លោក អាត់ ខែម យកអំណោយប្រគល់ជូនគ្រួសារសពដោយរន្ទះបា.ញ់
ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ
ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ជាប្រធានក្រុមការងារចុះជួយស្រុកស្វាយចេក បានដឹកនាំស្នងការរង នាយការិយាល័យ ជាប្រធានក្រុមការងារខេត្តចុះជួយឃុំផ្គាំ នៅថ្ងៃទី២៩ ខែកញ្ញា ឆ្នាំ២០១៧នេះ បាននាំយកអំណោយរបស់ឯកឧត្តម ឧបនាយកនាយករដ្ឋមន្ត្រី កែ គឹមយ៉ាន អាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានក្រុមការងារថ្នាក់កណ្តាល ចុះជួយខេត្តបន្ទាយមានជ័យ នាំយកអណោយជាគ្រឿងឧបភោគ បរិភោគ និងថវិកា ទៅចូលរួម និងឧបត្ថម្ភល់គ្រួសារសពដែលរងគ្រោះដោយសាររន្ទះបាញ់។ សពជនរងគ្រោះឈ្មោះ គី សៅ អាយុ៣៣ឆ្នាំ នៅភូមិតាដួល ឃុំផ្គាំ ស្រុកស្វាយចេក ខេត្តបន្ទាយមានជ័យ។ មានប្រពន្ធឈ្មោះ ប៉េង សារ៉ូ អាយុ៣២ឆ្នាំ និងកូនស្រីម្នាក់ទើបមានអាយុ១ឆ្នាំ ឈ្មោះសៅ ណាឆា ភូមិតាដួល ឃុំផ្គាំ ស្រុកស្វាយចេក ខេត្តបន្ទាយមានជ័យ។
មុនពេលកើតហេតុ នៅវេលាម៉ោង៣រសៀល ថ្ងៃទី២៨ ខែញ្ញា ឆ្នាំ២០១៧ នៅពេលដែលផ្ទៃមេឃមានភ្លៀងធ្លាក់ខ្លាំង លាយឡំ និងផ្គររន្ទះ ជនរងគ្រោះបានយកម៉ោងទៅដាក់នៅវាលខាងត្បូងផ្ទះដែលមានចម្ងាយប្រមាណជា៣០០ម៉ែត្រ។ ពេលដើរចេញពីផ្ទះទើបបានប្រហែល១០០ម៉ែត្រ មិនទាំងបានដល់គោលដៅផងក៏ត្រូវបានរន្ទះបាញ់ស្លាប់ ដោយបន្សល់ទុកប្រពន្ធ និងកូនស្រីម្នាក់ ទើបមានអាយុ១ខួប។ នៅថ្ងៃទី២៩ ខែកញ្ញា ឆ្នាំ២០១៧នេះ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ជាប្រធានក្រុមការងារចុះជួយស្រុកស្វាយចេក និងដឹកនាំស្នងការរង នាយការិយាល័យ ជាប្រធានក្រុមការងារខេត្តចុះជួយឃុំផ្គាំ បាននាំយកអំណោយរបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ជាប្រធានក្រុមការងារចុះជួយខេត្តបន្ទាយមានជ័យ រួមមាន៖ អង្ករ៥០គ.ក្រ,ទឹកស៊ីអ៊ីវ៤យួរ,ទឹកត្រី៤យួរ,ទឹក៩យួរ និងថវិកាចំនួន៤០ម៉ឺនរៀល ដើម្បីចូលរួម ឧបត្ថម្ភនៅក្នុងកម្មវិធីបុណ្យនេះផងដែរ។
ជាមួយគ្នានោះដែរលោកឧត្តមសេនីយ៍ស្នងការបានអំពាវនាវដល់ប្រជាពលរដ្ឋទាំងអស់ នៅពេលមេឃភ្លៀងមានផ្គររន្ទះកុំចេញក្រៅ និងមិនឲ្យនិយាយទូរស័ព្ទ ឬកាន់របស់ដែលមានជាតិដែកផងដែរ។ បើនៅវាលស្រែឃើញមេឃរកកល់ភ្លៀង ត្រូវរួសរាន់ប្រញាប់មកផ្ទះ ឬរកទីកន្លែងដែលមានសុវត្ថិភាព។ មានមតិសំណេះសំណាលនាឱកាសនោះ លោកឧត្តមសេនីយ៍ទោ អាត់ ខែម បានថ្លែងនូវការចូលរួម រំលែកមរណៈទុក្ខ ពីសំណាក់ឯកឧត្តម កែ គឹមយ៉ាន និងរូមលោកផ្ទាល់ រួមទាំងក្រុមគ្រួសារ ចូលរួមសោកស្តាយ នូវការបាត់ប្តី ឪពុកជាទីស្រលាញ់ ក៏ដូចជាបាត់បង់សមាជិកមួយរូបដ៏ល្អនោះផងដែរ។ នាឱកាសនោះដែរ លោកឧត្តមសេនីយ៍ស្នងការបានជួបសំណេះសំណាលជាមួយកងកម្លាំងប្រជាការពារភូមិស្វាយសរ ឃុំផ្គាំ និងណែនាំចូលរួមឲ្យចូលសស្រាក់សស្រាំ ជាមួយកងកម្លាំងនគរបាលប៉ុស្តិ៍ រដ្ឋបាលឃុំផ្គាំ ក្នុងកិច្ចការងារការពារសន្តិសុខសណ្តាប់ធ្នាប់ សុវត្ថិភាពក្នុងមូលដ្ឋាន សំដៅឲ្យប្រជាពលរដ្ឋរស់នៅបានសុខដុមរមនា៕
ចែករំលែកព័តមាននេះ