វារីអគ្គិសនីសេសានក្រោម2 នឹងដាក់ឱ្យដំណើរការនៅដើមឆ្នាំ
រាជធានីភ្នំពេញ ៖ ថ្លែងក្នុងពិធីបិទទ្វារទឹកទំនប់វារីអគ្គិសនីសេសានក្រោម២ នាព្រឹកថ្ងៃទី២៥ កញ្ញា ម្សិលមិញ សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា
រាជធានីភ្នំពេញ ៖ ថ្លែងក្នុងពិធីបិទទ្វារទឹកទំនប់វារីអគ្គិសនីសេសានក្រោម២ នាព្រឹកថ្ងៃទី២៥ កញ្ញា ម្សិលមិញ សម្ដេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា វារីអគ្គិសនីសេសានក្រោម២ មានកម្លាំងថាមពល៤០០មេហ្គាវ៉ាត់ ដែលមានកម្លាំងផលិតបាន១.៩១២លានគីឡូវ៉ាត់ម៉ោង នឹងដាក់ឲ្យដំណើរការជាលើកដំបូងនៅដើមឆ្នាំ២០១៨ខាងមុខ ។
សម្ដេចថ្លែងបន្ដថា នៅពេលដំណើរការវារីអគ្គិសនីនេះ មិនត្រឹមតែផ្គត់ផ្គង់សម្រាប់ខេត្តស្ទឹងត្រែងទេ ប៉ុន្ដែនឹងមានសមត្ថភាពផ្គត់ផ្គង់ខេត្តផ្សេងៗទៀត ហើយកម្ពុជាមានបណ្តាញផ្គត់ផ្គង់ខ្លួនឯងប្រកបដោយស្ថិរភាព និងឯករាជ្យភាព ។ ទន្ទឹមនឹងការផលិតអគ្គិសនីនៅទីនេះ គឺទាមទារការតបណ្តាញពីស្ទឹងត្រែងទៅក្រចេះ ពីក្រចេះទៅកំពង់ចាម និងពីកំពង់ចាមទៅភ្នំពេញ គឺត្រូវតភ្ជាប់បណ្តាញមេទាំងអស់ ដែលនឹងធ្វើឲ្យតម្លៃអគ្គិសនីធ្លាក់ចុះថោកជាបន្តបន្ទាប់ ។
សម្តេចតេជោ ហ៊ុន សែន ថ្លែងថា ៖« ពីមួយថ្ងៃទៅមួយថ្ងៃ គ្មានថ្ងៃណាដែលមិនត្រូវការថាមពលអគ្គិសនីនោះទេ ពោលគឺតម្រូវការអគ្គិសនីកើនឡើងជានិច្ច » ។ សម្តេចបានគូសបញ្ជាក់ថា ក្នុងអំឡុងទសវត្សរ៍៨០ កម្ពុជាប្រើប្រាស់ថាមពលអគ្គិសនីប្រមាណ៣០ទៅ៤០មេហ្គាវ៉ាត់ប៉ុណ្ណោះ ប៉ុន្តែបច្ចុប្បន្ននេះត្រូវការជាង២ពាន់មេហ្គាវ៉ាត់ ។ គ្រាន់តែរាជធានីភ្នំពេញប្រើប្រាស់ប្រមាណ៥០០មេហ្គាវ៉ាត់ ព្រោះតម្រូវការប្រើប្រាស់ថាមពលអគ្គិសនីរបស់ប្រជាពលរដ្ឋខ្មែរកាន់តែខ្ពស់ទៅៗ ។ ដូច្នេះ កម្ពុជានឹងបន្តជំរុញការបង្កើតវារីអគ្គិសនីទៅតាមដំណាក់កាលនីមួយៗបន្ថែមទៀតដើម្បីបំពេញកំណើនតម្រូវការនេះ ។
ចំពោះតម្លៃប្រើប្រាស់ បងប្អូនក្រីក្រដែលប្រើភ្លើងក្រោម១០គីឡូវ៉ាត់ម៉ោង គឺបង់តែ៤៨០រៀលប៉ុណ្ណោះ ហើយប្រសិនបើប្រើចាប់ពី១១ដល់៥០គីឡូវ៉ាត់ម៉ោង គឺបង់តែ៦១០រៀល ក្នុង១គីឡូវ៉ាត់ម៉ោង ។ ចំណែកតម្លៃដែលនៅសេសសល់ រដ្ឋនឹងជួយបង់ជំនួសនូវតម្លៃលើសពីនេះ ។
សម្ដេចតេជោថ្លែងថា ៖« សព្វថ្ងៃ មានប្រជាពលរដ្ឋជាង៣លានខ្នងផ្ទះដែលទទួលបានអគ្គិសនីប្រើប្រាស់ ហើយយើងត្រូវរៀបចំឲ្យប្រជាពលរដ្ឋនៅទូទាំងប្រទេស ជាពិសេស នៅតាមជនបទមានអគ្គិសនីប្រើប្រាស់គ្រប់ៗគ្នា » ។
