គួឲ្យអាណិតណាស់សម្រាលកូនទាំងគ្មានលុយ និងតាមផ្លូវទៀត
រាជធានីភ្នំពេញ៖ ប្រពន្ធឈឺពោះសម្រាលកូនត្រូវបានប្តីដឹកតាម
រាជធានីភ្នំពេញ៖ ប្រពន្ធឈឺពោះសម្រាលកូនត្រូវបានប្តីដឹកតាមម៉ូតូទៅមន្ទីរពេទ្យមកដល់ពាក់កណ្តាលផ្លូវ បានឈឺពោះសម្រាលកូននៅមុខផ្ទះលោក ចម ប្រសិទ្ធ តាមបណ្តោយផ្លូវទំនប់កប់ស្រូវ ភូមិចែងម៉ែង សង្កាត់ សំរោងក្រោម ខណ្ឌពោធិ៍សែនជ័យ បង្កអោយមានការភ្ញាក់ផ្អើលកាលពីវេលាម៉ោង ៣និង៣០នាទីទៀបភ្លឺថ្ងៃទី២៦ ខែកញ្ញា ឆ្នាំ២០១៧ ។
ស្ត្រីសម្រាលកូនតាមផ្លូវមានឈ្មោះ លន់ ផល្លា អាយុ៣៧ឆ្នាំ មុខរបរចាំដីឲ្យគេនៅភូមិចុងថ្នល់ សង្កាត់ពន្សាំង ខណ្ឌព្រែកព្នៅ មានស្រុកកំណើតនៅឃុំព្រះនិពាន ស្រុកគងពិសីខេត្តកំពង់ស្ពឺ មានប្តីឈ្មោះសយ សៀន អាយុ៥១ឆ្នាំ មុខរបរចាំដីឲ្យគេរស់នៅជាមួយគ្នា មានស្រុកកំណើតនៅភូមិចុងថ្នល់ សង្កាត់ពន្សាំង ខណ្ឌព្រែកព្នៅ ។
ស្ត្រីសម្រាលកូនតាមផ្លូវបានឲ្យដឹងថា គាត់មានកូន៤នាក់ហើយ ដែលកូនស្រីច្បង អាយុ១១ឆ្នាំហើយ និងបានពរពោះកូនទី៥ ប៉ុន្តែគាត់មិនដឹងថាគ្រប់ខែត្រូវសម្រាលកូននៅថ្ងៃណាទេ នៅយប់កើតហេតុខណៈពេលដែលគាត់កំពុងដេកលង់លង់ដល់រំលងអធ្រាត្រម៉ោង២ គាត់មានអាការឈឺពោះ ដឹងខ្លួនមិនស្រួល ក៏បានអោយប្តីខ្ចីម៉ូតូម្ចាស់ដីមួយគ្រឿងម៉ាកគុបជ្រុង ពណ៌ទឹកប៉ិច ឌុបទៅសម្រាលកូននៅមន្ទីរពេទ្យ ។ប្រភពដដែលបានបន្តទៀតថា ដោយសារតែប្តីគាត់ និងគាត់មិនសូវស្គាល់មន្ទីរពេទ្យច្បាស់ ពេលប្តីជិះម៉ូតូឌុប ជើងទៅត្បូងមកដល់ចំណុចមុខផ្ទះលោក ចម ប្រសិទ្ធ គាត់អាការកាន់តែចុកសៀតពោះ ទៅមុខលែងរួចក៏ឲ្យប្តីឈប់ម៉ូតូចុះពីលើម៉ូតូស្រាប់តែបែកទឹកភ្លោះសម្រាលកូនតែម្តង គឺកើតបានទារិកាម្នាក់ ។
បុរសជាប្តីបានឲ្យដឹងថា ពេលដែលប្រពន្ធគាត់សម្រាលកូនបានភ្លាមៗគាត់បានឈរសំពះ ស្រែកហៅរ៉ឺម៉កម៉ូតូឬរថយន្តដែលធ្វើដំណើរឆ្លងកាត់ឲ្យជួយដឹកប្រពន្ធរបស់គាត់ទៅកាន់មន្ទីរពេទ្យផង ។សមត្ថកិច្ចល្បាតប្រទះឃើញក៏បានហៅរថយន្តសង្គ្រោះរបស់អង្គភាព ៧១១ ដឹកយកទៅមន្ទីរពេទ្យបង្អែកពោធិ៍ចិនតុង ។ បុរសជាប្តីបានឲ្យដឹងទៀតថា គាត់ពីរនាក់ប្តីប្រពន្ធចាំដីឲ្យគេបានប្រាក់ខែមួយខែ១៥០ដុល្លារ និងអង្ករ១បាវ ។ នៅពេលប្រពន្ធមានផ្ទៃពោះជិតគ្រប់ខែគាត់បានសន្សែសន្សំបានប្រាក់៣០ម៉ឺនរៀល ទុកសម្រាប់សម្រាលកូន ពេលដែលប្រពន្ធឈឺពោះខ្លាំងពេកប្រញាប់មិនដឹងថាជ្រុះកាបូបលុយបាត់នៅកន្លែងណាទេបាត់លុយអស់រលីង ៕
ចែករំលែកព័តមាននេះ