សម្តេចតេជោ ៖ ខ្ញុំបានផ្តល់ជំនួយច្រើនសន្ធឹកសន្ធាប់ដល់សិល្បករ សិល្បការិនីជាង២០ឆ្នាំ គ្រាន់តែ…
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា
រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងថា ចាប់ពីឆ្នាំ២០១៨ នេះតទៅ សម្តេចនឹងប្រារព្ធពិធីជួបជុំសិល្បករ សិល្បការិនីមួយឆ្នាំម្តង ហើយពិធីនេះនឹងត្រូវរៀបចំជាមួយគ្នានឹងទិវាវប្បធម៌ ៣ មីនា ដើម្បីពង្រឹងទំនាក់ទំនងរវាងសិល្បៈបុរាណ និងសម័យ ។
ថ្លែងនៅឯពិធីបំពាក់គ្រឿងឥស្សរិយយស ជូនព្រឹទ្ធាចារ្យកោសល្យវោហារ គង់ ណៃ នៅវិមានសន្តិភាព ថ្ងៃទី២៩ ខែកញ្ញា សម្តេចបានរម្លឹកឡើងវិញថា សម្តេចបានជួបសិល្បករជើងចាស់ គឺលោកតា គង់ ណៃ និងលោកស្រី ហែម សុវណ្ណ ដំបូងក្រោយសម័យប៉ុល ពត ពេលសម្តេចអញ្ជើញទៅខេត្តកំពតកាលពីឆ្នាំ១៩៨២ ។ សម្តេចបានបន្តថា ពេលនោះ សម្តេចក៏បានស្នើឲ្យតាគង់ ណៃ ច្រៀងចម្រៀងរបស់គាត់ដែលសម្តេចស្គាល់ច្បាស់នោះ គឺបទ «ដំរីយោលដៃ» ។ បន្ទាប់សម្តេចក៏បានស្នើសុំរដ្ឋសភា ដើម្បីសុំតា គង់ ណៃ មកច្រៀង ដែលនោះជាការបង្ហាញខ្លួនរបស់គាត់លើកដំបូងនៅក្រុងភ្នំពេញ ។
សម្តេចមានប្រសាសន៍ថា សម្តេចបានឧបត្ថម្ភ លោកតា គង់ ណៃ ២០ឆ្នាំរួចមកហើយ ដែលក្នុងនោះសម្តេចបានឧបត្ថម្ភចំនួន ៦០០ ដុល្លារក្នុងមួយឆ្នាំ ហើយសម្តេចក៏បានជួយឧបត្ថម្ភ លោកតា ប្រាជ្ញ ឈួន ចំនួន ១០០ដុល្លារ ក្នុងមួយខែផងដែរ ។
សម្តេចតេជោបានបញ្ជាក់ថា៖ «ខ្ញុំបានផ្តល់ជំនួយច្រើនសន្ធឹកសន្ធាប់ដែរ គ្រាន់តែមិនប្រកាស» ។ សម្រាប់សិល្បករ សិល្បការិនីចាស់ៗតាំងពីយាយចេក ម៉ាច ជាដើម គឺសម្តេចបានជួយឧបត្ថម្ភចូលជិត២០ឆ្នាំហើយ មិនមែនមួយថ្ងៃ ឬ២ថ្ងៃទេ ។
សម្តេច ហ៊ុន សែន ក៏បានចូលរួមអបអរសាទរដល់ព្រឹទ្ធាចារ្យកោសល្យវោហារ គង់ ណៃ ដែលជាព្រឹទ្ធាចារ្យសិល្បៈចាប៉ី ដែលទទួលបានពានរង្វាន់សិល្បៈវប្បធម៌ហ្វុគុអូកា ពីជប៉ុនថ្មីៗនេះ ព្រោះនេះមិនមែនជាបញ្ហាដាច់ដោយឡែករបស់លោកតា គង់ ណៃទេ តែជាកិត្តិយសរបស់ប្រទេសជាតិផងដែរ ។ សូមបញ្ជាក់ថា ពានរង្វាន់សិល្បៈវប្បធម៌ ហ្វុគុអូកានេះ គឺមានជនជាតិខ្មែរ ៣ ហើយ ដែលទទួលពានរង្វាន់នេះ ដែលក្នុងនោះមានព្រឹទ្ធាចារ្យ ទេពបញ្ញាកោសល្យវិជ្ជា ឆេង ផុន ទទួលបាននៅឆ្នាំ១៩៩៧ និងលោកសាស្ត្រាចារ្យបណ្ឌិត អាំង ជូលាន ទទួលបាននៅឆ្នាំ ២០១១ ៕
ចែករំលែកព័តមាននេះ