វារីអគ្គិសនីសេសានក្រោម២នេះ នឹងលក់ឲ្យអគ្គិសនីកម្ពុជា តម្លៃ៦,៩៥សេនអាមេរិកក្នុង១គីឡូវ៉ាត់ម៉ោងក្នុងរយៈពេល៤០ឆ្នាំ (BOT) បន្ទាប់មកនឹងត្រូវប្រគល់ជូនរាជរដ្ឋាភិបាលកម្ពុជាគ្រប់គ្រង ។ ក្រោយពីចប់៤០ឆ្នាំ គឺរដ្ឋយកមកគ្រប់គ្រងទាំងស្រុង ឬជួលបន្តឲ្យក្រុមហ៊ុន ។
គួរបញ្ជាក់ថា គម្រាងវារីអគ្គិសនីសេសានក្រោម២ ត្រូវបានរាជរដ្ឋាភិបាលកម្ពុជាអនុញ្ញាត ឲ្យក្រុមហ៊ុន Hydro Power Se San 2 Co., Ltd ធ្វើការវិនិយោគ និងសាងសង់ ដែលមានក្រុមហ៊ុនរួមទុនចំនួន៣គឺ ១-ក្រុមហ៊ុន Hydrolancang International Energy របស់ចិន មានភាគហ៊ុន៥១% ជាក្រុមហ៊ុនបុត្រសម្ព័ន្ធនៃក្រុមហ៊ុន China Huaneng Group., ២-ក្រុមហ៊ុន Royal Group របស់អ្នកឧកញ៉ា គិត ម៉េង មានភាគហ៊ុន៣៩% និង៣-ក្រុមហ៊ុន EVN International របស់វៀតណាម មានភាគហ៊ុន១០% ។
យោងតាមទិន្នន័យរបស់ក្រសួងរ៉ែ និងថាមពលបានឲ្យដឹងថា បច្ចុប្បន្ននេះនៅកម្ពុជា ក្រុមហ៊ុនចិនវិនិយោគវារីអគ្គិសនីចំនួន៧ ដែលមានទុនវិនិយោគសរុប២.៣០០លានដុល្លារអាមេរិក គិតត្រឹមឆ្នាំ២០១៦ ។
លោកបណ្ឌិត ម៉ី កល្យាណ ទីប្រឹក្សាជាន់ ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា តម្រូវការថាមពលអគ្គិសនីនៅកម្ពុជាពិតជាត្រូវការកាន់តែច្រើនទៅៗហើយ ដោយសារកម្ពុជាកំពុងអភិវឌ្ឍន៍យ៉ាងឆាប់រហ័ស ព្រោះវិស័យអ្វីក៏ត្រូវការអគ្គិសនីដែរដើម្បីធ្វើឲ្យខ្សែសង្វាក់ផលិតកម្មបានរលូនដែរ តែថាមពលអគ្គិសនីនៅកម្ពុជានៅមានតម្លៃថ្លៃនៅឡើយ បើធៀបជាមួយប្រទេសជិតខាង ប៉ុន្តែនៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ រាជរដ្ឋាភិបាលបានផ្តោតអាទិភាព លើការបញ្ចុះតម្លៃថាមពលអគ្គិសនីផងដែរ ។
លោកបន្តថា រាជរដ្ឋាភិបាលបាននិងកំពុង លើកទឹកចិត្តឲ្យមានការវិនិយោគលើវិស័យនេះច្រើន ជារឿងចាំបាច់ និងសមស្របតាមការរីកចម្រើននៃសេដ្ឋកិច្ច សង្គមរបស់កម្ពុជា ប៉ុន្តែគុណភាពថាមពលអគ្គិសនីកម្ពុជានៅមានកម្រិតនៅឡើយ ដែលទាមទារឲ្យអាជ្ញាធរអគ្គិសនីបង្កើនសមត្ថភាពរបស់ខ្លួនបន្ថែមទៀត ដើម្បីធ្វើឲ្យថាមពលអគ្គិសនីកាន់តែមានគុណភាពខ្ពស់ ។
យោងតាមផែនការរបស់ក្រសួងរ៉ែ និងថាមពល បានឲ្យដឹងថា រាជរដ្ឋាភិបាលមានផែនការធ្វើឲ្យភូមិចំនួន៧៣%មានបណ្តាញអគ្គិសនី ប្រើប្រាស់នៅឆ្នាំ២០២០ និងផ្ទះ៦០%មានការភ្ជាប់បណ្តាញអគ្គិសនី និងគ្រោងបង្កើនឲ្យបាន៧០%នៃខ្នងផ្ទះមានបណ្តាញអគ្គិសនីប្រើប្រាស់នៅឆ្នាំ២០៣០ ៕
ចែករំលែកព័តមាននេះ