ឈ្មួញយួនចូលមកទិញឈើ ជួលម៉ូតូខ្មែរឲ្យដឹកដូចស្រមោចពាំស្ករ
ខេត្តមណ្ឌលគិរី ៖ ក្រុមថៅកែឈើយួនកំពុងសម្រុកចូលទៅទិញឈើប្រណិតពេញស្រុកកែវសីមា ខណៈបច្ចុប្បន្ន
ខេត្តមណ្ឌលគិរី ៖ ក្រុមថៅកែឈើយួនកំពុងសម្រុកចូលទៅទិញឈើប្រណិតពេញស្រុកកែវសីមា ខណៈបច្ចុប្បន្ន គេសង្កេតឃើញមានម៉ូតូរាប់សិបគ្រឿងបានដឹកឈើបន្តកន្ទុយគ្នា ចេញពីដែនជម្រកការពារសត្វព្រៃកែវសីមា តាមបណ្តោយផ្លូវជាតិលេខ៧៦ កាត់មុខស្នាក់ការដែនជម្រកការពារសត្វព្រៃ សង្កាត់រដ្ឋបាលព្រៃឈើ សាលាស្រុក អធិការដ្ឋាននគរបាលស្រុក នឹងមូលដ្ឋានកងរាជអាវុធហត្ថស្រុក ទៅយ៉ាងរំភើយ ដោយពុំមានសមត្ថកិច្ច ឬជំនាញធ្វើការទប់ស្តាត់ និងបង្ក្រាបឡើយ ។
ប្រភពបានរាយការណ៍ថា ការចរាចរឈើតាមបណ្តោយផ្លូវជាតិលេខ៧៦ ពីស្រុកអូររាំង ឆ្ពោះទៅស្រុកកែវសីមា ក្នុងដែនជម្រកការពារសត្វព្រៃកែវសីមា ត្រូវគេមើលឃើញថា មានសកម្មភាពមិនលោះមួយថ្ងៃណាសោះឡើយ ។ ខណៈការដឹកជញ្ជូនឈើទាំងនោះ តែងជួបនូវគ្រោះថ្នាក់ជាញឹកញាប់ នឹងបង្កការរំខានដល់អ្នកស្រុក ដែលរស់នៅតាមដងផ្លូវជាតិ ព្រោះតែប្រភេទម៉ូតូដែលគេយកទៅដឹកឈើនោះ ភាគច្រើនជាម៉ូតូកែច្នៃ ដែលមានសម្លេងរំខានខ្លាំង ។
ប្រភពបានបន្តថា ឈើដែលប្រជាពលរដ្ឋនាំគ្នាដឹកតាមរយៈម៉ូតូកែច្នៃទាំងនោះ សុទ្ឋសឹងជាឈើដែលត្រូវបានក្រុមជនជាតិវៀតណាម ចូលទៅទិញក្នុងទឹកដីស្រុកកែវសីមា និងស្រុកអូររាំង រួចទើបជួលឲ្យប្រជាពលរដ្ឋជនជាតិខ្មែរដឹកស៊ីឈ្នួល យកទៅទម្លាក់តាមច្រកព្រំដែន ។ ក្រុមជនជាតិវៀតណាមដែលចូលទៅទិញឈើយ៉ាងសេរីនៅស្រុកកែវសីមា និងស្រុកអូររាំង ត្រូវបានគេដឹងថា បានឆ្លងចូលមកស្រុកខ្មែរតាមច្រកទ្វេរភាគីឡាប៉ាខេ ដែលស្ថិតនៅក្នុងស្រុកកែវសីមា ដោយក្នុងមួយថ្ងៃៗ មានចំនួនមិនតិចជាង២០នាក់នោះទេ មិនខុសពីស្រមោចពាំស្ករឡើយ ។
ប្រភពថា នៅពេលព្រឹក ក្រុមជនជាតិវៀតណាមទាំងនោះបានចូលមកទឹកដីខ្មែរ ជិះម៉ូតូគ្រប់ច្រកល្ហកដើម្បីទិញឈើ នៅពេលដែលពួកគេទិញបានគ្រប់ចំនួនហើយ ជនជាតិវៀតណាមទាំងនោះមិនដឹកជញ្ជូនដោយខ្លួនឯងនោះទេ គឺគេបានជួលបងប្អូនជនជាតិខ្មែរ ដឹកបណ្ដាក់គ្នាដូចខ្យងដើម្បីយកឈើឆ្លងដែនទៅទឹកដីយួន តាមគ្រប់រូបភាពដែលគេអាចធ្វើទៅបាន ។
មានការលើកឡើងថា បច្ចុប្បន្នប្រជាពលរដ្ឋរស់នៅស្រុកកែវសីមា និងស្រុកអូររាំងមួយចំនួនធំ កំពុងចាប់យករបរដឹកឈើតាមម៉ូតូ ធ្វើជារបររកស៊ីចិញ្ចឹមជីវិត ដោយការដឹកជញ្ជូនឈើរបស់ពួកគាត់បានក្លាយទៅជារឿងសាមញ្ញទៅហើយ ។ ចំណែកសមត្ថកិច្ច និងអាជ្ញាធរបានត្រឹមនាំគ្នាឆ្លៀតឱកាស ស៊ីតាមជំនាញរៀងៗខ្លួនប៉ុណ្ណោះ ។
ទាក់ទិនករណីក្រុមថៅកែឈើជនជាតិវៀតណាមកំពុងសម្រុកចូលទៅទិញឈើប្រណិតពេញស្រុកកែវសីមាខាងលើ អ្នកយកព័ត៌មានមិនអាចសុំការបំភ្លឺពីអាជ្ញាធរ និងសមត្ថកិច្ចពាក់ព័ន្ធបានទេ នាថ្ងៃទី២៦ ខែកញ្ញា ឆ្នាំ២០១៧ ៕
ចែករំលែកព័តមាននេះ