ស្វែងយល់ពីកីឡាករប្រណាំងម៉ូតូនៅកម្ពុជាបច្ចុប្បន្ន
រាជធានីភ្នំពេញ ៖ នៅក្នុងពិភពប្រណាំងម៉ូតូ លោក គង់ សុធារ៉ា បញ្ជាក់ថា
រាជធានីភ្នំពេញ ៖ នៅប្រទេសកម្ពុជាគេកត់សម្គាល់ឃើញកីឡាប្រណាំងម៉ូតូក៏មានការរីកចម្រើនផងដែរ បើទោះជាការហ្វឹកហាត់កីឡាមួយនេះត្រូវប្រឈមនឹងគ្រោះថ្នាក់បន្តិចក្ដី ។ អ្នកហ្វឹកហាត់និងអ្នកចូលរួមប្រណាំងភាគច្រើនមិនមែនជាកីឡាករអាជីពទេ ដោយពួកគេមួយចំនួនប្រមូលផ្ដុំគ្នាដើម្បីជិះបង្អួតពីភាពក្លាហាន និងដើម្បីសម្ញែងពីសមត្ថភាពរបស់ខ្លួនប៉ុណ្ណោះ ។
យោងតាមអ្នកជំនាញបានអះអាងថា នៅកម្ពុជាថ្វីដ្បិតតែកីឡាប្រណាំងម៉ូតូមិនសូវមានការគាំទ្រក្នុងចង្កោមមនុស្សវ័យកណ្ដាល និងវ័យចាស់ ក៏អ្នកនិយមប្រើប្រាស់ម៉ូតូដើម្បីជិះបង្ហោះ និងប្រណាំងគ្នាស្ថិតក្នុងវ័យជំទង់និងយុវវ័យនៅតែមានកំណើនដដែលទោះបីកើនឡើងតិចតួចបើធៀបនឹងប្រទេសជិតខាង ក្ដី ។ មានការបញ្ជាក់ថា ក្រុមនេះ(អ្នកដែលមានលទ្ធភាពជួលម៉ូតូ និងសម្ភារកីឡាប្រណាំងម៉ូតូ)ពីដំបូងគ្រាន់តែប្រមូលផ្ដុំគ្នាដើម្បីជិះប្រណាំងគ្នាលេងប៉ុណ្ណោះ លុះយូរៗទៅអ្នកមានចំណូលចិត្តទាំងនោះក៏កែប្រែខ្លួនក្លាយជាអ្នកអាជីពតែម្ដង ដោយអ្នកខ្លះបានទាំងចំណាយលុយដល់ខ្ទង់ម៉ឺនដុល្លារកុម្ម៉ង់ទិញម៉ូតូប្រណាំង ឬកែច្នៃម៉ូតូឱ្យក្លាយជាម៉ូតូសម្រាប់ប្រណាំងពេញលក្ខណៈយកមកធ្វើជារបស់ខ្លួនទៀតផង ។ អ្នកប្រណាំងម៉ូតូនៅក្នុងប្រទេសកម្ពុជាភាគតិចណាស់ដែលមានម៉ូតូជារបស់ផ្ទាល់ខ្លួន ទើបរាល់ការប្រណាំងម្ដងៗពួកគេច្រើនយកម៉ូតូពីកន្លែងជួលប៉ុណ្ណោះ ដោយសារតែម៉ូតូនេះមានតម្លៃខ្ពស់ និងមិនអាចប្រើការអ្វីបានក្រៅពីទុកសម្រាប់ជិះប្រណាំង ។ ក្នុងនោះឱកាសប្រណាំងម៉ូតូក៏មិនសូវកើតមានញឹកញាប់ដែរ យ៉ាងច្រើនមួយអាទិត្យម្ដង ឬកន្លះខែម្ដងប៉ុណ្ណោះផ្អែកតាមការណាត់ជួបរបស់អ្នកជិះម៉ូតូមានពេលវេលា ។
