រាជធានីភ្នំពេញ ៖ លោក យូ ជិនហុងម្ចាស់មេដាយមាសស៊ីហ្គេមលើវិញ្ញាសាប្រដាល់សាកលក្នុងទសវត្សឆ្នាំ១៩៦០ដែលសព្វថ្ងៃមានអាយុ៧៦ឆ្នាំទៅហើយនោះបានមានប្រសាសន៍ថា
រាជធានីភ្នំពេញ ៖ លោក យូ ជិនហុងម្ចាស់មេដាយមាសស៊ីហ្គេមលើវិញ្ញាសាប្រដាល់សាកលក្នុងទសវត្សឆ្នាំ១៩៦០ដែលសព្វថ្ងៃមានអាយុ៧៦ឆ្នាំទៅហើយនោះបានមានប្រសាសន៍ថា ចំណុចខ្សោយដែលធ្វើឱ្យវិស័យកីឡានៅកម្ពុជាបច្ចុប្បន្នមិនមានការរីកចម្រើនគឺដោយសារតែកីឡាករភាគច្រើនមិនគោរពវិន័យតែម្ដង ។
លោក យូ ជិនហុង បានប្រាប់អ្នកយកព័ត៌មានកោះសន្តិភាពថា លោកបានទៅរស់នៅប្រទេសកាណាដាតាំងពីឆ្នាំ១៩៨៣មកម្ល៉េះបន្ទាប់ពីភរិយានិងកូនរបស់លោកបានស្លាប់ចោលអស់ក្នុងរបបប៉ុលពត ។ លោកត្រូវបានរាជរដ្ឋាភិបាលកម្ពុជាអញ្ជើញឱ្យមកជួយបង្ហាត់បង្ហាញពីបច្ចេកទេសប្រដាល់សាកលដល់កីឡាករថ្នាល ដើម្បីត្រៀមប្រកួតកីឡាស៊ីហ្គេមពេលដែលកម្ពុជាទទួលធ្វើជាម្ចាស់ផ្ទះនៅក្នុងឆ្នាំ២០២៣ខាងមុខ ។ លោកថា កាលពីសម័យសង្គមរាស្ត្រនិយម វិស័យកីឡានៅកម្ពុជាស្ទើរតែគ្រប់ប្រភេទមានការរីកចម្រើនទាំងអស់ដោយសារតែកីឡាករ-កីឡាការិនីម្នាក់ៗខិត
ខំហ្វឹកហាត់និងគោរពវិន័យបានយ៉ាងល្អមិនហ៊ានធ្វេសប្រហែសឡើយ ។ លោកបញ្ជាក់ថា កីឡាករម្នាក់ៗបើកាលណាខ្វះវិន័យហើយគឺមិនអាចសម្រេចគោលដៅបានទេ ជាក់ស្ដែងក្នុងអំឡុងពេលលោកមកបង្ហាត់ដល់ក្មេងៗដែលជាកីឡាករថ្នាល លោកសង្កេតឃើញថា ពួកគេភាគច្រើនមិនសូវគោរពវិន័យទាល់តែសោះ ដូចជាមកហ្វឹកហាត់មិនទៀងទាត់ជាដើមដល់ពេលសួរនាំទៅតែងរកលេសមិនចេះចប់ ។ លោកថា បើពួកគេធ្វើបែបនេះមិនអាចក្លាយខ្លួនជាធនធានកីឡាករល្អរបស់ប្រទេសជាតិបានទេ ។
