រដ្ឋាភិបាល និងសហជីពខ្វែងគំនិតគ្នាជុំវិញប្រាក់ឈ្នួលអប្បបរមា
រាជធានីភ្នំពេញ ៖ ភាគីរាជរដ្ឋាភិបាល និងសហជីពនានាកំពុងខ្វែងគំនិតគ្នាជុំវិញការដំឡើងប្រាក់ឈ្នួលអប្បបរមានៅឆ្នាំ២០១៨ខាងមុខនេះ ខណៈ
រាជធានីភ្នំពេញ ៖ ភាគីរាជរដ្ឋាភិបាល និងសហជីពនានាកំពុងខ្វែងគំនិតគ្នាជុំវិញការដំឡើងប្រាក់ឈ្នួលអប្បបរមានៅឆ្នាំ២០១៨ខាងមុខនេះ ខណៈ
រាជធានីភ្នំពេញ ៖ ភាគីរាជរដ្ឋាភិបាល និងសហជីពនានាកំពុងខ្វែងគំនិតគ្នាជុំវិញការដំឡើងប្រាក់ឈ្នួលអប្បបរមានៅឆ្នាំ២០១៨ខាងមុខនេះ ខណៈរាជរដ្ឋាភិបាល និងតំណាងភាគីនិយោជកបានកំណត់តួលេខចំនួន១៦១ដុល្លារអាមេរិក ដោយឡែក ភាគីសហជីពកំណត់យកតួលេខចំនួន១៧៦ដុល្លារអាមេរិក ។
មានប្រសាសន៍ប្រាប់ក្រុមអ្នកសារព័ត៌មាន ក្រោយចប់កិច្ចប្រជុំក្រុមការងារបច្ចេក ទេសត្រីភាគី ដើម្បីពិភាក្សាពីប្រាក់ឈ្នួលអប្បបរមាផ្នែកវាយនភ័ណ្ឌកាត់ដេរ និងផលិតស្បែកជើងនៅកម្ពុជា សម្រាប់ឆ្នាំ២០១៨ នៅរសៀលថ្ងៃទី២៥ កញ្ញា នៅទីស្តីការក្រសួងការងារ លោក ហេង សួរ អ្នកនាំពាក្យក្រសួងការងារ បានបញ្ជាក់បន្ថែមថា ក្នុងកិច្ចប្រជុំរយៈពេលជាង៥ម៉ោងនាព្រឹកថ្ងៃនេះ (ថ្ងៃទី២៥ កញ្ញា) ភាគីនីមួយៗបានបញ្ជាក់ពីគោលជំហរផ្លូវការរបស់ខ្លួនចំពោះមុខគ្នា ជាមួយហេតុផលបឋមក្នុងការសម្រេចយកតួលេខខាងលើនេះ ។
លោកបន្តថា ក្រុមការងារនឹងបើកកិច្ចប្រជុំបន្តជាលើកទី២ អំពីប្រាក់ឈ្នួល នឹងប្រព្រឹត្តទៅនាល្ងាចថ្ងៃសុក្រ ទី២៩ កញ្ញា ទៀត ដើម្បីកំណត់យកតួលេខសមស្របណាមួយ ក្នុងការកំណត់នូវកាលបរិច្ឆេទដើម្បីបោះឆ្នោតសម្រេចជាផ្លូវការ ។
ទាក់ទិននឹងកិច្ចចរចាកំណត់ប្រាក់ឈ្នួលឆ្នាំ២០១៨នេះ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសប្រើប្រាស់រូបមន្តចាស់ គឺគ្រប់ភាគីទាំងអស់ត្រូវប្រើលក្ខណៈវិនិច្ឆ័យបែបសង្គម និងសេដ្ឋកិច្ច ។ ផ្នែកសង្គម គឺត្រូវពិនិត្យលើស្ថានភាពគ្រួសារ និងការចំណាយក្នុងការរស់នៅ ។ ចំណែកផ្នែកសេដ្ឋកិច្ច គឺផ្តោតលើផលិតភាព ភាពប្រកួតប្រជែងរបស់ប្រទេស និងស្ថានភាពទីផ្សារ ។
ការសម្រេចប្រាក់ឈ្នួលអប្បបរមាសម្រាប់និយោជិតក្នុងវិស័យវាយនភ័ណ្ឌ នឹងត្រូវធ្វើឡើងនៅខែតុលា ហើយនៅថ្ងៃទី១ មករា ឆ្នាំ២០១៨ គឺជាថ្ងៃដែលប្រាក់ឈ្នួលអប្បបរមាចូលជាធរមាន ។
បច្ចុប្បន្ន ប្រាក់ឈ្នួលអប្បបរមារបស់កម្មករនិយោជិតផ្នែកកាត់ដេរសម្លៀកបំពាក់ និងផលិតស្បែកជើងមានចំនួន១៥៣ដុល្លារអាមេរិក។ ប្រាក់ឈ្នួលនេះបានកើនឡើងប្រមាណជាង១៣ដុល្លារ បើធៀបនឹងប្រាក់ឈ្នួលអប្បបរមានៅឆ្នាំ២០១៦ ។
អគ្គលេខាធិការសមាគមរោងចក្រកាត់ដេរកម្ពុជា លោក កាំង ម៉ូនីកា បានថ្លែងថា ការដំឡើងប្រាក់ឈ្នួលជាប្រចាំរបស់វិស័យនេះ បានធ្វើឲ្យកម្ពុជាកាន់តែមានភាពប្រកួតប្រជែង ព្រោះការដំឡើងប្រាក់ខែសម្រាប់កម្មករក្នុងវិស័យនេះមែន ប៉ុន្តែផលិតភាពក្នុងវិស័យនេះមិនបានកើនឡើងទេ ដែលធ្វើឲ្យរោងចក្រជាសមាជិកសមាគមជាច្រើនបានបិទទ្វារច្រើនជាងរោងចក្របើកថ្មីនៅក្នុងប្រទេស ក្នុងរយៈពេល៦ខែដើមឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន ។
ទោះជាយ៉ាងណា លោក ង៉ែត ជូ ទីប្រឹក្សាជាន់ខ្ពស់នៃក្រុមហ៊ុន Emerging Market Consulting បានថ្លែងថា ដើម្បីបង្កើនផលិតភាព អ្នកវិនិយោគក្នុងវិស័យនេះ គួរវិនិយោគលើវិស័យបច្ចេកវិទ្យា ដើម្បីជួយឲ្យផលិតភាពកើនឡើង ខណៈការប្រកួតប្រជែងកាន់តែតានតឹងជាមួយប្រទេសក្នុងតំបន់ ហើយរាជរដ្ឋាភិបាលគួរជួយបង្កបរិយាកាសកាន់តែល្អប្រសើរសម្រាប់វិស័យនេះនៅកម្ពុជាផងដែរ ។
លោកបន្តថា ៖« ខ្ញុំមិនមានសុទិដ្ឋិនិយមច្រើនទេ តែការលើកទឹកចិត្តរបស់រដ្ឋាភិបាល ដល់វិស័យឯកជន តាមរយៈការមិនយកពន្ធរយៈពេល៩ឆ្នាំ គឺជាការលើកទឹកចិត្តមួយចំពោះរោងចក្របើកថ្មីនៅកម្ពុជា » ៕
ចែករំលែកព័តមាននេះ