ហេតុផលនៃការជួបគ្នាមិនបានរាល់ថ្ងៃដូចការជិះកង់ដើម្បីហាត់ប្រាណនេះ គឺដោយសារតែកន្លែងដែលអាចជិះម៉ូតូប្រណាំងបានស្ថិតនៅខេត្តឆ្ងាយៗ និងនៅទីវាលដែលតម្រូវឱ្យពួកគេត្រូវចំណាយពេលច្រើនដើម្បីជិះទៅប្រមូលផ្ដុំគ្នា ។ គេមិនអាចប្រណាំងម៉ូតូ ឬហ្វឹកហាត់ប្រណាំងម៉ូតូនៅកណ្ដាលរាជធានី ឬនៅទីប្រជុំជនបានទេ ដោយសារតែកីឡាមួយនេះតម្រូវឱ្យស្វែងរកផ្លូវបត់បែន និងមានខ្សាច់ផងដូចជានៅម្ដុំជ្រោយចង្វានិងនៅតាមបណ្ដាខេត្តដាច់ស្រយាលជាដើម ទើបមានសណ្ឋានដីដែលមានលក្ខណៈបែបនេះ ។ យ៉ាងណាមិញ ក្នុងរង្វង់៣ខែចុងក្រោយនេះ គេឃើញការប្រណាំងម៉ូតូឧស្សាហ៍កើតឡើង បន្ទាប់ពីក្រុមហ៊ុនធំមួយបានវិនិយោគផ្ទៃដីច្រើនហិកតានៅក្នុងខណ្ឌសែនសុខ ធ្វើជាទីលានប្រណាំងម៉ូតូ ដោយបានរៀបចំជាផ្លូវកោង និងគ្រោងរៀបចំជាផ្លូវឡើងទួលចុះទួលជាដើម ដើម្បីឱ្យពេញស្ដង់ដារក្នុងការប្រណាំងម៉ូតូ ។ គេឃើញកីឡាករក្មេងៗដែលកាលពីមុនមិនសូវចូលចិត្តកីឡាប្រភេទនេះ ក៏បានទៅហ្វឹកហាត់ប្រណាំងម៉ូតូផងដែរ ដោយសារតែទីលាននោះក្រៅពីជួលឱ្យហ្វឹកហាត់ហើយក៏មានការបណ្ដុះបណ្ដាល និងមានម៉ូតូគ្រប់ប្រភេទដាក់ឱ្យជួលហ្វឹកហាត់ផងដែរ។ កាលពីមុនមានតែមនុស្សចាប់ពីវ័យ២០ក្រាស់ប៉ុណ្ណោះដែលមានចំណូលចិត្តចង់ក្លាយជាកីឡាករប្រណាំងម៉ូតូ ប៉ុន្តែក្នុងមួយរយៈចុងក្រោយនេះយុវជនវ័យជំទង់ដែលមានអាយុក្នុងរង្វង់១៦ឆ្នាំឡើងក៏ចូលចិត្តហ្វឹកហាត់កីឡានេះដែរ បើទោះជាការហ្វឹកហាត់របស់អ្នកខ្លះគឺមិនទាន់មានភាពស្វាហាប់ ដោយសារតែខ្វះភាពក្លាហានក្ដី ។
អ្នកអាជីពលើជំនាញនេះបានអះអាងថា ដើម្បីក្លាយខ្លួនជាអ្នកប្រណាំងម៉ូតូអាជីពមិនទាល់តែជាអ្នកមានលុយទិញម៉ូតូថ្លៃ ឬជាមនុស្សមានកម្ពស់ខ្ពស់នោះទេ គឺអ្នកមានកម្ពស់ត្រឹមតែ១,៦០ម៉ែត្រជាងក៏អាចក្លាយជាអ្នកអាជីពបានដែរ សំខាន់ឱ្យតែមានស្មារតីរឹងមាំ និងមានភាពក្លាហានគ្រប់គ្រាន់ ។ ជាក់ស្ដែងអ្នកជំនាញជិះម៉ូតូនៅក្នុងប្រទេសកម្ពុជាភាគច្រើនមិនមែនសុទ្ធតែខ្ពស់ជង្គ្រោងៗនោះទេគឺសុទ្ធតែជាបុរសក្នុងខ្នាតអាស៊ីប៉ុណ្ណោះ ។ យ៉ាងណាមិញ កីឡាមួយនេះមិនទាន់សាយភាពដល់ស្ត្រីនៅឡើយទេ ដោយសារតែក្នុងប្រទេសកម្ពុជាមិនគាំទ្រឱ្យស្ត្រីនិងយុវតីប្រើប្រាស់ម៉ូតូប្រណាំង ហើយបើទោះជាមាននារីក្លាហានចង់ចូលរួមប្រណាំងម៉ូតូក៏ស្ត្រីទាំងនោះមិនទាន់ហ៊ានប្រឈមមុខនឹងការរិះគន់នៅឡើយដែរ ។
