ផាន់ គ្រាន់ និងធន់ ចាន់តាក់ ដល់ម៉ោងឡើងវ៉ៃជាមួយថៃ
រាជធានីភ្នំពេញ ៖ នៅរសៀលថ្ងៃសៅរ៍ទី៣០ កញ្ញា ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹង
រាជធានីភ្នំពេញ ៖ នៅរសៀលថ្ងៃសៅរ៍ទី៣០ កញ្ញា ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹង
រាជធានីភ្នំពេញ ៖ នៅរសៀលថ្ងៃសៅរ៍ទី៣០ កញ្ញា ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងដល់កំណត់ត្រូវប្រកួតយក៣ពិន្ទុឆ្ពោះទៅដណ្តើមខ្សែក្រវាត់អន្តរជាតិទៀតហើយ ដោយប្រកាសបើករេញឱ្យកីឡាករកម្ពុជា២រូប និងថៃ២រូបប៉ះគ្នា ។ អ្វីដែលគេកត់សម្គាល់សម្រាប់ការប្រកួតលើកនេះគឺកីឡាករកម្ពុជាវ័យក្មេងប៉ះសុទ្ធតែជាមួយកីឡាករជើងចាស់មកពីប្រទេសថៃដែលមិនទាន់ដឹងថា តើអ្នកណានឹងយកបាន៣ពិន្ទុនៅឡើយទេ ។
ការប្រកួតដែលនឹងចាប់ផ្ដើមធ្វើឡើងនៅវេលាម៉ោង២រសៀលស្អែកនេះមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលរសៀលថ្ងៃសម្រាក ដែលជាថ្ងៃមនុស្សម្នាក្នុងក្រុងនិយមមកទស្សនាដល់ស្ទីឌីយោកកកុញ ដោយសារតែមុនការប្រដាល់គឺជាវេទិកាតន្ត្រីបន្តផ្ទាល់ផង ។ កីឡាករកម្ពុជា២រូបគឺជើងខ្លាំងផាន់ គ្រាន់ និងធន់ ចាន់តាក់ នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅថ្ងៃនោះ ។ អ្នករៀបចំការប្រកួតបានអះអាងថា កីឡាករទាំង៤រូបត្រូវប៉ះគ្នាក្នុងវគ្គសន្សំពិន្ទុ ហើយគ្រាន់តែបាន
ដឹងភ្លាមពួកគេសុទ្ធតែបានត្រៀមខ្លួនរួចរាល់ដោយបានចំណាយពេលច្រើនជាងមួយសប្ដាហ៍ក្នុងការហ្វឹកហាត់នោះផង ។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាទាំង៤រូបដែលមានឈ្មោះដណ្ដើមខ្សែក្រវាត់ក្នុងព្រឹត្តិការណ៍ប្រដាល់ពេលរសៀលថ្ងៃនោះ កីឡាករផាន់ គ្រាន់ គឺជាជើងខ្លាំងម្នាក់ដែលលោករំពឹងខ្ពស់បើទោះជាគេត្រូវប្រឈមនឹងកីឡាករថៃដែលមានវិជ្ជាគុនខ្លាំងមិនធម្មតាក្ដី ។ គេត្រូវប៉ះកីឡាករថៃឈ្មោះ Phat Phayak ក្នុងនាមជាគូឯកអន្តរជាតិនៅថ្ងៃសៅរ៍ស្អែក ។ លោកថា ជំនួបរវាងពួកគេជារឿងសំខាន់ ដោយសារអ្នកណាឈ្នះក្រៅពីបានពិន្ទុហើយ គឺត្រូវទទួលបានទំនុកចិត្តពីអ្នកគាំទ្រទៅទៀត ។
ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ។ លោកថា កីឡាករ ផាន់គ្រាន់ អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់ឃើញនាពេលកន្លងមក ។ កីឡាករកម្ពុជារូបនេះមានការឈានឡើងសមត្ថភាពបើមើលលើការប្រកួតប៉ុន្មានលើកចុងក្រោយទើបលោកយល់ថា គេអាចបាន៣ពិន្ទុពីការប្រកួតលើកនេះ ។ លោកនិយាយថា កីឡាករថៃធ្លាប់ប្រកួត៧៥លើក ឈ្នះ៦៥លើក ចាញ់១០លើក និងមិនដែលស្មើ ក្នុងពេលកីឡាករកម្ពុជាផាន់ គ្រាន់ ធ្លាប់ប្រកួត៩៩លើក ឈ្នះ៨១លើក ចាញ់១៦លើក និងស្មើ២លើក។
សម្រាប់កីឡាករ ធន់ ចាន់តាក់ លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងមកពីថៃឈ្មោះPhat Chhaydenនៅក្នុងព្រឹត្តិការណ៍ប្រដាល់អន្តរជាតិដណ្ដើមពិន្ទុនេះដែរក្នុងនាមជាគូរងឯក ។ លោកថា ការប្រកួតរបស់ពួកគេនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលធន់ ចាន់តាក់ គឺជាកីឡាករមិនធម្មតា ដោយលោកបានចាត់ទុកថាគឺជាជើងខ្លាំង និងធនធានកីឡាករវ័យក្មេងដ៏កម្រនោះផង ។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងប្រកួតនៅក្នុងព្រឹត្តិការណ៍នេះ ។ លោកថា កីឡាករថៃជាដៃគូគេគឺជាជើងចាស់ និងល្បីឈ្មោះ តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំ ។ កីឡាករថៃធ្លាប់ប្រកួត៧៨លើក ឈ្នះ៦៣លើក ចាញ់១៦លើក និងមិនដែលស្មើ រីឯកីឡាករកម្ពុជាធ្លាប់ប្រកួត៦១លើក ឈ្នះ៥២លើក ចាញ់៩លើក និងមិនដែលស្មើដូចគ្នា ។ នៅក្នុងព្រឹត្តិការណ៍ប្រដាល់ពេលព្រឹកថ្ងៃអាទិត្យនៅលើសង្វៀនទូរទស្សន៍អាស៊ីអាគ្នេយ៍ដដែលនេះក៏មានការប្រកួតអន្តរជាតិបែបនេះមិនខុសគ្នា ខណៈនៅប៉ុស្តិ៍លេខ៥ព្រែកកំពិសឯណោះវិញក៏មានការប្រកួតជម្រុះ៣២នាក់យក១៦នាក់សម្រាប់សប្ដាហ៍ទី៥ដែលការប្រកួតចាប់ផ្ដើមពីម៉ោង៥ល្ងាចតទៅ ៕
ចែករំលែកព័តមាននេះ