ស្រវឹងស្រាជិះម៉ូតូបុករថយន្តដួលបាក់ជើង
ខេត្តកណ្តាល ៖ បុរសម្នាក់បានជិះម៉ូតូទៅបុកជាមួយរថយន្តមិនស្គាល់ម៉ាកមួយគ្រឿង ក្នុងទិសដៅច្រាសគ្នា
ខេត្តកណ្តាល ៖ បុរសម្នាក់បានជិះម៉ូតូទៅបុកជាមួយរថយន្តមិនស្គាល់ម៉ាកមួយគ្រឿង ក្នុងទិសដៅច្រាសគ្នា បណ្តាលឲ្យរងរបួសបាក់ជើងខាងឆ្វេងធ្ងន់ កាលពីវេលាម៉ោង២៣និង២០នាទីយប់ ថ្ងៃទី២៤ ខែកញ្ញា ឆ្នាំ២០១៧ នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ ២៥-២៦ ស្ថិតក្នុងភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល ។
ប្រភពព័ត៌មាននិយាយថា មុនពេលកើតហេតុគេឃើញម៉ូតូមួយគ្រឿងពណ៌បៃតងលាយស ពាក់ស្លាកលេខ ភ្នំពេញ ១AA-៧៧៥៤ ដែលបើកបរដោយឈ្មោះ ឆែម ចាន់ដ៉ារិទ្ធ ភេទប្រុស អាយុ២៣ឆ្នាំ មានទីលំនៅខេត្តស្វាយរៀង ក្នុងទិសដៅពីអ្នកលឿងទៅភ្នំពេញ ដោយក្នុងស្ថានភាពស្រវឹងស្រា ។
លុះមកដល់ចំណុចខាងលើ ក៏បានបុកប៉ះពីចំហៀងជាមួយរថយន្តមិនស្គាល់ម៉ាកមួយគ្រឿង ដែលកំពុងបើកបរទិសដៅបញ្ច្រាសគ្នា បណ្តាលឲ្យភាគីម៉ូតូដួលបោករងរបួសបាក់ជើងខាងឆ្វេងធ្ងន់ ត្រូវគេដឹកបញ្ជូនយកទៅព្យាបាលនៅមន្ទីរពេទ្យនៅភ្នំពេញ ។ ចំណែករថយន្តមិនស្គាល់ម៉ាកបានព្យាយាមបើករត់គេចខ្លួនទៅខាងអ្នកលឿងបាត់ស្រមោល ។
ក្រោយពីទទួលបានព័ត៌មានកម្លាំងប៉ុស្តិ៍នគរបាលឃុំដីឥដ្ឋ ចុះដល់ចំណុចកើតហេតុ ជួយអន្តរាគមន៍ និងរាយការណ៍ទៅនគរបាលជំនាញសណ្ដាប់ធ្នាប់ចរាចរណ៍ស្រុកកៀនស្វាយ ចុះមកធ្វើការវាស់វែងចាត់ការតាមនីតិវិធី ៕
ចែករំលែកព័តមាននេះ