លោក គង់ សុធារ៉ា អ្នករៀបចំព្រឹត្តិការណ៍ប្រណាំងម៉ូតូថ្នាក់ជាតិ និងជាអ្នកគ្រប់គ្រងទីលានប្រណាំងម៉ូតូ King Track Circuit នៅខណ្ឌសែនសុខបានអះអាងថា កីឡាប្រណាំងម៉ូតូបើនិយាយឱ្យចំគឺមានគ្រោះថ្នាក់ ប៉ុន្តែសម្រាប់អ្នកដែលមានស្មារតីរឹងមាំ និងចេះទប់លំនឹងម៉ូតូនៅផ្លូវបត់បែន និងផ្លូវទួល គឺមិនងាយដួលនោះទេ ។ យ៉ាងណាមិញ លោកថា កីឡានេះមិនអាចហ្វឹកហាត់ ឬប្រណាំងគ្នានៅលើផ្លូវបេតុង និងផ្លូវកៅស៊ូអ៊ូអរបានទេ ដោយសារតែការពារពេលមានគ្រោះថ្នាក់កុំឱ្យប៉ះទង្គិចរាងកាយធ្ងន់ធ្ងរ។ សំអាងលើសម្លៀកបំពាក់ដែលកីឡាករមួយនេះប្រើប្រាស់ជាប់ខ្លួន ស្ថានភាពពេលដួលម៉ូតូមិនសូវមានការប៉ះទង្គិចខ្លាំងនោះទេ ដោយសារតែគ្រប់សម្លៀកបំពាក់ដែលកីឡាករបានប្រើសុទ្ធតែមានប៉ុងការពារកុំឱ្យដាច់រលាត់ ។ ប៉ុន្តែកីឡានេះវាងាយប្រឈមដូចជាបណ្ដាលឱ្យបាក់ឆ្អឹង និងបាក់កជាដើម ប្រសិនបើពេលដួលកីឡាករមិនមានស្មារតីច្បាស់លាស់ ហើយមិនរហ័សក្នុងការកែប្រែស្ថានភាពដួល ។ លោកថាអ្នកហាត់ប្រណាំងម៉ូតូ គឺត្រូវមានកាយសម្បទារឹងមាំ និងមានលំហាត់ប្រាណផ្នែកផ្សេងរួចជាស្រេច ដើម្បីកុំឱ្យប៉ះទង្គិចណាមួយបណ្ដាលឱ្យឈឺសន្លាក់និងសាច់ដុំ ។ ក្នុងនោះអ្នកហាត់ប្រណាំងម៉ូតូ ក៏ត្រូវតែមានភ្នែកវៃ និងមានការបត់បែនរហ័សផងដែរ គឺមិនមែនគ្រាន់តែជួបស្ថានភាពប៉ះទង្គិចណាមួយហើយក៏តក់ស្លុតនោះទេ ។ លោកថា អ្នកប្រណាំងម៉ូតូនៅក្នុងប្រទេសកម្ពុជាមានប្រមាណជាង៣០០នាក់ ដោយក្នុងចំណោមអ្នកទាំងជាង៣០០នាក់នោះ មួយចំនួនគឺគ្រាន់តែចង់ហ្វឹកហាត់ដើម្បីប្រណាំងលេងៗគ្រាន់ជាការកម្សាន្ត និងមួយចំនួនចង់ក្លាយជាកីឡាករអាជីពតែម្ដង ។ អ៊ីចឹងហើយទើបលោកសម្រេចរៀបចំការប្រកួតក្នុងរង្វង់២ ទៅ៣ខែម្ដង ដើម្បីឱ្យអ្នកមានទេពកោសល្យ ហើយស្ទាក់ស្ទើរមិនទាន់ចង់ក្លាយជាអ្នកអាជីព ក្លាយជាអ្នកអាជីព ។
