បោកដែកបាន១រថយន្តហើយ ញ៉ាមមកបោក១រថយន្តទៀត មានអីជាប់ខ្នោះ៣នាក់
រាជធានីភ្នំពេញ ៖ ជនសង្ស័យជាជនជាតិខ្មែរអីស្លាមចំនួន៣នាក់ បានប្រើល្បិច និងប្រើឈ្មោះថៅកែភោជនីយដ្ឋាន《ម៉ាណាគី》 ទៅឆបោកអ្នកលក់ដែកគ្រឿងសំណង់មួយកន្លែង
រាជធានីភ្នំពេញ ៖ ជនសង្ស័យជាជនជាតិខ្មែរអីស្លាមចំនួន៣នាក់ បានប្រើល្បិច និងប្រើឈ្មោះថៅកែភោជនីយដ្ឋាន《ម៉ាណាគី》 ទៅឆបោកអ្នកលក់ដែកគ្រឿងសំណង់មួយកន្លែង
រាជធានីភ្នំពេញ ៖ ជនសង្ស័យជាជនជាតិខ្មែរអីស្លាមចំនួន៣នាក់ បានប្រើល្បិច និងប្រើឈ្មោះថៅកែភោជនីយដ្ឋាន《ម៉ាណាគី》 ទៅឆបោកអ្នកលក់ដែកគ្រឿងសំណង់មួយកន្លែង យកដែកបាន១រថយន្តមានតម្លៃជិត៣ពាន់ដុល្លារ និងបានយកទៅលក់យកលុយចែកគ្នាចាយ ថ្ងៃបន្ទាប់បានធ្វើសកម្មភាពបោកម្ដងទៀត ប៉ុន្តែត្រូវបានអ្នកលក់ដែកមានការសង្ស័យ ក៏បានប្ដឹងនគរបាលខណ្ឌដង្កោ ធ្វើការឃាត់ខ្លួនបាននាំយកទៅសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមផ្លូវច្បាប់ ។
ហេតុការណ៍ឆបោកនេះ លើកចុងក្រោយបានកើតឡើងកាលពីវេលាម៉ោង០៣និង៣០នាទីរសៀល ថ្ងៃទី២៨ ខែកញ្ញា ឆ្នាំ២០១៧ ត្រង់ចំណុចដេប៉ូលក់គ្រឿងសំណង់មួយកន្លែង ស្ថិតនៅភូមិក្រាំងពង្រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។ ត្រូវចាប់ខ្លួនបានទាំង៣នាក់ កាលពីវេលាម៉ោង០៥និង៣០នាទីល្ងាច ថ្ងៃទី២៨ ខែកញ្ញា ឆ្នាំ២០១៧ ខណៈពេលដែលពួកជនខិលខូចខាងលើ ជិះម៉ូតូរត់គេចខ្លួនទៅដល់ជិតក្រុមហ៊ុនរថយន្តម៊ែសឺដែស ស្ថិតនៅតាមផ្លូវ៦០ម៉ែត្រ ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
ជនសង្ស័យដែលត្រូវចាប់ខ្លួនទាំង៣នាក់ខាងលើនោះមាន ១.ឈ្មោះ កូប ម៉ាស់ម៉ូត អាយុ៣៣ឆ្នាំ ជនជាតិខ្មែរអីស្លាម មុខរបរនេសាទត្រី, ២.ឈ្មោះ វី ម៉ាត់លី អាយុ២៤ឆ្នាំ ជនជាតិខ្មែរអីស្លាម មុខរបរនេសាទត្រី, ៣.ឈ្មោះ សួន វណ្ណារ៉ា ហៅឌី អាយុ៣៥ឆ្នាំ ជនជាតិខ្មែរ មុខរបរកម្មករសំណង់ អ្នកទាំង៣នាក់នេះមានទីលំនៅក្នុងភូមិជ្រោយចង្វារ សង្កាត់ជ្រោយចង្វារ ខណ្ឌជ្រោយចង្វារ ។ ក្រោយការចាប់ខ្លួន នគរបាលខណ្ឌដង្កោបានដកហូតរថយន្តមួយគ្រឿងម៉ាកម៉ាយីធូ ពណ៌ស ពាក់ស្លាកលេខ ភ្នំពេញ ៣C-៤៥៧៧ ដែលមានដែកទីបជ្រុងចំនួន៣៧០ដើមនៅលើនោះ, ម៉ូតូមួយគ្រឿងម៉ាកPCX ពណ៌ស ពាក់ស្លាកលេខ ភ្នំពេញ ១GI-៧០៧៧, និងទូរស័ព្ទដៃម៉ាកសាំសុង១គ្រឿង ។ ចំណែកអ្នកលក់ដែកគ្រឿងសំណង់ ដែលចាញ់បោកក្រុមបុរសខ្មែរអីស្លាមនោះឈ្មោះ គ្រី ឡេងស៊ាង ភេទប្រុស អាយុ៣៦ឆ្នាំ ជនជាតិខ្មែរ មានទីលំនៅក្នុងភូមិក្រាំងព្រង សង្កាត់ក្រាំងពង្រ ខណ្ឌដង្កោ ៕
ចែករំលែកព័តមាននេះ