លោក យូ ជិនហុង បានលើកយកបទពិសោធន៍និងស្នាដៃដែលលោកសម្រេចបានជូនជាតិកាលលោកនៅជាកីឡាករប្រដាល់សាកលជម្រើសជាតិក្នុងអំឡុងទសវត្សឆ្នាំ១៩៦០ថា តាមរយៈការខិតខំប្រឹងប្រែងហ្វឹកហាត់ប្រកប ដោយឆន្ទៈខ្ពស់ និងការគោរពវិន័យបានយ៉ាងល្អផងនោះធ្វើឱ្យលោកទទួលជោគជ័យក្នុងការប្រកួតជាបន្តបន្ទាប់ ។ ជាក់ស្ដែង ក្នុងការប្រកួតកីឡាស៊ីហ្គេមនៅទីក្រុងយាំងហ្គូនប្រទេសមីយ៉ានម៉ានៅក្នុងឆ្នាំ១៩៦០ លោកគឺជាកីឡាករកម្ពុជាដំបូងដែលដណ្ដើមបានមេដាយមាសលើវិញ្ញាសាប្រដាល់ ។ បន្ទាប់មកទៀតនៅក្នុងឆ្នាំ១៩៦២ លោកដណ្ដើមបានមេដាយសំរឹទ្ធពីការប្រកួតកីឡាអាស៊ីហ្គេមនៅប្រទេសឥណ្ឌូណេស៊ី ។ លោកថា ទម្រាំតែដណ្ដើមបានមេដាយម្ដងៗមិនមែនជារឿងងាយស្រួលនោះទេពោលគឺត្រូវឆ្លងកាត់ការហ្វឹកហាត់ជាប់លាប់ និងគោរពវិន័យផងដែរ ។ ទោះបីយ៉ាងណាលោកនៅតែព្យាយាមរិៈរកគ្រប់មធ្យោបាយដើម្បីណែនាំនិងតម្រង់ទិសដល់ពួកគេឱ្យក្លាយជាកីឡាករល្អសម្រាប់ប្រទេសជាតិនៅថ្ងៃអានាគត។
ប៉ុន្តែនាពេលថ្មីៗកន្លងទៅនេះ លោកបានឮដំណឹងថា ក្រសួងអប់រំ យុវជន និងកីឡា បានចេញលិខិតរំសាយការប្រមូលផ្ដុំកីឡាករថ្នាលមុនការកំណត់ ។ មិនមែនតែរូបលោកម្នាក់ទេដែលបានដឹងដំណឹងនេះ គឺមានគ្រូៗជាច្រើនប្រភេទកីឡាទៀតដែលបានដឹងដំណឹងនេះដែរ ។ តាមការកំណត់ ការប្រមូលផ្ដុំគឺត្រូវបន្តរហូតដល់ខែធ្នូ ប៉ុន្តែពេលនេះប្រហែលជាត្រូវរំសាយនៅដើមខែតុលា ខាងមុខនេះហើយ ។
លោក អាត សំរិទ្ធ ជាគ្រូបង្គោលរបស់ក្រុមកីឡាករប្រដាល់ថ្នាលនេះបានឱ្យដឹងថាលោកពិតជាមានការសោកស្ដាយខ្លាំងណាស់ព្រោះថា ទម្រាំប្រមែប្រមូលបានកីឡាករល្អៗមកហ្វឹកហាត់គឺមានការលំបាកខ្លាំងណាស់ ។ បើសិនជាពួកគេមិនបានស្ថិតក្នុងការមើលខុសត្រូវឱ្យបានល្អទេនោះមិនដឹងថាជោគវាសនារបស់ពួកគេនឹងទៅជាយ៉ាងណានោះទេ ។
តាមការឱ្យដឹងពីមន្ត្រីកីឡាមួយចំនួនដែលសុំមិនបង្ហាញឈ្មោះបានប្រាប់ថា មូលហេតុដែលនាំឱ្យមានការរំសាយក្រុមកីឡាករថ្នាលបែបនេះដោយសារក្រសួងអប់រំ យុវជន និងកីឡា ពុំមានថវិកាគ្រប់គ្រាន់សម្រាប់ផ្ដល់ឱ្យ ដូច្នេះមានតែរំសាយមុនពេលកំណត់តែម្ដងទៅ ៕
ចែករំលែកព័តមាននេះ