នៅក្នុងពិភពប្រណាំងម៉ូតូ លោក គង់ សុធារ៉ា បញ្ជាក់ថា មានច្រើនប្រភេទកម្លាំងម៉ូតូ ប៉ុន្តែសម្រាប់ប្រទេសកម្ពុជាគេនិយមត្រឹមតែ៤ប្រភេទកម្លាំងម៉ាស៊ីនប៉ុណ្ណោះ គឺម៉ូតូប្រណាំងក្នុងកម្លាំង១១០សេសេ ១២៥សេសេ ១៥០សេសេ និងកម្លាំងធំជាង១៥០សេសេ ។ ក្នុងនោះសម្រាប់អ្នកនិយមប្រណាំងម៉ូតូហោះក៏មិនសូវជាមានច្រើននោះដែរ ដោយសារតែកីឡាប្រភេទនោះមានការប្រឈមខ្លាំងជាងការប្រណាំងម៉ូតូលើទីលាន និងពិបាករកទីតាំងអំណោយផលផង។ សម្រាប់ម៉ូតូដែលប្រើប្រាស់គេច្រើនយកម៉ូតូធំៗធម្មតា ឬម៉ូតូសម្រាប់ប្រណាំងមកច្នៃកម្លាំងម៉ាស៊ីន ដើម្បីប្រើសម្រាប់ប្រណាំង ខណៈដែលម៉ូតូទាំងនោះគឺក្រោយយកមកច្នៃហើយ ក៏ប្រើប្រាស់បានសម្រាប់តែប្រណាំង និងទុកសម្រាប់ហ្វឹកហាត់ប៉ុណ្ណោះ គឺមិនអាចយកទៅប្រើសម្រាប់ជិះប្រចាំថ្ងៃកើតទេ ដោយសារតែវាមានសំឡេងរំខាន ហើយកម្លាំងរបស់វាក៏ខ្លាំងមិនដូចម៉ូតូមិនទាន់កែច្នៃ ។ លោកថា អ្នកចង់ក្លាយជាអ្នកប្រណាំងម៉ូតូកាលពីមុនមានការលំបាក តែឥឡូវគ្រាន់តែទាក់ទងតាមគ្នាដែលមានជំនាញខាងប្រណាំងម៉ូតូ និងមកហ្វឹកហាត់នៅលើទីលានរបស់លោកដោយផ្ទាល់ គឺអាចក្លាយជាអ្នកប្រណាំងម៉ូតូបានហើយ ដោយគ្រាន់តែការហ្វឹកហាត់នោះគឺត្រូវចំណាយពេលតិចឬច្រើន អាស្រ័យទៅតាមទេពកោសល្យ និងភាពក្លាហានរបស់អ្នកហ្វឹកហាត់ ។ ធៀបនឹងប៉ុន្មានឆ្នាំមុន លោកថាអាជីពនេះមានការរីកចម្រើនជាងមុន ដោយសារតែនៅតាមខេត្តដូចជានៅសៀមរាប និងកំពង់ស្ពឺជាដើមក៏ឧស្សាហ៍មានការរៀបចំប្រណាំងម៉ូតូជាលក្ខណៈមិត្តភាព មុនពេលទីលានរបស់លោកមិនទាន់ត្រូវបានរៀបចំ។
យ៉ាងណាមិញលោកនៅតែមើលឃើញថា អ្នកមានជំនាញប្រណាំងម៉ូតូទាំងជាង៣០០នាក់ នៅមិនទាន់ដាក់ចិត្តក្លាយខ្លួនជាកីឡាករអាជីពពេញលេញ ដោយសារតែការប្រណាំងម៉ូតូមិនទាន់មានការឧបត្ថម្ភលើតម្លៃខ្លួនកីឡាករឱ្យបានច្រើនដែលនាំទៅដល់ការបំផុសឱ្យមានការចង់ក្លាយខ្លួនជាអាជីពនេះឱ្យពេញលេញ ។ ភាគច្រើនគេចាប់អារម្មណ៍អាជីពនេះតែពេលមានការប្រកួត និងពេលមានការជួបជុំគ្នាម្ដងម្កាលប៉ុណ្ណោះ ដោយសារតែអ្នកមានសមត្ថភាពទាំងនោះសុទ្ធតែមានអាជីពជាក់លាក់រៀងៗខ្លួន មិនមែនដូចកីឡាផ្សេងដែលអ្នកទាំងនោះគឺស៊ប់នឹងអាជីពកីឡាមួយៗតែម្ដង ៕
ចែករំលែកព័តមាននេះ