ករណីនេះ បង្កឱ្យស្ទះចរាចរណ៍ពេញបន្ទុកលើស្ពានអ្នកលឿងជាង១ម៉ោង
ខេត្តព្រៃវែង ៖ ដោយសារតែការធ្វេសប្រហែស
ខេត្តព្រៃវែង ៖ ដោយសារតែការធ្វេសប្រហែស
ខេត្តព្រៃវែង ៖ ដោយសារតែការធ្វេសប្រហែសក្នុងការបើកបរ ធ្វើឱ្យកើតមានគ្រោះថ្នាក់ចរាចរណ៍ដ៏ធំមួយ ដែលបណ្តាលឱ្យស្ត្រីម្នាក់រងរបួសធ្ងន់ត្រូវដឹកយកទៅសង្គ្រោះបន្ទាន់នៅឯមន្ទីរពេទ្យ ព្រមទាំងម៉ូតូនិងរថយន្តអ្នកដំណើររាប់រយគ្រឿងត្រូវកកស្ទះទៅមុខមិនរួចអស់រយៈពេលជាង១ម៉ោងនៅលើស្ពានត្សឹបាសា ហៅស្ពានអ្នកលឿង ដែលជាស្ពានវែងជាងគេនៅកម្ពុជា ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១និង៣៥នាទីរសៀលថ្ងៃទី២៤ ខែកញ្ញា នៅលើកំណាត់ផ្លូវជាតិលេខ១ ត្រង់ចំណុចផ្លូវឡើងស្ពានត្សឹបាសាពីត្រើយខាងកើត ស្ថិតក្នុងភូមិឧត្តម ឃុំព្រែកខ្សាយ«ក»ស្រុកពាមរក៍ ។ ស្ត្រីដែលរងគ្រោះនៅក្នុងហេតុការណ៍នេះឈ្មោះ ក្រូច សារ៉េត អាយុ២២ឆ្នាំ មានទីលំនៅក្នុងភូមិកណ្តាល ឃុំឈើកាច់ ស្រុកបាភ្នំ ។
យោងតាមការបំភ្លឺពីសាក្សីនៅកន្លែងកើតហេតុ ព្រមទាំងរបាយការណ៍របស់សមត្ថកិច្ចផងបានឱ្យដឹងថា មុនពេលកើតហេតុស្ត្រីរងគ្រោះជិះម៉ូតូ១គ្រឿងម៉ាកហុងដាសេ១២៥ ពណ៌ខ្មៅ ពាក់ផ្លាកលេខ ព្រៃវែង ១L-៥១០០ ធ្វើដំណើរជាមួយប្តីឈ្មោះ ឈិន ហួន អាយុ២៧ឆ្នាំ ក្នុងទិសដៅពីកើតទៅលិចគោលដៅទៅធ្វើការនៅភ្នំពេញ ។ លុះមកដល់ចំណុចខាងលើ ស្រាប់តែម៉ូតូជ្រុលទៅបុកគូទរ៉ឺម៉កម៉ូតូ១គ្រឿងដែលឈប់ចតស្ងៀមនៅចិញ្ចើមផ្លូវ បណ្តាលឱ្យដួលម៉ូតូគ្រវាត់ស្ត្រីរងគ្រោះទៅកណ្តាលថ្នល់ ។
គាប់ជួនពេលនោះ មានរថយន្តយីឌុបមួយគ្រឿងម៉ាកហ៊ីយ៉ាន់ដាយ ពណ៌ស ពាក់ផ្លាកលេខភ្នំពេញ ៣C-១៥៣៦ បើកមកដល់ពីក្រោយដែរ ។ ដោយខ្លាចកិនស្ត្រីរងគ្រោះដែលខ្ទាតទៅនៅពីមុខរថយន្ត អ្នកបើកបរបានកាច់ចង្កូតគេចទៅឆ្វេងដៃ តែគេចមិនផុតធ្វើឱ្យកង់មុខខាងស្តាំកិនបញ្ឆិតលើស្ត្រីរងគ្រោះ រួចជ្រុលទៅបុកជាមួយនឹងរថយន្តបាឡែន១គ្រឿង ដែលបើកមកបញ្ច្រាស់ទិសគ្នា បណ្តាលឱ្យរថយន្តបាឡែនរងការខូចខាតផ្នែកខាងឆ្វេងយ៉ាងដំណំ។
