញសេចក្តីសុខរបស់ជាតិ និងប្រជាជនយើងឡើយ ។
ក្នុងនោះដែរ លោក ឃឹម ប៊ុនសុង បានលើកនូវវិធានការ និងអនុសាសន៍សំខាន់ៗរបស់ គណបក្សប្រជាជន ដែលជាគោលមាគ៌ា ក្នុងការឆ្ពោះទៅភាពជោគជ័យពេលខាងមុខ ព្រមទាំងបានផ្ដាំផ្ញើ និងណែនាំក្រុមការងារទាំងអស់ ត្រូវបន្តនូវប្រពៃណី វប្បធម៌របស់គណបក្សប្រជាជនកម្ពុជា ដែលមានប្រជាប្រីយ៍ភាពជាយូរលុងមកហើយនោះ គឺឲ្យស្ថិតនៅជាប់ជាមួយប្រជាជនគ្រប់កាលៈទេសៈ ព្រមទាំងត្រូវបង្កើនការយកចិត្តទុកដាក់ខ្ពស់ ចំពោះសមាជិកខ្លួន ដែលជួបនូវការលំបាកក្នុងជីវភាពគ្រួសារ ហើយកត្តាសំខាន់នោះ គឺជម្រុញដល់យុវជននៅតាមមូលដ្ឋាន ឲ្យបានទៅចុះឈ្មោះបោះឆ្នោតថ្មីប្រចាំឆ្នាំ២០១៧ នៅតាមសាលាឃុំ សង្កាត់ ព្រមទាំងត្រូវរួមគ្នាដោះស្រាយរាល់កង្វល់ប្រជាពលរដ្ឋដែលប្រឈម និងជីវភាពរស់នៅ ផ្តល់សេវាតម្រូវការ និងសេវាបម្រើដោយសមធម៌ និងរួមដឹកនាំការពារសមិទ្ធផលដែលកើតមាននៅមូលដ្ឋានឲ្យបានគង់វង្សទៀតផង ៕
ចែករំលែកព័តមាននេះ