ប្រភពព័ត៌មានដដែលបន្តទៀតថា ក្រោយកើតហេតុភ្លាម អ្នកបើកបររថយន្តយីឌុបបានឈប់រថយន្តនៅចំកណ្តាលថ្នល់ហើយប៉ងរត់គេចខ្លួន តែត្រូវអ្នកដំណើរព្រួតគ្នាស្ទាក់ចាប់បាន។ ពេលនោះដោយសារតែរថយន្តយីឌុបឈប់ចំកណ្តាលថ្នល់ផង ហើយអ្នកដំណើរខ្លះឈប់មើលជនរងគ្រោះដែលដេកស្តូកស្តឹងនៅលើថ្នល់ផង ទើបធ្វើឱ្យកកស្ទះចរាចរណ៍ទៅមុខលែងរួច រហូតដល់ចម្ងាយជាង១គីឡូម៉ែត្រ ដែលសូម្បីតែរថយន្តសាមុយរបស់មន្ទីរពេទ្យក៏ចូលទៅដឹកជនរងគ្រោះមិនរួចដែរ គឺស្ទះជាប់គាំងតែម្តង ។ដោយមើលឃើញស្ថានភាពស្ត្រីរងគ្រោះ កាន់តែធ្ងន់ខ្លាំង ទើបសមត្ថកិច្ចបញ្ជាឱ្យម៉ូតូដឹកស្ត្រីរងគ្រោះទៅកាន់មន្ទីរពេទ្យបង្អែកអ្នកលឿង ដើម្បីឱ្យក្រុមគ្រូពេទ្យជួយសង្គ្រោះ ។
គួរបញ្ជាក់ថា ក្រោយពីកើតហេតុភ្លាម កម្លាំងសមត្ថកិច្ចក៏បានទៅដល់កន្លែងភ្លាមដែរ ហើយជួយអន្តរាគមន៍សម្រួលចរាចរណ៍អស់រយៈពេលជាង១ម៉ោង ទើបអាចធ្វើចរាចរណ៍បានធម្មតាវិញ ។ ចំណែកឯរ៉ឺម៉កម៉ូតូនិងរថយន្តទាំង២គ្រឿង ត្រូវបានសមត្ថកិច្ចនាំយកទៅរក្សាទុកដើម្បីឱ្យភាគីទាំងអស់ចូលខ្លួនទៅធ្វើការដោះស្រាយនៅពេលក្រោយ ។
ជាទូទៅ នៅលើស្ពានត្សឹបាសាឬស្ពានអ្នកលឿងនេះ បានក្លាយជាចំណុចឈប់កម្សាន្តរបស់អ្នកធ្វើដំណើរឆ្លងកាត់តាមស្ពាន ដោយខ្លះឈរលេង ខ្លះថតរូបនៅចំណុចកណ្តាលស្ពាន រហូតដល់មានការពង្រាយសំរាមឥតសណ្តាប់ធ្នាប់ផងដែរ ។ ចំណែកលើផ្លូវឡើងស្ពានពីត្រើយខាងកើត ក៏មានការឈប់យានយន្តជាហូរហែដែរ និងមានកន្លែងចល័តកង់ម៉ូតូថែមទៀតផង ។ ប្រការទាំងអស់ខាងលើនេះក៏គួរតែអាជ្ញាធរនិងសមត្ថកិច្ចចាត់វិធានការឱ្យបានល្អឡើងវិញផងដែរកុំបណ្តោយឱ្យមានភាពអនាធិបតេយ្យពេក៕
ចែករំលែកព័តមាននេះ